ސޯމާލިލޭންޑް މިނިވަން ދައުލަތެއްގެ ގޮތުގައި އިޒްރޭލުން ރަސްމީކޮށް ބަލައިގަތުމާއެކު، ސަރަހައްދީ ގުޅުންތަކަށް ބޮޑެތި ބަދަލުތަކެއް އަތުވެދާނެކަމަށް ބެލެވޭ. ބޮޑުވަޒީރު ނަތަންޔާހޫ ވިދާޅުވީ މިއީ އަބްރަހަމް އެކޯޑްސްގެ ރޫޙުގައި ކުރެވުނު ކަމެއް ކަމަށާއި، ދަނޑުވެރިކަން، ޞިއްޙަތު، ޓެކްނޮލޮޖީ އަދި އިޤްތިޞާދީ ދާއިރާތަކުން އެއްބާރުލުން ދޭނެ ކަމަށް. މިޞްރު، ތުރުކީ، ސޯމާލިޔާ އަދި ޖިބޫތީން ވަނީ އިޒްރޭލުގެ މި ނިންމުން ކުށްވެރިކޮށް، ސޯމާލިޔާގެ އެއްބައިވަންތަކަމަށް ފުރިހަމަ ތާއީދު ކުރައްވާފަ.
ސޯމާލީލޭންޑުގެ ދިދައިގެ ކުލަތަކުން ހެނދުން އަޅައިގެން ހުރި އަންހެނަކު 2024 ވަނަ އަހަރުގެ މެއި މަހުގެ 18 ވަނަ ދުވަހު، ސޯމާލީލޭންޑް ގެ ވެރިރަށުގައި އެމީހުންގެ މިނިވަންކަމަށް 33 އަހަރު ފުރުން ފާހަގަ ކުރުމުގެ ޕެރޭޑެއް ގައި ބައިވެރިވަނީ
އަމިއްލަ އަށް މިނިވަންކަން އިއުލާނު ކޮށްފައިވާ ސޯމާލީލޭންޑް ދައުލަތެެއްގެ ގޮތުގައި ބަލައިގަތް ފުރަތަމަ ގައުމަކަށް އިޒްރޭލު ވެއްޖެ އެވެ.
ސޯމާލީލޭންޑް މިނިވަން ދައުލަތެއްގެ ގޮތުގައި އިޒްރޭލުން ރަސްމީކޮށް ބަލައިގަނެފިކަން ހުކުރު ދުވަހު އިއުލާނުކުރުމާއެކު، ސަރަހައްދީ ގުޅުންތަކަށް ބޮޑެތި ބަދަލުތަކެއް އަތުވެދާނެކަމަށް ބެލެވެއެވެ. އަދި މިއީ ސޯމާލީލޭންޑް ސޯމާލިޔާ އާ ވަކިވުމާ ދެކޮޅަށް ސޯމާލިޔާ އިން ގެންގުޅެމުން އައި ސިޔާސަތު އިމްތިހާނު ކުރެވޭނެ ކަމެއްގެ ގޮތުގައި ވަނީ ބެލެވިފަ އެވެ.
ސޯމާލީލޭންޑް ބަލައިގަތް ގަރާރުގައި ސޮއިކުރެއްވުމަށް ފަހު ބޮޑުވަޒީރު ބެންޖަމިން ނަތަންޔާހޫ ވިދާޅުވީ، ދަނޑުވެރިކަން، ޞިއްޙަތު، ޓެކްނޮލޮޖީ އަދި އިޤްތިޞާދީ ދާއިރާތަކުން ސޯމާލީލޭންޑާ އެކު ވަގުތުން އެއްބާރުލުން ދޭން އިޒްރޭލުން މަސައްކަތްކުރާނެ ކަމަށެވެ. ބަޔާނެއް ނެރުއްވައި، އޭނާ ވަނީ ސޯމާލީލޭންޑްގެ ރައީސް ޢަބްދުއްރަޙްމާން މުޙައްމަދު ޢަބްދުﷲއަށް މަރުޙަބާ ވިދާޅުވެ، އެމަނިކުފާނުގެ ލީޑަރޝިޕަށް ތަޢުރީފުކުރައްވައި، އިޒްރޭލަށް ވަޑައިގަތުމަށް ދަޢުވަތު އެރުވައިފައެވެ.
ނަތަންޔާހޫ ވިދާޅުވީ، މި ނިންމުމަކީ "ރައީސް ޓްރަމްޕްގެ އިސްނެގުމަށް ސޮއިކުރެވުނު އަބްރަހަމް އެކޯޑްސްގެ ރޫޙުގައި ކުރެވުނު ކަމެއް،" ކަމަށެވެ.
2020 ވަނަ އަހަރު ސޮއިކުރެވުނު އެ އެކޯޑްސް އަށް އެއްބަސްވީ ޓްރަމްޕްގެ ފުރަތަމަ ސަރުކާރުގައެވެ. މި އެއްބަސްވުމުގައި އިޒްރޭލުން ޔުނައިޓެޑް ޢަރަބި އެމިރޭޓްސް އަދި ބަޙްރެއިންއާ ދެމެދު ސިޔާސީ ގުޅުންތައް ރަސްމީކުރުން ހިމެނޭއިރު، ފަހުން އެހެން ޤައުމުތަކެއްވެސް މި އެއްބަސްވުން ފުޅާ ކުރުމަށް ރޭވިފައިވެ އެވެ.
ނަތަންޔާހޫ އާއި، ޚާރިޖީ ވަޒީރު ގިޑިއޮން ސާރް އާއި، ސޯމާލިޔާލެންޑްގެ ރައީސް ވަނީ ދެ ގައުމުގެ މެދުގައި އެއްބަޔަކު އަނެއްބަޔަކު ބަލައިގަތުމުގެ ގުޅުން ގާއިމްކުރުމަށްޓަކައި ގުޅިފައިވާ ބަޔާނެއް ގައި ސޮއިކުރައްވާފައިވާކަމަށް އިޒްރޭލުން ބުނެ އެވެ.
ޢަބްދުﷲ ބަޔާނެއް ނެރުއްވައި ވިދާޅުވީ، ސޯމާލިލޭންޑް ވެސް އަބްރަހަމް އެކޯޑްސް ގައި ބައިވެރިވާނެ ކަމަށާއި، މިއީ ސަރަހައްދީ އަދި ބައިނަލްއަޤްވާމީ ސުލްޙައަށް އެޅޭ ފިޔަވަޅެއް ކަމަށެވެ.
މިޞްރުން ބުނީ، ޚާރިޖީ ވަޒީރު ބަދްރު ޢަބްދުލްޢަތީ ހުކުރު ދުވަހު ސޯމާލިޔާ، ތުރުކީ، އަދި ޖިބޫތީ ގެ ޚާރިޖީ ވަޒީރުންނާ ފޯނުން ގުޅުއްވައި، އިޒްރޭލުގެ މި އިއުލާނާ ގުޅިގެން ހޯން އޮފް އެފްރިކާ ގައި ދިމާވެފައިވާ ނުރައްކާތެރި ހަރަކާތްތަކާ ބެހޭގޮތުން މަޝްވަރާކުރައްވާފައި ކަމަށެވެ.
މިޞްރުގެ ޚާރިޖީ ވުޒާރާއިން ބުނިގޮތުގައި، ޚާރިޖީ ވަޒީރުން ވަނީ އިޒްރޭލުން ސޯމާލީލޭންޑް ބަލައިގަތުން ކުށްވެރިކޮށް، ސޯމާލިޔާގެ އެއްބައިވަންތަކަމާއި ސަރަހައްދީ ރައްކާތެރިކަމަށް ފުރިހަމައަށް ތާއީދުކުރައްވާ ކަން އަނެއްކާވެސް ހާމަކުރައްވާފައެވެ. އަދި ވަކިވާ ސަރަހައްދުތައް ބަލައިގަތުމަކީ ބައިނަލްއަޤްވާމީ ސުލްޙައާއި ސަލާމަތަށް ނުރައްކަލެއް ކަމަށް ވިދާޅުވެ އިންޒާރު ވެސް ދެއްވާފައިވެއެވެ.
1991 ވަނަ އަހަރު ސޯމާލިޔާ ގައި ދާޚިލީ ހަނގުރާމަ ފެށުމާއެކު ސޯމާލީލޭންޑް ވަނީ ސޯމާލިޔާ އާ ވަކިވެ ވަކި ސަރަހައްދެއްގެ ގޮތުގައި ހިންގަމުން ގެންގޮސްފަ އެވެ. އަދި ސުލްހަ އާއި ހަމަ ޖެހުން ގާއިމު ކުރެވިފައި އޮތް ނަމަވެސް ވަކިވެފައިވާ މި ސަރަހައްދު މިނިވަން ގައުމެއްގެ ގޮތުގައި ބޭރުގެ އެެއްވެސް ގައުމަކުން އަދި ޖަމްއިއްޔާ އަކުން ވެސް ބަލައިގަނެފަ އެއް ނުވެ އެވެ.
ސޯމާލީލޭންޑް ބަލައިގަންނަ ކޮންމެ ގައުމަކާ ދެކޮޅަށް ބައިނަލް އަގްވާމީ މުޖުތަމައުން މަސައްކަތް ކުރުމަށް ސޯމާލިޔާއިން ވަނީ ގޮވާލާފައެވެ.
ކުރީގެ ބްރިޓިޝް ޕްރޮޓެކްޓަރޭޓެއްގެ ގޮތުގައި އޮތް ސޯމާލީލޭންޑް އުންމީދު ކުރަނީ، އިޒްރޭލުން ބަލައިގަތުމާއެކު އެހެން ޤައުމުތަކުން ވެސް މިފަދަ ނިންމުންތަކެއް ނިންމައި، ސިޔާސީ ނުފޫޒު ފުޅާވެ، ބައިނަލްއަޤްވާމީ މާކެޓުތަކަށް ވަނުމުގެ ފުރުސަތު އިތުރުވާނެ ކަމަށެވެ.
މިދިޔަ މާރޗް މަހު، ސޯމާލިޔާ އާއި އެ ގައުމުން ވަކިވެފައިވާ ސޯމާލީލޭންޑުން ވަނީ ޣައްޒާ އިން ފަލަސްޠީނުގެ ރައްޔިތުން ބޭރުކޮށް އެ ތަންތަނުގައި މީހުން ވަޒަންވެރިކުރުމަށް އެމެރިކާ އިން ނުވަތަ އިޒްރޭލުން ވިޔަސް އެއްވެސް ހުށަހެޅުމެއް ލިބިފައިވާކަން ދޮގުކޮށްފައެވެ. އަދި މޮގަދިޝޫ އިން ބުނީ މިފަދަ ކޮންމެ ކަމަކަށް ސީދާ އިންކާރުކުރާ ކަމަށެވެ.
