އީރާން އާއެކު މިހާރު ވެސް މަޝްވަރާތައް ކުރިއަށްދޭ: ޓްރަމްޕް
ޓްރަމްޕް ވިދާޅުވީ، މީގެ ކުރިން ވެސް މަޝްވަރާ ކުރާނެ ފުރުސަތު އީރާން އަށް ލިބުނު ކަމަށް. ނަމަވެސް އެކަން ކާމިޔާބުވެފައި ނުވާ ކަމަށް ފާހަގަ ކުރައްވައި ޓްރަމްޕް ވިދާޅުވީ، އެމެރިކާ އިން މީގެ ކުރިން ކުރިއަށް ގެންދިޔަ މިޑްނައިޓް ހެމާ އޮޕަރޭޝަން ފަދަ ޙަރަކާތެއް އަލުން ތަކުރާރުވާން އީރާން އިން ބޭނުން ވާނެ ކަމަށް ޤަބޫލު ނުކުރެވޭ ކަމަށް.
އެމެރިކާގެ ވައިޓް ހައުސްގައި 2026، ފެބްރުއަރީ މަހުގެ 3 ވަނަ ދުވަހު، ސަރުކާރުގެ ބައެއް އިދާރާތައް ބަންދުކޮށްފައި އޮތް އޮތުން ނިމުމަކަށް ގެނައުމުގެ ބިލުގައި ރައީސް ޑޮނަލްޑް ޓްރަމްޕް ސޮއިކުރެއްވުމަށްފަހު އިޝާރާތް ކުރައްވަނީ. މި ރަސްމިއްޔާތުގައި އެމެރިކާގެ ހައުސް ސްޕީކަރު މައިކް ޖޯންސަން އާއި، ސެނެޓަރު ޝެލީ މުއާ ކެޕިޓޯގެ އިތުރުން ސެނެޓަރު ޖޯން ބަރާސޯ ބައިވެރިވެވަޑައިގެން އަތްތިލަބަޑި ޖައްސަވަނީ. | ރޮއިޓާސް
އެމެރިކާ އިން މިހާރު ވެސް އަންނަނީ އީރާން އާއެކު މަޝްވަރާތައް ކުރިއަށް ގެންދަމުން ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓްރަމްޕް މިހެން ވިދާޅުވެފައި ވަނީ، ތުރުކީގެ ވެރި ރަށް އިސްތަމްބޫލުގައި މަޝްވަރާތައް ކުރިއަށް ގެންދިޔުމުގައި ބަދަލުގައި އޮމާންގައި މަޝްވަރާތައް ބޭއްވުމާއި، މަޝްވަރާ ކުރެވޭ ދާއިރާ ހަނި ކުރުމަށް އީރާން އިން އެދިފައިވާ ދަނޑިވަޅެއްގަ އެވެ.
އެމެރިކާގެ ރިޔާސީ ގަނޑުވަރު، ވައިޓް ހައުސްގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ އީރާން އިން ބޭނުން ވަނީ ކޮންމެ ވެސް ކަމެއް ޙާސިލު ކުރަން ކަމަށެވެ. އެކަމާ ގުޅޭ ގޮތުން ދެ ޤައުމުގެ ދެ މެދުގައި ވާހަކަ ދެކެވެމުން އަންނަ ކަމަށް ވެސް ޓްރަމްޕް ވިދާޅުވި އެވެ. އެހެން ނަމަވެސް، މި ހަފުތާގެ ފަހު ކޮޅު ބޭއްވުމަށް ހަމަޖެހިފައިވާ މަޝްވަރާ ބައްދަލުވުންތައް ބާއްވާނެ ވަކި ތަނެއް ހާމަ ކުރެއްވުމަށް ޓްރަމްޕް ވަނީ އިންކާރު ކުރައްވައިފަ އެވެ.
އިތުރަށް ވާހަކަ ދައްކަވަމުން ޓްރަމްޕް ވިދާޅުވީ، މީގެ ކުރިން ވެސް މަޝްވަރާ ކުރާނެ ފުރުސަތު އީރާން އަށް ލިބުނު ކަމަށެވެ. ނަމަވެސް އެކަން ކާމިޔާބުވެފައި ނުވާ ކަމަށް ފާހަގަ ކުރައްވައި ޓްރަމްޕް ވިދާޅުވީ، އެމެރިކާ އިން މީގެ ކުރިން ކުރިއަށް ގެންދިޔަ މިޑްނައިޓް ހެމާ އޮޕަރޭޝަން ފަދަ ޙަރަކާތެއް އަލުން ތަކުރާރުވާން އީރާން އިން ބޭނުން ވާނެ ކަމަށް ޤަބޫލު ނުކުރެވޭ ކަމަށެވެ. އެހެންކަމުން، މިހާރު އީރާން އިން ބޭނުން ވަނީ މަޝްވަރާގެ މޭޒަށް އަންނަން ކަމަށާއި، އެ މަސައްކަތް މިހާރު ވެސް ކުރިއަށް ގެންދެވޭ ކަމަށް ޓްރަމްޕް ވިދާޅުވެފައިވެ އެވެ.
އެމެރިކާ އާއި އީރާންއާ ދެމެދު މަޝްވަރާ ބައްދަލުވުން ތަކެއް ބޭއްވުމަށް ތައްޔާރު ވަމުން އަންނައިރު، އެ ބައްދަލުވުން އޮންނާނެ ތަނަކާ ގުޅޭ ގޮތުން ނޫސްވެރިން ސުވާލު ކުރުމުން ޓްރަމްޕް ވިދާޅުވީ، މިވަގުތު އެކަން ހާމަ ކުރެވެން ނެތް ކަމަށެވެ. ނަމަވެސް، އެއީ ހަމައެކަނި އެންމެ ބައްދަލުވުމެއް ނޫން ކަމަށާއި، އެއަށް ވުރެ ގިނަަ ބައްދަލުވުން ތަކެއް ބޭއްވުމަށް ހަމަޖެހިފައިވާ ކަމަށް ޓްރަމްޕް ވިދާޅުވި އެވެ،
އެމެރިކާ އާއި އީރާންއާ ދެމެދު ނުތަނަވަސްކަން ބޮޑުވެފައިވާ ދަނޑިވަޅެއްގައި، ދެ ޤައުމުގެ ދެ މެދުގައި ސީދާ މަޝްވަރާ ތަކެއް ފެށުމަކީ ސަރަހައްދީ މަސްލަޙަތަށް އުޅޭ މުހިންމު ފިޔަވަޅެއްގެ ގޮތުގައި މަސްރަހު ދިރާސާ ކުރާ ފަރާތްތަކުން ދެކެ އެވެ. ނަމަވެސް، މަޝްވަރާ ބައްދަލުވުން އޮންނާނެ ތަނަކާއި، މަޝްވަރާ ކުރުމަށް ހަމަޖެހިފައިވާ މައުޟޫއު އަދި އެހެން ކަންކަމުގައި ވެސް ޚިޔާލު ތަފާތުވުން ތަކެއް އެބަ ހުއްޓެވެ.
މަސްދަރު: އަލް އަރަބިއްޔާ
