ހަމާސް އިން ޖެހޭނީ ހަތިޔާރު ބަހައްޓަން، އެހެން ނޫނީ ނައްތާލާނަން: ޓްރަމްޕް

ފަލަސްޠީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް ޖަމާއަތަށް ޖެހޭނީ ހަތިޔާރު ބަހައްޓަން ކަމަަށާއި، އެހެން ނޫނީ އެ ޖަމާއަތް ނައްތާލާނެ ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވައިފި އެވެ.

ޓްރަމްޕް މިހެން ވިދާޅުވެފައި ވަނީ ސްވިޒަލެންޑުގެ ޑާވޯސްގައި ކުރިއަށް ދިޔަ ވޯލްޑް އިކޮނޮމިކް ފޯރަމްގައި ބައިވެރިވެ ވަޑައިގެން ތަޤުރީރު ކުރައްވަމުންނެވެ. އެގޮތުން ޓްރަމްޕް ވިދާޅުވީ ހަމާސް އިން ބޭނުން ވަނީ ހަތިޔާރު ބަހައްޓަންތޯ، ނުވަތަ ނޫންތޯ ވަރަށް އަވަހަށް އެމެރިކާ އަށް އިނގޭނެ ކަމަށެވެ. 

އެކަން ފާހަގަ ކުރައްވައި ޓްރަމްޕް ވިދާޅުވީ، ހަމާސް އިން އެކަން ނުކޮށްފި ނަމަ، އެ ޖަމާއަތް ނައްތާލާނެ ކަމަށެވެ. މީގެ ކުރިން ވެސް ޓްރަމްޕް ވަނީ ހަމާސް އާ ދެކޮޅަށް މިފަދަ އިންޒާރުތައް ދެއްވައިފަ އެވެ.

ޓްރަމްޕް ވިދާޅުވީ، މެދު އިރުމަތީގެ ސުލްޙަ ޔަޤީން ކުރުމަށްޓަކައި މިދިޔަ އަހަރުގެ ޖޫން މަހު އެމެރިކާ އިން އީރާން އަށް ދިން ހަމަލާ އަކީ ބޭނުންތެރި ހަމަލާ އެއް ކަމަށެވެ. 

އެމެރިކާ އިން އީރާންގެ ނިއުކްލިއާ މަރުކަޒު ތަކަށް އަމާޒުކޮށް ހަމަލާ ދީފައިވާއިރު، އިތުރު ހަމަލާ ތަކެއް ދޭނެ ކަމުގެ އިންޒާރު އަބަދު ވެސް ޓްރަމްޕް ގެންދަވަނީ ދެއްވަމުންނެވެ. އެއާ އެކު، އެ ތަޤުރީރުގައި ޓްރަމްޕް ވަނީ އީރާން އަކީ މެދު އިރުމަތީގެ "ބުލީ"ގެ ގޮތުގައި ސިފަ ކުރައްވައިފަ އެވެ. 

ހަމާސް ޖަމާއަތާއި، އީރާންގެ އިތުރުން، ޓްރަމްޕް ވަނީ ރަޝިޔާ އާއި ޔޫކްރެއިންއާ ދެމެދު ހިނގަމުން އަންނަ ހަނގުރާމައިގެ ވާހަކަ ވެސް ދައްކަވައިފަ އެވެ. އެގޮތުން ރަޝިޔާ އާއި ޔޫކްރެއިންއާ ދެމެދު ހަނގުރާމަ ކުރަމުން އަންނަތާ ގާތް ގަނޑަކަށް ހަތަރު އަހަރުވެފައިވާއިރު، ދެ ޤައުމުގެ ރައީސުން ވެސް ބޭނުން ވަނީ ހަނގުރާމަ ނިންމުމަށް ކަމަށް ޓްރަމްޕް ވިދާޅުވި އެވެ. 

ޓްރަމްޕްގެ ތަޤުރީރުގައި އޭނާ ވަނީ، އެމެރިކާ އަކީ ދުނިޔޭގެ އިޤްތިސާފދީ އިންޖީނުގެ ގޮތުގައި ސިފަ ކުރައްވައިފަ އެވެ. އަދި މުޅި ދުނިޔޭގެ ކުރިއެރުން ބަރޯސާ ވަނީ އެމެރިކާ އަށް ކަމަށް ވެސް ޓްރަމްޕް ވިދާޅުވެފައިވެ އެވެ. އެމެރިކާ އިން ގްރީންލޭންޑު ހޯދުމުގެ ވާހަކަ ޓްރަމްޕް ވަރަށް ގަދައަށް ދައްކަވަމުން އަންނައިރު، އެކަމުގެ ސަބަބުން ޔޫރަޕުގެ ބައިވެރިންގެ ނުރުހުން އެމެރިކާ އަށް އަމާޒުވެފައިވެ އެވެ. ނަމަވެސް، ޓްރަމްޕްގެ ތަޤުރީރުގައި ވަނީ ޔޫރަޕަށް ވެސް ވަރަށް ބޮޑަށް ފާޑު ވިދާޅުވެފަ އެވެ.

އެމެރިކާގެ ކުރިއެރުމުގެ ވާާހަކަ ދައްކަވަމުން ޓްރަމްޕް ވިދާޅުވީ، އެމެރިކާ ކުރިއަރާ އިރު، ދުނިޔޭގެ ހުރިހާ ތަނެއް ވެސް ކުރި އަރާނެ ކަމަށެވެ. އަދި އެއީ ތާރީޚު ކަމަަށާއި، އެކަން ފެންނަން އޮތީ އެގޮތުގައި ކަމަށް ޓްރަމްޕް ވިދާޅުވި އެވެ.