އީރާން އިން އޮތީ އެމެރިކާ އާއެކު އިންސާފުވެރި މަޝްވަރާ ތަކަށް ތައްޔާރަށް

އެމެރިކާ އާއެކު އިންސާފުވެރި އަދި ހަމަހަމަ މަޝްވަރާ ތަކެއް ކުރިއަށް ގެންދިޔުމުގެ މަސައްކަތް ކުރުމަށް އީރާންގެ ޚާރިޖީ ވަޒީރަށް، އެ ޤައުމުގެ ރައީސް މަސްއޫދު ޕެޒެޝްކިއާން އަންގަވައިފި އެވެ. 

އީރާން އާއި އެމެރިކާއާ ދެމެދު މަޝްވަރާތައް ކުރިއަށް ގެންދިޔުމަށް ތުރުކީ އިން އިސް ނަގާނެ ކަމަށް ބުނެފައިވާއިރު، މިއީ އެކަމާ ގުޅޭ ގޮތުން އީރާންގެ ރައީސް ޕެޒެޝްކިއާން ވާހަކަ ދެއްކެވި ފުރަތަމަ ފަހަރުކަން ވެސް ފާހަގަ ކޮށްލެވެ އެވެ. 

އަންގާރަ ދުވަހު އެކްސްގައި ކުރެއްވި ޕޯސްޓެއްގައި ޕެޒެޝްކިއާން ވިދާޅުވީ، ބިރު ދެއްކުމާއި، ހަމަޖެހޭ އުސޫލު ތަކުން ބޭރުން އުންމީދެއް ނެތް ކަމަށެވެ. އަދި އެކަށީގެންވާ މާހައުލެއް އޮތް ނަމަ، އެމެރިކާ އާއެކު މަޝްވަރާ ކުރުމަށް ޚާރިޖީ ވަޒީރު އައްބާސް އަރާގްޗީ އަށް އަންގަވާފައިވާނެ ކަމަށް ވެސް އޭނާ ވިދާޅުވެފައިވެ އެވެ. 

މީގެ އިތުރުން ޕެޒެޝްކިއާން ވިދާޅުވީ، އެ މަޝްވަރާ ތަކަކީ އިހުތިރާމާއި، ބުއްދިވެރިކަމާއި، އަދި މަސްލަހަތު ތަކަށް އިސްކަންދޭ އުސޫލު ތަކުގެ މައްޗަށް ބިނާވެފައިވާ އިންސާފުވެރި މަޝްވަރާ ތަކަކަށް ވެސް ވާން ޖެހޭނެ ކަމަށެވެ. އީރާން އިން މީގެ ކުރިން ބުނެފައި ވަނީ، އެމެރިކާ އިން ހުށަހަޅާ ކޮންމެ ހުށަހެޅުމަކަށް އެ ޤައުމުން އެއްބަސް ނުވާނެ ކަމަށެވެ. 

މަސްރަހު ދިރާސާ ކުރާ ފަރާތްތަކުން ބުނެފައިވާ ގޮތުގައި، އީރާންގެ ރައީސް ޕެޒެޝްކިއާންގެ މި ވާހަކަ ތަކުގެ ސަބަބުން އެ ޤައުމުގެ ޚާރިޖީ ސިޔާސަތަށް ބަދަލު ތަކެއް އަތުވެދާނެ އެވެ. ޚާއްސަކޮށް އީރާންގެ އިޤްތިޞާދަށް ކުރިމަތިވެފައިވާ ދަތި ތަކުން އަރައި ގަތުމަށްޓަކައި ހުޅަނގުގެ ޤައުމު ތަކާ އެކު އޮންނަ ގުޅުން ރަނގަޅު ކުރުމަކީ، ޕެޒެޝްކިއާން އާއި ސަރުކާރުގެ މުހިންމު އަމާޒެއް ކަމަށް މާހިރުން ފާހަގަ ކޮށްފައިވެ އެވެ. 

އެމެރިކާ އާއި، އީރާންއާ ދެމެދު އޮންނަ ގުޅުން ފާއިތުވި އަހަރު ތަކުގައި ވަރަށް ބޮޑަށް ގޯސްވެފައިވާއިރު، ދެ ޤައުމުގެ ދެމެދުގައި އޮތް ނިއުކްލިއާ އެއްބަސްވުމުން އެމެރިކާ ވަކިވި ފަހުން ދެ ޤައުމުގެ ދެ މެދުގައި ރަސްމީ ގޮތުން ސީދާ މަޝްވަރާ ތަކެއް ކުރިއަށް ގެންދެވިފައި ނުވެ އެވެ.