ޕުޓިން އާއި އަލް ޝަރާ ބައްދަލު ކުރައްވައި، ސީރިއާގައި ރަޝިޔާގެ ސިފައިން ތިބުމާ ގުޅޭ ގޮތުން މަޝްވަރާ ކުރައްވައިފި

ރަޝިޔާގެ ރައީސް  ވްލަޑިމިއަރ ޕުޓިން އާއި، ސީރިއާގެ ރައީސް އަޙުމަދު އަލް ޝަރާ ބައްދަލު ކުރައްވައި ގިނަ ކަންތައްތަކާ ގުޅޭ ގޮތުން މަޝްވަރާ ކުރައްވައިފި އެވެ.

ބުދަ ދުވަހު ޕުޓިން އާއި އަލް ޝަރާ ބައްދަލު ކުރައްވާފައި ވަނީ، ރަޝިޔާގެ ރިޔާސީ ގަނޑުވަރު ކްރެމްލިންގަ އެވެ. ރަޝިޔާ އާއި ސީރިއާގެ މަސްދަރު ތަކުން ބުނެފައިވާ ގޮތުގައި، އެ ބައްދަލުވުމުގައި ވަނީ ސީރިއާގައި ރަޝިޔާގެ ސިފައިން ތިބުމާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވައިފަ އެވެ. 

ސީރިއާގެ ކުރީގެ ރައީސް ބަޝަރު އަލް އަސަދުގެ ވެރިކަން ވައްޓާލުމަށް ފަހު، 2024 ވަނަ އަހަރުގެ ޑިސެމްބަރު މަހުގެ ތެރޭގައި އަލް ޝަރާ އެ ޤައުމުގެ ވެރިކަމަށް ވަޑައިގެންނެވި ފަހުން ވެސް، ރަޝިޔާ އިން ވަނީ ސީރިއާ އާއެކު ގުޅުން ބަދަހި ކުރުމަށް މަސައްކަތް ކޮށްފަ އެވެ. އަދި މެެދު އިރުމަތީގެ ސަރަހައްދުގައި ރަޝިޔާގެ ނުފޫޒު ވަރުގަދަ ކުރުމަށް އެ ޤައުމުގެ ސިފައިންގެ ޙަރަކާތްތައް ފުޅާ ކުރުމަށް މަސައްކަތް ކުރަމުން ގެންދެ އެވެ. 

ސީރިއާގެ ފޮރިން މިނިސްޓްރީގެ މަސްދަރަކުން ބުނެފައިވާ ގޮތުގައި، ރަޝިޔާގެ މިި ފިޔަވަޅަކީ ސީރިއާ އާއެކު ގުޅުން ބަދަހި ކުރުމަށް އެޅި މުހިންމު ފިޔަވަޅެކެވެ. އަދި ޤައުމުގެ ހުރިހާ ސަރަހައްދެއްގައި މަރުކަޒީ ބާރު ޤާއިމު ކުރުމަށް އަލް ޝަރާ މަސައްކަތް ކުރައްވާއިރު، ސީރިއާގެ ސަރުކާރުގެ ސިފައިންނާއި ކުރުދީންގެ ލީޑާޝިޕްގެ ދަށުގައިވާ ސީރިއާ ޑިމޮކްރަޓިކް ފޯސަސްއާ ދެމެދު ހިނގާ ހަނގުރާމައިގެ ތެރެއަށް ރަޝިޔާ ނުވަންވާނެ ކަމުގެ ނިޝާނެއްގެ ގޮތުގައި ފެންނަ ކަމަށް ފާހަގަ ކޮށްފައިވެ އެވެ. 

އެ ބައްދަލުވުން ފެށުމުގެ ކުރީގެ މަންޒަރު ތަކެއް އާންމު ކޮށްފައިވާއިރު، އަލް ޝަރާއާ ސަލާމް ކުރައްވައި ޕުޓިން ވާހަކަ ދައްކަވައިފައި ވެއެވެ. އެގޮތުން ސީރިއާގެ ސަރަހައްދީ ހަމަހަމަކަން އަލުން ޤާއިމު ކުރުމުގެ މަސައްކަތް ހަލުވިކަމާ އެކު ކުރިއަށްދާކަން ފެނުމަކީ މަރުހަބާ ވިދާޅުވާ ކަމެއް ކަމަށް ޕުޓިން ވިދާޅުވެ އެވެ. 

މިއީ އަލް އަސަދުގެ ވެރިކަން ވައްޓާލުމަށް ފަހު، ސީރިއާގެ ވެރިކަމަށް އަލް ޝަރާ ވަޑައިގެންނެވި ފަހުން ރަޝިޔާ އަށް ކުރެއްވި ދެ ވަނަ ދަތުރުފުޅެކެވެ. މި ދަތުރުފުޅުގައި ސީރިއާގެ ޙާލަތު ރަނގަޅު ކުރުމަށް ފުޅާ ދާއިރާއެއްގައި ރަޝިޔާ އިން ދެމުން އަންނަ އެހީތެރިކަމާއި، އެއްބާރުލުން ފާހަގަ ކުރައްވައި، އަލް ޝަރާ ވަނީ ޕުޓިން އަށް ޝުކުރު އަދާ ކުރައްވައިފަ އެވެ. 

ސީރިއާގެ މަސްދަރުން ބުނެފައި ވަނީ އެ ބައްދަލުވުމުގައި މައިގަނޑު ގޮތެއްގައި މަޝްވަރާ ކުރައްވާފައި ވަނީ ޓާޓޫސް އާއި، ހުމައިމިންގައި ރަޝިޔާގެ ސިފައިންގެ ޙަރަކާތް ތަކުގެ ޙާލަތު އަލުން ކަނޑައެޅުމެވެ. އެގޮތުން އަލް އަސަދުގެ ވެރިކަން ވެއްޓުނު ފަހުން، އައު ފްރޭމްވާރކެއްގެ ދަށުން މި ހަރަކާތްތައް ދެމެހެއްޓުމަށް ރަޝިޔާ އިން މަސައްްކަތް ކުރަމުން އަންނަ ކަަމަށް ވަނީ ފާހަގަވެފަ އެވެ. 

މީގެ އިތުރުން އެ ބައްދަލުވުމުގައި އަލް ޝަރާ ވަނީ، އީރާން އަށް ހަަމަލާ ދީފި ނަމަ ދެން ކުރިމަތިވާނެ ނުރައްކާތަކާ ގުޅޭ ގޮތުން ވާހަކަ ދައްކަވާފައިވާ ކަމަށް ރިޕޯޓު ކޮށްފައިވެ އެވެ. އެމެރިކާ އިން، ނުވަތަ އިޒްރޭލް އިން އީރާން އަށް ހަމަލަ ދިނުމުން ކުރިމަތި ވެދާނެ ނުރައްކާތައް ކޮންޓްރޯލް ކުރުމަށް ސީރިއާ އިން ބޭނުންވާ ކަމަށް ވެސް ހާމަ ކޮށްފައިވެ އެވެ.