ފަހު ވަގުތު ވެލެންސިއާ ބަލިކޮށް، އޮޑި ދެ ވަނައިގައި

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ކުލަބު ވެލެންސިއާއާ ދެކޮޅަަށް ކުޅުނު މެޗުން މޮޅުވެ، އޮޑި ސްޕޯޓްސް ކުލަބުން ދެ ވަނަ މަގާމު ދަމަހައްޓައިފި އެވެ.

ހޮނިހިރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު އޮޑި އިން ކާމިޔާބު ކުރީ 2-1 އިންނެވެ. މެޗުގައި އޮޑި އިން ލަނޑު ޖަހައި ކުރި ހޯދާފައި ވަނިކޮށް، ވެލެންސިއާ އިން ވަނީ ފަހަތުން އަރައި ނަތީޖާ ހަމަހަމަ ކޮށްފަ އެވެ. ނަމަވެސް، މެޗުގެ އެންމެ ފަހު ވަގުތުގައި ލަނޑު ޖަހައިގެން އޮޑި ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 38 ވަނަ މިނެޓުގައި އޮޑި އަށް ލީޑު ނަގައިދިނީ އަޔާޒު އަޙުމަދު އެވެ. މިއީ މި ފަހަރު އޮޑި އަށް ބަދަލުވި ފަހުން އަޔާޒް އެ ޓީމަށް ޖަހައިދިން ފުރަތަމަ ލަނޑެެވެ. އެ ލަނޑާ އެކު، އޮޑިން ފުރަތަމަ ހާފު ނިންމާލީ ލީޑުގައި އޮވެގެންނެވެ.

މެޗުގެ ދެ ވަނަ ހާފުގައި ވެލެންސިއާ އިން ވަނީ ލަނޑު ޖަހަން ވަރަށް ބޮޑަށް މަސައްކަތް ކޮށްފަ އެވެ. އެގޮތުން މެޗުގެ ފުރިހަމަ ވަހުތު ހަމަވާން ނުވަ މިނެޓަށް ވެފައި ވަނިކޮށް ވެލެންސިއާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ އައިދު މުޙައްމަދު ޖަވީޒް އެވެ. 

މެޗު އެއްވަރު ވާނެ ކަމަށް ބެލެވިފައި ވަނިކޮށް، ފަހު ވަގުތު އޮޑިން ވަނީ ލަނޑު ޖަހައި މެޗުން މޮޅުވެފަ އެވެ. އެގޮތުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގެ ވެސް ފަސް ވަނަ މިނެޓުގައި އޮޑީގެ ދެ ވަނަ ލަނޑު ޖަހައި މެޗުން އެ ޓީމު މޮޅު ކޮށްދިނީ ބިދޭސީ ކުޅުންތެރިޔާ ގާނިއު އަޓަންޑާ އެވެ.

މޮޅާއެކު ލީގު ތާވަލްގެ ދެ ވަނަ މަގާމުގައި އޮޑި އޮތީ މިހާތަނަށް އެ ޓީމު ކުޅެފައިވާ 15 މެޗުން 35 ޕޮއިންޓާ އެކު އެވެ. އޮޑި އަތުން ބަލިވި ވެލެންސިއާ މިހާތަނަށް 15 މެޗު ކުޅެފައިވާއިރު، އެ ޓީމަށް ލިބެނީ އަށް ޕޮއިންޓެވެ. 10 ޓީމު ވާދަ ކުރާ ލީގުގައި ވެލެންސިއާ އޮތީ ނުވަ ވަނައިގަ އެވެ.