ސުލްޙައިގެ ބޯޑުގައި ބައިވެރިވުމުގެ ދައުވަތު ޕުޓިން އަށް ދެއްވާފައިވާ ކަމަށް ޓްރަމްޕް ވިދާޅުވެއްޖެ

ސުލްޙައިގެ ބޯޑު ނުވަތަ ބޯޑު އޮފް ޕީސްގައި ބައިވެރިވުމުގެ ދައުވަތު، ރަޝިޔާގެ ރައީސް ވްލަޑިމިއަރ ޕުޓިން އަށް ދެއްވާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ދުނިޔޭގައި ހިނގަމުންދާ ހަނގުރާމަތައް ނިންމުމަށް، ނުވަތަ ޙައްލު ކުރުމަށް ޓްރަމްޕް ފައްޓަވާފައިވާ މަަސައްކަތުގެ ތެރެއިން ސުލްޙައިގެ ބޯޑު އުފައްދަވާފައިވާއިރު، ހޯމަ ދުވަހުގެ ރޭ ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ އެ ބޯޑުގައި ބައިވެރިވުމުގެ ދައުވަތު ޕުޓިން އަށް ދެއްވާފައިވާ ކަމަށެވެ. 

ޓްރަމްޕްގެ އިސް ނެންގެވުމުގެ މަތިން އުފައްދަވާފައިވާ މި ބޯޑުގައި ބައިނަލްއަޤުވާމީ ލީޑަރުން ހިމެނުމަށް ވެސް ޓްރަމްޕް ވަނީ ނިންމަވައިފަ އެވެ. މި ބޯޑުގެ މައިގަނޑު މަޤުސަދަކީ ދުނިޔޭގެ އެކި ކަންކޮޅު ތަކުގައި ހިނގަމުން އަންނަ ހަނގުރާމަ އާއި، ހަނގުރާމައިގެ ޙަރަކާތް ތަކަށް ޙައްލު ހޯދުމެވެ. 

ސުލްޙައިގެ ނަމުގައި ޓްރަމްޕް ބޯޑެއް އުފައްދަވާފައިވާއިރު، އޭނާ އަންނަނީ އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ އާއި، ރަޝިޔާ އާއި ޔޫކްރެއިންއާ ދެމެދު ހިނގަމުން އަންނަ ހަނގުރާމަ ވެސް ނިންމުމަށް މަސައްކަތް ކުރައްވަމުންނެވެ. ޣައްޒާ ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކޮށްފައި ވީ ނަމަވެސް، އިސްރާއީލް އިން އަންނަނީ އެ އެއްބަސްވުމާ ޚިލާފު ވަމުންނެވެ.

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ހަތަރު ވަަނަ އަހަރަކަށް ގޮސްފައިވާއިރު، އެ ހަނގުރާމަ އަކީ ދުނިޔޭގެ ސަލާމަތާއި ރައްކާތެރި ކަމަށް ބޮޑު ގޮންޖެހުމަކަށް ވަނީ ވެފަ އެވެ. އެ ހަނގުރާމަ އަށް ހައްލު ހޯދުމަށް ބައިނަލްއަޤުވާމީ މުޖުތަމައުން ވެސް އަންނަނީ ގިނަ މަސައްކަތް ތަކެއް ކުރަމުންނެވެ. 

ސުލްޙައިގެ ބޯޑުގައި ބައިވެރިވުމުގެ ދައުވަތު ޕުޓިން އަށް ދެއްވާފައިވާ ކަަމަށް ޓްރަމްޕް ވިދާޅުވުމާ އެކު، އެ ދައުވަތު ޕުޓިން ޤަބޫލު ކޮށްފައިވޭތޯ ނޫސްވެރިން ވަނީ ސުވާލު ކޮށްފަ އެވެ. ނަމަވެސް، އެ ސުވާލަށް ސީދާ ޖަވާބެއް ދެއްވުމުގެ ބަދަލުގައި ޓްރަމްޕް ވިދާޅުވީ، ޕުޓިން އަށް ދައުވަތު ދެއްވާފައިވާ ކަަމަށެވެ. 

ބައިނަލްއަޤުވާމީ ސިޔާސީ ތަޖުރިބާކާރުން ބުނާ ގޮތުގައި، މިއީ ރަޝިޔާ އާއި އެމެރިކާއާ ދެމެދު އޮތް ގުޅުން ރަނގަޅު ކުރުމަށް ޓްރަމްޕް ނަންގަވާފައިވާ ފިޔަވަޅެކެވެ. މީގެ އިތުރުން، އެކަމުގެ ސަބަބުން އިތުރު ސުލްޙަ އަކަށް މަގު ފަހި ވެގެން ދާނެ ކަމަށް ވެސް ބައެއް ފަރާތްތަކުން ފާހަގަ ކޮށްފައިވެ އެވެ. 

ނަމަވެސް، ޔޫކްރެއިންއާ ދެކޮޅަށް ރަޝިޔާ އިން ހަނގުރާމަ ކުރަމުން އަންނައިރު، އަދި ޔޫކްރެއިން އަށް ބޮޑެތި ގެއްލުން ތަކެއް ދެމުން އަންނައިރު، ސުލްޙައިގެ ބޯޑުގައި ޕުޓިން ހިމަނަން ދައުވަތު ދިނުމުން ބައެއް ފަރާތްތަކުން ފާޑު ކިޔުން ވެސް އަމާޒު ކޮށްފައިވެ އެވެ.