ޚާމަނާއީގެ އިންޒާރާ އެކު، ޓްރަމްޕް ވިދާޅުވީ އީރާންއާ އެކު އެއްބަސްވުމަކަށް އުންމީދު ކުރައްވާ ކަމަށް

އީރާން އާއެކު އެއްބަސްވުމަކަށް އާދެވޭނެ ކަމަށް އުންމީދު ކުރައްވާ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވެފައި ވަނީ، އީރާންއާ ދެކޮޅަށް އެމެރިކާ އިން އެއްވެސް ހަމަލާއެއް ދީފި ނަމަ، މުޅި ސަރަހައްދުގައި ހަނގުރާމަ ފެތުރިގެން ދާނެ ކަމަށް އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ ވިދާޅުވެފައި ވަނިކޮށެވެ. އާދީއްތަ ދުވަހުގެ ވަގުތެއްގައި ނޫސްވެރިންނާ ވާހަކަ ދައްކަވަމުން ޓްރަމްޕް ވަނީ، އީރާންއާ ގުޅޭ ގޮތުން އެމެރިކާ އިން ގެންގުޅެމުން އަންނަ ސިޔާސަތާ ގުޅޭ ގޮތުން ވާހަކަ ދައްކަވައިފަ އެވެ. 

ޚާމަނާއީ ދެއްވި އިންޒާރާ ގުޅޭ ގޮތުން ނޫސްވެރިން ސުވާލު ކުރުމުން ޓްރަމްޕް ވިދާޅުވީ، ޚާމަނާއީ އެފަދަ ވާހަކައެއް ދައްކަވާނެކަން ކުރިން ވެސް އެނގިވަޑައިގަންނަވާ ކަމަށެވެ. އަދި އޭނާގެ އުންމީދަކީ އީރާން އާއެކު އެއްބަސްވުމަކަށް އާދެވުން ކަމަށް ޓްރަމްޕް ވިދާޅުވި އެވެ. ނަމަވެސް، އެއްބަސްވުމަކަަށް ނާދެވިއްޖެ ނަމަ، ޚާމަނާއީގެ އިންޒާރަކީ ތެދެއްތޯ، ނުވަތަ ނޫންތޯ ފެނިގެން ދާނެ ކަމަށް ވެސް ޓްރަމްޕް ވަނީ ވިދާޅުވެފަ އެވެ. 

އެމެރިކާާ އިން ޝަރުތު ކުރާ ހުރިހާ ގޮތަކަށް ރުހިގެން، ނިއުކްލިއާ އެއްބަސްވުމަކަށް އައުމަށް އީރާން އިން އަންނަނީ ދެކޮޅު ހަދަމުންނެވެ. އެއާ އެކު، އެމެރިކާގެ އިންޒާރު އީރާން އަށް އަމާޒު ކޮށްފައިވާއިރު، އެމެރިކާ އިން ވަނީ އީރާންއާ ދިމާލަށް އަސްކަރީ ފައުޖެއް ވެސް ފޮނުވައިފަ އެވެ. އީރާން އިން އެއްބަސްވުމަކަށް އައުމަށް ދެކޮޅު ހަދާ ނަމަ، އަސްކަރީ ގޮތުން ފިޔަވަޅު އަޅާނެ ކަމަށް ވިދާޅުވެ، ޓްރަމްޕް ގެންދަވަނީ ތަކުރާރުކޮށް އިންޒާރު ދެއްވަމުންނެވެ. 

އީރާންގެ އިޤްތިޞާދީ ޙާލަތު ދަށްވެ، ފައިސާގެ އަގު ވެއްޓުމާ ގުޅިގެން، 2025 ވަނަ އަހަރުގެ ޑިސެމްބަރު މަހުގެ ތެރޭގައި އެ ޤައުމުގައި ވަނީ ސަރުކާރާ ދެކޮޅަށް މުޒާހަރާތައް ކުރިއަށް ގެންގޮސްފަ އެވެ. ސުލްޙަވެރިކަމާ އެކު ފެށުނު މުޒާހަރާތައް ފަހުން ވަނީ، ސިޔާސީ ކުލަ ޖެހި، ސިޔާސީ ޙަރަކާތަކަށް ބަދަލުވެފަ އެވެ. މިއީ 1979 ވަނަ އަހަރުގެ އިސްލާމީ އިންޤިލާބަށް ފަހު، އެ ޤައުމުގެ ސަރުކާރަށް ކުރިމަތިވި އެންމެ ބޮޑު ގޮންޖެހުމެވެ. ނަމަވެސް، އީރާންގެ ސަރުކާރުން ވަނީ މުޒާހަރާތައް ކޮންޓްރޯލް ކޮށްފަ އެވެ. 

މުޒަހަރާގެ ބައިވެރިންނާ ދެކޮޅަށް އީރާން އިން ބާރުގެ ބޭނުން ކޮށްފައިވާ ކަމަށް ބުނެ، އެމެރިކާ އިން އިންޒާރު ދެމުން އަންނަތާ ދުވަސް ތަކެއް ވެއްޖެ އެވެ. އާދީއްތަ ދުވަހު ޚާމަނާއީ ވިދާޅުވީ، އެމެރިކާ އިން އީރާން އަށް ހަމަލާ ދީފ ނަމަ، މުޅި ސަރަހައްދު ހަނގުރާމަ އަށް ބަދަލު ވާނެ ކަމަށެވެ. އަދި އީރާާންގައި ކުރި މުޒާހަރާ ތަކަކީ އެމެރިކާ އާއި އިޒްރޭލް އަޑީގައި އޮވެ ގެންނަން އުޅުނު ބަޣާވާތެއް ކަމަށް ވެސް ޚާމަނާއީ ވަނީ ވިދާޅުވެފަ އެވެ.