އީރާނާ ގުޅޭ ގޮތުން އެމެރިކާ އާއި އިޒްރޭލުގެ ޖެނެރަލުން ބައްދަލުކޮށްފި

އީރާނާއެކު އޮތް މަސްރަހު ވަރަށް ބޮޑަށް ގޯސްވެފައިވާ ދަނޑިވަޅެއްގައި، އެމެރިކާ އާއި އިޒްރޭލުގެ އަސްކަރިއްޔާގެ އެންމެ އިސް ޖެނެރަލުން މިދިޔަ ހުކުރު ދުވަހު ޕެންޓަގަންގައި ބައްދަލުކޮށް މަޝްވަރާ ކޮށްފައިވާ ކަމަށް އެމެރިކާގެ ދެ އޮފިޝަލަކު ރޮއިޓާސްއަށް މައުލޫމާތު ދީފިއެވެ. ނަން ހާމަނުކުރުމަށް އެދި އެ އޮފިޝަލުން މި މައުލޫމާތު ހިއްސާކޮށްފައިވަނީ އާދީއްތަ ދުވަހުއެވެ.

އެމެރިކާގެ ޖޮއިންޓް ޗީފްސް އޮފް ސްޓާފްގެ ޗެއާމަން ޖެނެރަލް ޑޭން ކޭން އާއި އިޒްރޭލުގެ އަސްކަރިއްޔާގެ ޗީފް އޮފް ސްޓާފް އިޔާލް ޒާމިރު ބޭއްވި މި ސިއްރު ބައްދަލުވުމާ ގުޅޭ އިތުރު ތަފްސީލެއް އޮފިޝަލުން ހާމައެއް ނުކުރެއެވެ. މީގެ ކުރިން މި ބައްދަލުވުމުގެ އެއްވެސް މައުލޫމާތެއް މީޑިއާއަށް ތިލަވެފައެއް ނުވެއެވެ.

އީރާނު މަޝްވަރާގެ މޭޒަށް ގެނައުމަށް ބާރު އެޅުމުގެ ގޮތުން ރައީސް ޑޮނަލްޑް ޓްރަމްޕް ތަކުރާރުކޮށް އިންޒާރު ދެއްވަމުން، އެމެރިކާއިން ވަނީ މެދުއިރުމަތީގައި އެ ގައުމުގެ ކަނޑުގެ ސިފައިންގެ ބާރު ވަރުގަދަކޮށް، ވައިގެ ދިފާއީ ނިޒާމުތައް އިތުރަށް ވަރުގަދަކޮށްފައެވެ.

އެމެރިކާއިން އީރާނަށް ހަމަލާއެއް ދީފިނަމަ، މުޅި ސަރަހައްދީ ހަނގުރާމައެއް ފެށިދާނެ ކަމުގެ އިންޒާރު އީރާނުގެ ލީޑަޝިޕުން އާދީއްތަ ދުވަހު ވަނީ ދީފައެވެ.