ރަޝިޔާގެ ތެޔޮ ގަތުން ހުއްޓާލާނެ ކަމަށް މޯދީ ވައުދުވެއްޖެ: ޓްރަމްޕް

އެމެރިކާ އާއި އިންޑިއާއާ ދެމެދު ވިޔަފާރީގެ އެއްބަސްވުމެއް އިއުލާން ކޮށްފައިވާއިރު، ޔޫކްރެއިންއާ ދެކޮޅަށް ކުރަމުން އަންނަ ހަނގުރާާމައާ ގުޅިގެން ރަޝިޔާގެ ތެޔޮ ގަތުން ހުއްޓާލުމަށް އިންޑިއާގެ ބޮޑު ވަޒީރު ނަރެންދްރަ މޯދީ ވައުދުވެ ވަޑައިގެންފައިވާ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ޓްރަމްޕް ވިދާޅުވީ އިންޑިއާގެ ބާވަތް ތަކަށް ކުރިން ނަގަން ނިންމާފައިވާ ޓެރިފްތައް ދަށްކޮށްފައިވާ ކަމަށާއި، އެގޮތުން މިހާރު ނަގާނީ 18 އިންސައްތަ ޓެރިފް ކަމަށެވެ. މީގެ ކުރިން ޓްރަމްޕް ވަނީ އިންޑިއާގެ މުދަލުން 50 އިންސައްތައާ ހަމަށް ޓެރިފް ނެގުމަށް ނިންމަވައިފަ އެވެ. އެންމެ ފުރަތަމަ 25 އިންސައްތައިގެ ޓެރިފްއެއް ނެގުމަށް ނިންމި ނަމަވެސް، އިންޑިއާ އިން ރަޝިޔާގެ ތެޔޮ ގަންނަ މައްސަލައިގައި ޓްރަމްޕް ވަނީ އިތުރު 25 އިންސައްތަ ޓެރިފް ބޮޑު ކުރައްވައިފަ އެވެ. 

ހޯމަ ދުވަހު އިންޑިއާގެ ބޮޑު ވަޒީރު މޯދީ ވިދާޅުވީ، ޓްރަމްޕް އާއެކު ވަރަށް ކާމިޔާބު ފޯނު ކޯލު މަޝްވަރާ ތަކެއް ކުރައްވާފައިވާ ކަމަށެވެ. އަދި އިންޑިއާގެ މުދަލުން ނަގަން ނިންމާފައިވާ ޓެރިފް ދަށް ކުރުމަށް ޓްރަމްޕް ނިންމަވާފައިވާތީ، އެކަމަށް ޝުކުރު އަދާ ކުރައްވާ ކަމަށް ވެސް މޯދީ ވިދާޅުވެފައިވެ އެވެ. އެހެން ނަމަވެސް، ރަޝިޔާގެ ތެޔޮ ގަތުން ހުއްޓާލުމަށް މޯދީ ވައުދުވެ ވަޑައިގެންފައިވާ ކަމަށް ޓްރަމްޕް ވިދާޅުވި ވާހަކަ އަށް، މޯދީ އެއްވެސް އެއްޗެއް ވިދާޅުވެފައި ނުވެ އެވެ. 

ރަޝިޔާގެ ތެޔޮ ގަތުން ގިނަ ޤައުމު ތަކުން ހުއްޓާލި ނަމަވެސް، އިންޑިއާ އިން ވަނީ ރަޝިޔާއާ އެކު އެ ވިޔަފާރި ކުރިއަށް ގެންދަން ނިންމައިފަ އެވެ. ރަޝިޔާގެ ތެޔޮ ގަތުން ހުއްޓާ ނުލަން އިންޑިއާ އިން ނިންމުމުން، މައްސަލަ ވަރަށް ބޮޑުވެގެން ދިޔަ އެވެ. އެމެރިކާ އިން ބުނެފައި ވަނީ، ރަޝިޔާ އިން ތެޔޮ ގަތުމުން އެ ފައިސާ އެ ޤައުމުން ބޭނުން ކުރަނީ ޔޫކްރެއިންއާ ދެކޮޅަށް ކުރާ ހަނގުރާމައިގައި ހަމަލާ ދިނުމަށެވެ. 

ޓްރަމްޕް ވިދާޅުވީ އިންޑިއާގެ ބޮޑު ވަޒީރު މޯދީ އަކީ އޭނާގެ ވަރަށް ގާތް ރަޙުމަތްތެރިއެއް ކަމަށެވެ. މޯދީ އަށް ވަރަށް ބޮޑު އިޙުތިރާމެއް އޮންނަ ކަމަށާއި، މޯދީގެ އެދުމުގެ މަތިން އިންޑިއާ އާއެކު ވިޔަފާރީގެ އެއްބަސްވުމެއް ޤާއިމު ކުރުމަށް އެމެރިކާ އިން ނިންމީ ކަމަށް ވެސް ޓްރަމްޕް ވަނީ ވިދާޅުވެފަ އެވެ. އެއާ އެކު އޭނާ ވިދާޅުވީ، ރަޝިޔާ އިން ތެޔި ގަތުމުގެ ބަދަލުގައި، އެމެރިކާ އާއި ވެނެޒުއެލާ އިން ތެޔޮ ގަތުމަށް މޯދީ އެއްބަސްވެ ވަޑައިގެންފައިވާ ކަމަށެވެ.