އިރާނަށް އެމެރިކާ އިން ހަމަލާ އެއްދީފި ނަމަ މުޅި ސަރަހައްދުގައި "އަލިފާން ފަރުބަދައެއް ގޮވާ ފަދަ" ނުރައްކާތެރި ހާލަތެއް އުފެދޭނެ: ހިޒްބުﷲ ގެ އިސް އޮފިޝަލެއް

އީރާނާ ދެކޮޅަށް އެއްވެސް ކަހަލަ އަސްކަރީ ފިޔަވަޅެއް ނޭޅުމަށް ލުބުނާނުގެ ހިޒްބުالله ޖަމާއަތުގެ އިސް އޮފިޝަލަކު، އެމެރިކާ އަށް ވަރުގަދަ އިންޒާރެއް ދެއްވައިފި އެވެ.

އޭނާ ފާހަގަކުރެއްވި ގޮތުގައި އެމެރިކާގެ މިފަދަ ނުރައްކާތެރި އަމަލެއްގެ ސަބަބުން މުޅި ސަރަހައްދުގައި ފުޅާ ދާއިރާއެއް ގައި ބޮޑު ހަނގުރާމަ އެއް ފެށިގެން ހިނގައިދާނެ އެވެ.

ހިޒްބުاللهގެ ބޯޑަރުތަކާއި ވަސީލަތްތަކާ ބެހޭ ކަންކަމާ ހަވާލުވެ ހުންނެވި އިސްވެރިޔާ ނަވާފް އަލް މޫސާވީ ބުދަ ދުވަހުގެ ރޭ ވިދާޅުވީ، އެމެރިކާއިން އީރާނާ ދެކޮޅަށް އަޅައިފާނެ އަސްކަރީ ފިޔަވަޅަކީ ހެދޭ ވަރަށް ބޮޑު ގޯހަކަށް ވެދާނެ ކަމަށެވެ. އަދި އެކަމުގެ ސަބަބުން މުޅި ސަރަހައްދުގައި "އަލިފާން ފަރުބަދައެއް ގޮވާ ފަދަ" ނުރައްކާތެރި ހާލަތެއް އުފެދޭނެ ކަމުގެ އިންޒާރު އޭނާ ދެއްވި އެވެ.

އީރާނުން އަމިއްލަ މިނިވަން ނިންމުންތައް ނިންމަން ފަށާ ކޮންމެ ދަނޑިވަޅެއްގައި، ހުޅަނގުގެ އިސްތިއުމާރީ ބާރުތަކުގެ އަމާޒަކަށް އެ ގައުމު ވެގެންދާކަން ފާހަގަކުރައްވަމުން މޫސާވީ ވިދާޅުވީ، 1979 ވަނަ އަހަރުގެ އިސްލާމީ އިންގިލާބުގެ ކާމިޔާބީއަށްފަހު، އީރާނުގެ ވެރިކަމުގެ ނިޒާމު ވައްޓާލުމަށް ވޮޝިންގޓަނުން މެދުނުކެނޑި މަސައްކަތް ކުރަމުންދާ ކަމަށެވެ.

ހިޒްބުاللهގެ އިސް އޮފިޝަލު އިތުރަށް ވިދާޅުވީ، ޓްރަމްޕް ބޭނުން ވަނީ އީރާނާ އެކު އެއްބަސްވުމަކަށް އައުމަށް ނުވަތަ އެ ގައުމުގެ އިސްލާމީ ވެރިކަން ވައްޓާލުމަށެވެ. މޫސަވީ ވިދާޅުވި ގޮތުގައި އެމެރިކާ އިން އީރާނާ ދެކޮޅަށް ދުޝްމަނުކަމުގެ ހަމަލާ އެއް ދިން ކަމުގައިވިޔަސް، އެއީ އީރާނުގެ އިސްލާމީ ނިޒާމު ބަދަލުކޮށްލެވޭ ވަރުގެ ކަމަކަށް ނުވާނެ އެވެ.

"އެމެރިކާ މިކަމަށް ފަސްޖެހެނީ، ހަމަލާއަށްފަހު ދެން ވެދާނެ ގޮތެއް އަންދާޒާ ކުރަން ނޭނގޭތީ،" އޭނާ ވިދާޅުވި އެވެ.

މީގެ އިތުރުން، ހިޒްބުاللهގެ ސެކްރެޓަރީ ޖެނެރަލް ޝައިޚް ނައީމް ގާސިމް ދާދިފަހުން ދެއްވި ތަގުރީރަށް އަލިއަޅުވާލައްވަމުން މޫސާވީ ވިދާޅުވީ، އިސްލާމީ އިންގިލާބުގެ ލީޑަރު އާޔަތުالله ސައްޔިދު އަލީ ޚާމަނާއީ އަވަހާރަކޮށްލަން މަސައްކަތް ކޮށްފި ނަމަ، އޭގެ ނަތީޖާ ވަރަށް ހިތިވާނެ ކަމަށެވެ. އަދި ދީނީ އެއްވެސް ލީޑަރެއް އަވަހާރަކޮށްލުމަކީ އެކަން ކުރި ބަޔަކު އޭގެ ބޮޑު އަގު ދައްކަން ޖެހޭނެ ކަމެއް ކަމަށް ވިދާޅުވެ ޝައިޚް ގާސިމް ދެއްވި އިންޒާރަށް އޭނާ ތާއީދުކުރެއްވި އެވެ.

ލުބުނާނުގެ މިހާރުގެ ހާލަތާ ބެހޭގޮތުން ވާހަކަ ދައްކަވަމުން މޫސާވީ ވިދާޅުވީ، ބެއިރޫތުގެ ރަފީގް ހަރީރީ އިންޓަނޭޝަނަލް އެއާޕޯޓުގައި ހިނގަމުންދާ އެމެރިކާގެ އަސްކަރީ ހަރަކާތްތަކަށް ބަލާއިރު، ލުބުނާނު އޮތީ އެމެރިކާގެ އިސްތިއުމާރުގެ ދަށުގައި ކަމަށެވެ. އަދި މަދަނީ އޭވިއޭޝަންގެ ގާނޫނުތަކާ ޚިލާފަށް އެމެރިކާގެ އަސްކަރިއްޔާ އިން ބައިރޫތު އެއާޕޯޓަށް ހަތިޔާރާއި އަސްކަރީ ސާމާނު ބާލަމުންދާ ކަމަށް އޭނާ ތުހުމަތު ކުރެއްވި އެވެ.

އެމެރިކާ އިން އީރާނަށް ހަމަލާއެއް ދީފި ހާލަތެއްގައި ހިޒްބުالله އިން ބައިވެރިވާނެތޯ ސުވާލު ކުރުމުން މޫސާވީ ޖަވާބު ދެއްވީ، "އެފަދަ ހާލަތެއް މެދުވެރިވުމުން އެކަމާ މެދު އޭރުން ގޮތެއް ނިންމާނެ" ކަމަށެވެ.