ރަޝިޔާ އިން ކަލާސް އާ ވާހަކަ އެއް ނުދައްކާނެ، މަޑު ކުރަނީ އޭނާ މަގާމުން ވަކިވަންދެން

ޔޫރަޕިއަން ޔޫނިއަން (އީޔޫ)ގެ ފޮރިން ޕޮލިސީގެ ވެރިޔާ ކާޖާ ކަލާސް އާ އެކު ރަޝިޔާ އިން އެއްވެސް ވާހަކަ އެއް ދައްކައި، އެއްވެސް މަޝްވަރާ އެއް ނުކުރާނެ ކަމަށް އެ ޤައުމުން ބުނެފި އެވެ. 

ރަޝިޔާގެ ސަރުކާރުގެ ޓީވީއާ ވާހަކަ ދައްކަވަމުން އެ ޤައުމުގެ ރިޔާސީ ގަނޑުވަރު، ކްރެމްލިންގެ ތަރުޖަމާނު ޑިމިޓްރީ ޕެސްކޮވް ވިދާޅުވީ، ކަލާސް އާ ރަޝިޔާ އިން އެއްވެސް ވާހަކައެއް ނުދައްކާނެ ކަމަށެވެ. އާދީއްތަ ދުވަހު ޕެސްކޮވް ވަނީ، ރަޝިޔާ އިން ކަލާސް އާ ވާހަކަ ދައްކާނީ ކިހިނެއްތޯ ސުވާލު އުފައްދަވައިފަ އެވެ. 

އެއްވެސް ފަރާތަކުން ކަލާސް އާ ވާހަކަ ނުދައްކާނެކަން ފާހަގަ ކުރައްވައި ޕެސްކޮވް ވިދާޅުވީ، އެމެރިކާ އިން ވެސް އެކަން ނުކުރާނެ ކަމަށެވެ. އެކަމަކީ ވަރަށް ސާފުކޮށް އެނގެން އޮތް ކަމެއް ކަށާއި، މަޑު ކުރަނީ ކަލާސް މަގާމުން ވަކިވަންދެން ކަމަށް ވެސް ޕެސްކޮވް ވިދާޅުވި އެވެ. ޕެސްކޮވް ވިދާޅުވީ އެއީ ރަޝިޔާ އަށް ކުރެވޭނެ ކަމެއް ކަމަށެވެ. 

ކާޖާ ކަލާސް އަކީ ޔޫރަޕިއަން ޔޫނިއަންގެ ފޮރިން ޕޮލިސީގެ މަސައްކަތްތައް ބަލަހައްޓަވަން ހުންނެވި އެންމެ އިސް ފަރާތެވެ. އޭނާ އަކީ އެސްޓޯނިއާގެ ކުރީގެ ބޮޑު ވަޒީރުކަން ވެސް ކުރައްވާފައިވާ ފަރާތެކެވެ. ކަލާސްއާ ވާހަކަ ނުދައްކާނެ ކަމަށް ރަޝިޔާ އިން ބުނެފައިވާއިރު، އޭނާ އަކީ ރަޝިޔާ އާއި އެ ޤައުމުގެ ސިޔާސަތު ތަކަށް ވަރަށް ފާޅުކަން ބޮޑު ގޮތެއްގައި ފާޑު ވިދާޅުވާ ބޭފުޅެކެވެ. 

ރަޝިޔާ އިން މިހެން ބުނެފައި މި ވަނީ، ޔޫރަޕާއި ރަޝިޔާއާ ދެމެދު ގުޅުން ވަރަށް ބޮޑަށް ގޯސްވެފައިވާ ދަނޑިވަޅެއްގަ އެވެ. ޔޫކްރެއިންއާ ދެކޮޅަށް ރަޝިޔާ އިން ފަށާފައިވާ ހަނގުރާމައިގެ ސަބަބުން، ޔޫރަޕާއި ރަޝިޔާއާ ދެމެދު އޮތީ ނުތަނަވަސްކަން ބޮޑުވެފަ އެވެ. އެއާ އެކު، ޔޫރަޕިއަން ޔޫނިއަން އިން ވަނީ ރަޝިޔާއާ ދެކޮޅަށް ވަރަށް ގިނަ އިޤްތިސާދީ ފިޔަވަޅު ތަކެއް އަޅައިފަ އެވެ. 

މީގެ ކުރިން ވެސް ރަޝިޔާގެ އިސްވެރިން ވަނީ ކަލާސް އަށް ފާޑު ވިދާޅުވެ ވާހަކަ ދައްކަވައިފަ އެވެ. ރަޝިޔާ އިން ބުނެފައި ވަނީ، ކަލާސް އަކީ އެ ޤައުމާ ދެކޮޅު ބޭފުޅެއް ކަމަށެވެ. އެހެންވެ، ރަޝިޔާ އިން އޭނާއާ އެއްވެސް ވާހަކައެއް ދައްކަން ބޭނުން ނުވާ ކަމަށް ބުނަމުން އާދެ އެވެ.