ސަލާމަތީ ޔަގީންކަން ދިނުމަށް އެމެރިކާގެ ލިޔެ ކިޔުންތައް ހުރީ ނިމިފައި، އިންތިޒާރު ކުރަނީ ސޮއި ކުރުމަށް: ޒެލެންސްކީ

އެމެރިކާާ އިން ޔޫކްރެއިން އަށް ސަލާމަތީ ޔަގީންކަން ދިނުމަށް ބޭނުންވާ ލިޔެ ކިޔުންތައް ހުރީ މުޅިން ނިމިފައި ކަމަށާއި، މިހާރު އިންތިޒާރު ކުރަމުން އަންނަނީ ސޮއި ކުރެވޭނެ ދުވަހަކަށް ކަމަށް، ޔޫކްރެއިންގެ ރައީސް ވުލޮޑިމިއަރ ޒެލެންސްކީ ވިދާޅުވެއްޖެ އެވެ. 

ޒެލެންސްކީ މިހެން ވިދާޅުވެފައި މި ވަނީ، މި ނިމުނު ހަފުތާ ބަންދުގައި ރަޝިޔާ އާއި، އެމެރިކާ އަދި ޔޫކްރެއިން ހިމެނޭހެން ތިން ޤައުމުގެ ދެ މެދުގައި ސީދާ މަޝްވަރާތައް ބާއްވާފައިވާ ދަނޑިވަޅެއްގަ އެވެ. އެއާ އެކު، ޒެލެންސްކީގެ ވާހަކަ އިން ދޭހަވަނީ އެ މަޝްވަރާ ތަކުން ކުރިއެރުމެއް ލިބިފައިވާކަން ކަމަށް މާހިރުން ފާހަގަ ކޮށްފައިވެ އެވެ. 

ލިތުއޭނިއާގެ ވެރި ރަށް ވިލްނިއަސް އަށް ކުރެއްވި ދަތުރުފުޅުގައި ބޭއްވި ނޫސްވެރިންގެ ބައްދަލުވުމުގައި ޒެލެންސްކީ ވިދާޅުވީ، ޔޫކްރެއިން އަށް ސަލަމާތީ ޔަގީންކަން އަދި ސަލާމަތީ ރައްކާތެރިކަން ލިބުމަކީ އެމެރިކާގެ ފަރާތުން އެންމެ ބޭނުންވާ ކަންތައް ކަމަށެވެ. އެކަަމަށް ބޭނުންވާ ލިޔެ ކިޔުންތަކުގެ 100 އިންސައްތަ ތައްޔާރުވެފައިވާ ކަަމަށާއި، އެ ލިޔުމުގައި ސޮއި ކުރާނެ ތަނަކާއި، ތާރީޚެއް ކަށަވަރު ކޮށްދިނުމަށް ބައިވެރިން އަދި އިންތިޒާމު ކުރާ ފަރާތްތަކުގެ ކިބައިން އެދޭ ކަމަށެވެ. 

އެކަން ފާހަގަ ކުރައްވައި ޒެލެންސްކީ ވިދާޅުވީ، އެ ލިޔުމުގައި ސޮއި ކުރުމަށް ފަހު، އެ ލިޔުން ތަސްދީގު ކުރުމަށް އެމެރިކާގެ ކޮންގްރެސް އާއި، ޔޫކްރެއިންގެ ޤާނޫނު ހަދާ މަޖިލީހަށް ފޮނުވާނެ ކަމަށެވެ.

ހުކުރު ދުވަހާއި، ހޮނިހިރު ދުވަހު ވަނީ ޔޫކްރެއިން އާއި ރަޝިޔާގެ އޮފިޝަލުން ހިމެނޭހެން އެމެރިކާގެ މަންދޫބުންނާ އެކު ތިން ފަރާތުގެ ބައްދަލުވުން ތަކެއް ކުރިއަށް ގެންގޮސްފަ އެވެ. ހަތަރު އަހަރަށް ދެމިގެންދާ މި ހަނގުރާމަ ނިންމުމަށް އެމެރިކާ އިން ހުށަހަޅާފައިވާ އަމަލީ ފްރޭމްވޯކާ ގުޅޭ ގޮތުން މަޝްވަރާ ކޮށްފައި ވީ ނަމަވެސް، އެއްވެސް އެއްބަސްވުމަކަށް އާދެވިފައި ނުވެ އެވެ. 

ނަމަވެސް، ރަޝިޔާ އާއި ޔޫކްރެއިން އިން ވެސް ބުނީ އިތުރު މަޝްވަރާ ތަކަށް ތައްޔާރަަށް ތިބި ކަމަށާއި، އަންނަ އާދީއްތަ ދުވަހު އިތުރު މަޝްވަރާ ތަކެއް ބޭއްވޭނެ ކަމަށް ލަފާ ކުރެވޭ ކަމަށެވެ. އެމެރިކާ އިން ވެސް ވަނީ، އިތުރު މަޝްވަރާ ތަކެއް ކުރިއަށް ގެންދާނެ ކަމަށް މައުލޫމާތު ދީފަ އެވެ. 

އިތުރަށް ޒެލެންސްކީ ވިދާޅުވެފައި ވަނީ، 20 ނުކުތާގެ މައްޗަށް އެކުލެވިގެންދާ ޕްލޭން އާއި، އެ ޕްލޭންގައި ހުރި މައްސަލަތަކާ މެދު މަޝްވަރާ ކުރަމުން އަންނަ ކަމަށެވެ. މަޝްވަރާ ތަކުގައި ވަރަށް ގިނަ މައްސަލަ ތަކެއް ހުރި ނަމަވެސް، މިހާރު އެ މައްސަލަތައް ވަރަށް މަދުވެފައިވާ ކަމަށް ޒެލެންސްކީ ވިދާޅުވެފައިވެ އެވެ. މީގެ ކުރިން އެމެރިކާ އިން ވެސް ވަނީ މައްސަލަތައް މަދު ކުރެވިފައިވާ ކަމަށް ބުނެފަ އެވެ.

ރަޝިޔާ އާއި ޔޫކްރެއިން އާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަކީ، އެމެރިކާގެ ރައީސް ޑޮނަލްޑް ޓްރަމްޕްގެ ވަރަށް ބޮޑު ވައުދުފުޅަކަށްވާއިރު، ހަނގުރާމަ ނިންމުމަށް ޓްރަމްޕް އަންނަނީ ވަރަށް ބޮޑަށް ބާރު އަޅުއްވަމުންނެވެ.