ޓްރަމްޕްގެ ޚާއްޞަ މަންދޫބު އާއި އީރާނުގެ ވަޒީރު ހުކުރު ދުވަހު ބައްދަލުކުރައްވަނީ
މަޝްވަރާތައް އަލުން ފެށުމަށް ރައީސް ޓްރަމްޕް ވަނީ ތިން ޝަރުތެއް ކުރިމަތިކުރައްވާފައި. މީގެ ތެރޭގައި ޔުރޭނިއަމް މުއްސަނދިކުރުން ހުއްޓާލުމާއި މިސައިލް ޕްރޮގްރާމް ހަނިކުރުން ހިމެނޭއިރު، މިސައިލް ޕްރޮގްރާމަށް ހުރަސްއެޅުމަކީ އެ ގައުމުން ބޮޑު ކަންބޮޑުވުމެއްގެ ގޮތުގައި ދެކޭ ކަމެއް.
އެމެރިކާގެ ޚާއްޞަ މަންދޫބު ސްޓީވް ވިޓްކޮފް (ވ) އަދި އީރާނުގެ ޚާރިޖީ ވަޒީރު އައްބާސް އަރަގްޗީ. | އޭއެފްޕީ
އެމެރިކާގެ ރައީސް ޑޮނަލްޑް ޓްރަމްޕްގެ ޚާއްޞަ މަންދޫބު ސްޓީވް ވިޓްކޮފް އާއި އީރާނުގެ ޚާރިޖީ ވަޒީރު އައްބާސް އަރަގްޗީ، ނިއުކްލިއާ އެއްބަސްވުމަކާ ގުޅޭގޮތުން މަޝްވަރާކުރެއްވުމަށް އަންނަ ހުކުރު ދުވަހު ތުރުކީވިލާތުގެ އިސްތަންބޫލްގައި ބައްދަލުކުރައްވާނެ ކަމަށް ބެލެވޭ ކަމަށް، މިކަމުގެ މަޢުލޫމާތު ހުރި ދެ މަސްދަރަކާ ހަވާލާދީ އެކްސިއޯސް ނޫހުން ހޯމަ ދުވަހު ރިޕޯޓުކޮށްފި އެވެ.
މީގެ އިތުރުން، އީރާނުގެ އިސް އޮފިޝަލަކާއި ހުޅަނގުގެ ޑިޕްލޮމެޓަކާ ހަވާލާދީ ރޮއިޓާސް ނިއުސް އެޖެންސީން ވެސް ވަނީ، ކުރިއަށް އޮތް ދުވަސްތަކުގައި ވިޓްކޮފް އާއި އަރަގްޗީ ތުރުކީވިލާތުގައި ބައްދަލުކުރައްވައިފާނެ ކަމަށް ހޯމަ ދުވަހުގެ ކުރީކޮޅު ރިޕޯޓުކޮށްފައެވެ.
މި ބައްދަލުވުން ބޭއްވުމަށް ތައްޔާރުވަމުން ދާއިރު އެމެރިކާގެ ކަނޑުގެ ސިފައިން މިހާރު ދަނީ އީރާނު ކައިރީގައި އަސްކަރީ ބާރުގަދަކުރަމުންނެވެ.
އީރާނުގައި ކުރިއަށް ދިޔަ މުޒާހަރާތައް ހުއްޓުވުމަށް އީރާނުގެ ސަރުކާރުން މަސައްކަތްކުރި ދުވަސްވަރު، އެކަމުގެ ތެރެއަށް ވަދެގަންނާނެ ކަމުގެ އިންޒާރު ޓްރަމްޕް ދެއްވި ނަމަވެސް، އަމަލީ ގޮތުން އެފަދަ ފިޔަވަޅެއް އަޅުއްވާފައެއް ނުވެ އެވެ. ނަމަވެސް އޭގެ ފަހުން ޓްރަމްޕް ވަނީ ނިއުކްލިއާ މައްސަލައިގައި އީރާނުން ދޫދިނުމަށް ބާރުއަޅުއްވައި، އެ ގައުމުގެ އައްސޭރިފަށަށް މަނަވަރުތަކެއް ފޮނުއްވާފަ އެވެ. އީރާނުން މިހާރު "ސީރިއަސްކޮށް ވާހަކަދައްކަމުން" އަންނަ ކަމަށް ޓްރަމްޕް މިދިޔަ ހަފުތާގައި ވިދާޅުވެފައިވާއިރު، އީރާނުގެ ސަލާމަތީ ކަންކަމާ ބެހޭ އެންމެ އިސް އޮފިޝަލް އަލީ ލަރީޖާނީ ވިދާޅުވީ މަޝްވަރާތަކަށް ބޭނުންވާ އިންތިޒާމުތައް ހަމަޖައްސަމުންދާ ކަމަށެވެ.
މަޝްވަރާތައް އަލުން ފެށުމަށްޓަކައި ޓްރަމްޕް ތިން ޝަރުތެއް ކުރިމަތިކުރައްވާފައިވާ ކަމަށް އީރާނުގެ މަސްދަރުތަކުން މިދިޔަ ހަފުތާގައި ރޮއިޓާސްއަށް މައުލޫމާތު ދީފައިވެ އެވެ. އެ ޝަރުތުތަކަކީ އީރާނުގައި ޔުރޭނިއަމް މުއްސަނދިކުރުން މުޅިން ހުއްޓާލުމާއި، ތެހެރާންގެ ބެލިސްޓިކް މިސައިލް ޕްރޮގްރާމް ހަނިކުރުމުގެ އިތުރުން، ސަރަހައްދީ ހަނގުރާމަވެރި ޖަމާއަތްތަކަށް އީރާނުން ދޭ އެހީތެރިކަން ހުއްޓާލުމެވެ.
މި ތިން ޝަރުތަކީ ވެސް އީރާނުގެ މިނިވަންކަމާއި އިސްތިގުލާލަށް އަރައިގަތުން ކަމަށް ބުނެ އެ ގައުމުން މީގެ ކުރިން ވަނީ އެކަންކަމަށް އިންކާރުކޮށްފަ އެވެ. ނަމަވެސް އީރާނުގެ ދެ އޮފިޝަލަކު ރޮއިޓާސް އަށް ވިދާޅުވީ، ޔުރޭނިއަމް މުއްސަނދިކުރުމަށްވުރެ ބޮޑު ހުރަހެއްގެ ގޮތުގައި އެ ގައުމުގެ ދީނީ ލީޑަރުން ދެކެވަޑައިގަންނަވަނީ ބެލިސްޓިކް މިސައިލް ޕްރޮގްރާމަށް ހުރަސްއެޅުން ކަމަށެވެ.
އިޒްރޭލުގެ އިސް ދެ އޮފިޝަލަކު ވަކިވަކިން ހޯމަ ދުވަހު މައުލޫމާތު ދެއްވި ގޮތުގައި، ސްޓީވް ވިޓްކޮފް އިޒްރޭލަށް ވަޑައިގެން ބޮޑުވަޒީރު ބެންޖަމިން ނަތަންޔާހޫ އާއި އެ ގައުމުގެ އަސްކަރީ ވެރިޔާއާ ބައްދަލުކުރެއްވުމަށް ވެސް ވަނީ ހަމަޖެހިފަ އެވެ.
