އީގަލްސް އަތުން ވެސް މޮޅުވެ، މާޒިޔާ އިން ލީގު ހޯދުމާ ގާތަށް

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ކުލަބު އީގަލްސްއާ ދެކޮޅަށް ކުޅުނު މެޗުން ވެސް މޮޅުވެ، މާޒިޔާ ސްޕޯޓްސް އެންޑް ރެކްރިއޭޝަން އިން ލީގު ޗެމްޕިއަންކަން ހޯދުމާ ގާތަށް ޖެހިލައިފި އެވެ.

ހުކުރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު މާޒިޔާ އިން ކާމިޔާބު ކުރީ 3-0 އިންނެވެ. މެޗުގައި މާޒިޔާ އިން އެ ޓީމުގެ ތިން ލަނޑު ވެސް ޖެހީ، މެޗުގެ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި ވެސް މާޒިޔާ އިން ވަނީ ރަނގަޅަށް ކުޅެ، ލަނޑު ޖަހަން ފުރުސަތު ތަކެއް ތަނަވަސްކޮށްފަ އެވެ. ނަމަވެސް، އެ ޓީމަށް އެއްވެސް ފުރުސަތެއްގެ ބޭނުން ކުރެވޭ ގޮތެއް ނުވި އެވެ. 

މެޗުގެ ދެ ވަނަ ހާފު ފަށައިގެން 11 ވަނަ މިނެޓުގައި މާާޒިޔާ އިން ލީޑު ޖެހީ ސަމޫހު އަލީ ޖެހި ލަނޑުންނެވެ. އޭގެ ފަހުން މެޗުގެ 79 ވަނަ މިނެޓުގައި އަޙުމަދު އައިހަމް ވަނީ މާޒިޔާގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް، ހަމްޒާ މުޙައްމަދު (ހަމްޕު) ވަނީ މާޒިޔާގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ.

މޮޅާއެކު، މާޒިޔާ އިން ލީގު ތާވަލްގެ އެއް ވަނަ މަގާމުގައި އޮތީ މިހާތަނަށް އެ ޓީމު ކުޅެފައިވާ 15 މެޗުން 43 ޕޮއިންޓާ އެކު އެވެ. މިފަހަރުގެ ލީގުގައި މާޒިޔާ ވަނީ ކުޅުނު 14 މެޗުން މޮޅުވެފަ އެވެ. އެއް މެޗުން އެ ޓީމު އެއްވަރުވެފައިވާއިރު، މާޒިޔާ އިން މި ވަނީ ލީގު ހޯދުމާ ގާތަށް ޖެހިލައިފަ އެވެ. 

އެގޮތުން ލީގުގައި އޮޑި ސްޕޯޓްސް ކުލަބާއި ކުލަބު ވެލެންސިއާ ކުޅޭ މެޗުން އޮޑި މޮޅު ނުވެއްޖެ ނަމަ، މާޒިޔާ އަށް ލީގު ކަށަވަރު ވާނެ އެވެ. އެ މެޗުން އޮޑި މޮޅުވެއްޖެ ނަމަ، ލީގުގައި އަންނަ ބުރާސްފަތި ދުވަހުގެ ރޭ ބުރު ސްޕޯޓްސް ކުލަބާ ދެކޮޅަށް ކުޅޭ މެޗުން މޮޅުވެ މާޒިޔާ އަށް ލީގު ޗެމްޕިއަންކަން ހޯދޭނެ އެވެ.