އިޒްރޭލުން ލުބުނާނަށް ވަރުގަދަ ވައިގެ ހަމަލާތަކެއް ދީފި
އިޒްރޭލާއި ހިޒްބުﷲ އާ ދެމެދު ހަމަލާބަދަލުކުރުން ހުއްޓާލުމުގެ އެއްބަސްވުމެއް ގާއިމުކޮށްފައިވީ ނަމަވެސް، އިޒްރޭލުން ދަނީ އެއްބަސްވުމާ ޚިލާފަށް ލުބުނާނުގެ ދެކުނުގެ ސަރަހައްދުތަކަށް އަސްކަރީ ހަމަލާތައް ދެމުން. މި ހަމަލާތަކުގެ ސަބަބުން މަސްލަހަތު އިތުރަށް ގޯސްވެދާނެތީ ބައިނަލްއަގުވާމީ މުޖުތަމައުން ދަނީ ކަންބޮޑުވުން ފާޅުކުރަމުން.
އިޒްރޭލުގެ ހަނގުރާމަމަތީ ބޯޓުތަކުން ލުބުނާނުގެ ދެކުނުގެ އަވަށްތަކަށް ދިން ވައިގެ ހަމަލާ. | އޭޕީ
އިޒްރޭލުގެ އަސްކަރިއްޔާއިން ލުބުނާނުގެ ދެކުނުގައިވާ ކަފްރް ތިބްނިތް އަވަށަށް ވަރުގަދަ ވައިގެ ހަމަލާތަކެއް ދީފިއެވެ. މި ހަމަލާތައް ދީފައިވަނީ އެ އަވަށުގައި ހުރި ބައެއް އިމާރާތްތަކަކީ ހިޒްބުﷲ ޖަމާއަތާ ގުޅުންހުރި ތަންތަން ކަމަށް ބުނެ، އެ ތަންތަން ހުސްކުރުމަށް އިޒްރޭލު ސިފައިން އަމުރު ނެރުނުތާ ކުޑަ ވަގުތުކޮޅެއްގެ ތެރޭގައެވެ.
މިދިޔަ ނޮވެމްބަރު މަހުގެ ތެރޭގައި އިޒްރޭލާއި ހިޒްބުﷲ އާ ދެމެދު އެއް އަހަރަށްވުރެ ގިނަ ދުވަހަށް ދެމިގެންދިޔަ ކުރިމަތިލުންތަކާއި، ދެ މަސް ދުވަހުގެ ހަނގުރާމައަށްފަހު ހަމަލާބަދަލުކުރުން ހުއްޓާލުމުގެ އެއްބަސްވުމެއް ގާއިމުކުރެވުނު ނަމަވެސް، އިޒްރޭލުން ދަނީ އަދިވެސް ލުބުނާނަށް ހަމަލާތައް ދެމުންނެވެ. މި އެއްބަސްވުމުގެ މަގުސަދަކީ ސަރަހައްދީ ހަމަޖެހުން ގާއިމުކުރުން ކަމުގައި ވިޔަސް، އިސްރާއީލުން ބުނަމުންދަނީ ހިޒްބުﷲ އިން އެއްބަސްވުމާ ޚިލާފުވާ ކޮންމެ ހިނދެއްގައި ރައްދު ހަމަލާ ދޭނެ ކަމަށެވެ.
މީގެ އިތުރުން، އިޒްރޭލު ސިފައިން އަދިވެސް ދަނީ ލުބުނާނުގެ ދެކުނުގެ ފަސް ސަރަހައްދެއްގައި ފައިތިލަ ސާބިތުކޮށްގެން ތިބެމުންނެވެ. އިޒްރޭލުން ބުނާ ގޮތުގައި މި ސަރަހައްދުތަކަކީ އެ ގައުމުގެ ސަލާމަތަށްޓަކައި މުހިންމު ސަރަހައްދުތަކެކެވެ. މިކަމުގެ ސަބަބުން ލުބުނާނުގެ އާންމު ރައްޔިތުންގެ މެދުގައި ބިރުވެރިކަން އުފެދި، ގިނަ ބަޔަކު ދަނީ އެ ސަރަހައްދުތައް ދޫކޮށް ރައްކާތެރި ހިސާބުތަކަށް ހިޖުރަކުރަމުންނެވެ.
އިޒްރޭލުން ދެމުންދާ މި ހަމަލާތަކާ ގުޅިގެން ބައިނަލްއަގުވާމީ މުޖުތަމައުން ދަނީ ކަންބޮޑުވުން ފާޅުކުރަމުންނެވެ. ޚާއްސަކޮށް ހަމަލާބަދަލުކުރުން ހުއްޓާލުމުގެ އެއްބަސްވުމަށް އިހުތިރާމް ކުރުމަށާއި، މަސްލަހަތު އިތުރަށް ގޯސްވިޔަ ނުދިނުމަށް އެކުވެރި ދައުލަތްތަކުންނާއި ދުނިޔޭގެ ބޮޑެތި ބާރުތަކުން ދަނީ ގޮވާލަމުންނެވެ. ނަމަވެސް، އިޒްރޭލުން ބުނަމުންދަނީ އެ ގައުމުގެ ރައްޔިތުންގެ ސަލާމަތަށް ނުރައްކާވާ ކޮންމެ ހާލަތެއްގައި އަސްކަރީ ފިޔަވަޅު އަޅާނެ ކަމަށެވެ.
އީރާނުގެ މަދަދުލިބޭ ހިޒްބުﷲ ޖަމާއަތާއި އިޒްރޭލާ ދެމެދު ހިނގަމުންދާ މި ހަމަނުޖެހުންތަކުގެ ސަބަބުން ލުބުނާނުގެ ދެކުނުގެ ގިނަ އަވަށްތަކަކަށް ވަނީ ބޮޑެތި ގެއްލުންތަކެއް ލިބިފައެވެ. ކަފްރް ތިބްނިތް އަވަށަށް ދިން މި ހަމަލާއަކީ ވެސް އެ ސަރަހައްދުގައި ހިޒްބުﷲގެ ހަރަކާތްތައް ހުއްޓުވުމުގެ ނަމުގައި ދިން ހަމަލާއެއް ކަމަށް އިސްރާއީލުން ވަނީ ހާމަކޮށްފަ އެވެ.
މަސްދަރު: AP
