ޔޫކްރެއިންގެ ސުލްޙައިގެ މަޝްވަރާތައް، އެންމެ މައްސަލަ އަކަށް ކުޑައަޑި ވެއްޖެ: ވިޓްކޮފް

ރަޝިޔާ އާއި ޔޫކްރެެއިންއާ ދެމެދު ހިނގަމުން އަންނަ ހަނގުރާމަ ނިންމުމަށް ކުރަމުން އަންނަ މަޝްވަރާތައް، އެންމެ މައްސަލަ އަށް ކުޑައަޑި ވެފައިވާ ކަމަށް، އެމެރިކާގެ ޚާއްސަ މަންދޫބު ސްޓީވް ވިޓްކޮފް ވިދާޅުވެއްޖެ އެވެ. 

އެމެރިކާގެ ރައީސް ޑޮނަލްޑް ޓްރަމްޕްގެ ފަރާތުން މެދު އިރު މައްޗަށް ކަނޑައަޅުއްވާފައި ހުންނަވާ ޚާއްސަ މަންދޫބު ވިޓްކޮފް މިހެން ވިދާޅުވެފައި ވަނީ، ބުރާސްފަތި ދުވަހު ރަޝިޔާ އަށް ވަޑައިގެންނެވުމުގެ ކުރިންނެވެ. 

ސްވިޒަލެންޑުގެ ޑާވޯސްގައި ކުރިއަށް ދިޔަ ވޯލްޑް އިކޮނޮމިކް ފޯރަމްގެ ތެރެއިން، ޔޫކްރެއިންގެ މައްސަލައިގައި ވާހަކަ ދައްކަވަމުން ވިޓްކޮފް ވިދާޅުވީ، އެ މައްސަލަ އެންމެ މައްސަލަ އަށް ކުޑަ ކޮށްފައިވާނެ ކަމަށެވެ. އެ މައްސަލައިގައި އެކި ގޮތް ގޮތަށް މަޝްވަރާ ކޮށްފައިވާތީ، މިއީ ހައްލު ކުރެވޭނެ ކަމެއް ކަމަށް ވެސް އޭނާ ވިދާޅުވި އެވެ. އެގޮތުން ދެ ޤައުމުން ވެސް އެ މައްސަލަ ހައްލު ކުރަން ބޭނުންވާ ނަމަ، އެމެރިކާ އިން އެކަން ކޮށްދޭނެ ކަމަށް ވިޓްކޮފް ވިދާޅުވެފައިވެ އެވެ، 

ނަަމަވެސް، އެ ވާހަކަ ތަކުގެ އިތުރު ތަފްސީލެއް ވިޓްކޮފް ހާމަ ކުރައްވާފައި ނުވެ އެވެ. ބުރާސްފަތި ދުވަހުގެ ވަގުތެއްގައި ވިޓްކޮފް ރަޝިޔާ އަށް ވަޑައިގަންނަވާއިރު، އެ ދަތުރުގައި އެމެރިކާގެ ރައީސް ޓްރަމްޕްގެ ދަނބިދަރިކަލުން ޖެރާޑް ކުޝްނާ ވެސް ބައިވެރިވެ ވަޑައިގަންނަވަ އެވެ. މީގެ ކުރިން ވެސް ވިޓްކޮފް ވަނީ ރަޝިޔާގެ ވެރި ރަށް މޮސްކޯ އަށް ވަޑައިގެންފަ އެވެ. 

ހަނގުރާމަ ނިންމުމަށް ކުރިއަށް ގެންދަމުން އަންނަ މަޝްވަރާ ތަކާ ގުޅޭ ގޮތުން ވިޓްކޮފް ވިދާޅުވެފައި ވަނީ، އެ މަޝްވަރާތައް ވަރަށް ކާމިޔާބު ކަމަށާއި، އުންމީދީ ކަމަށެވެ. އަދި މަޝްވަރާތައް ވަރަށް ބޮޑަށް ކުރިއަށް ގޮސްފައިވާ ކަމަށާއި، ދެ ޤައުމުގެ ދެ މެދުގައި މިހާރު ހައްލު ކުރަން އޮތީ އެންމެ މައްސަލައެއް ކަމަށް ވެސް އޭނާ ވިދާޅުވި އެވެ. 

ރަޝިޔާ އާއި ޔޫކްރެއިންއާ ދެމެދު ހިނގަމުން އަންނަ ހަނގުރާމަ ހަތަރު ވަނަ އަހަރަަކަށް ގޮސްފައިވާއިރު، މި ހަނގުރާމަ ނިންމުމަކީ އެމެރިކާގެ ރައީސް ޓްރަމްޕްގެ ވަރަށް ބޮޑު ވައުދުފުޅެކެވެ. އެމެރިކާގެ ރިޔާސީ ދެ ވަނަ ދައުރަަކަށް ވަޑައިގެންނެވުމުގެ ކުރިން ވެސް، ޓްރަމްޕް ވަނީ އެ ހަނގުރާމަ ނިންމުމުގެ ވާހަކަ ވަރަށް ގިނައިން ދައްކަވައިފަ އެވެ.