އީރާނަށް ދޭ ކޮންމެ ހަމަލާއަކީ ހިޒްބުﷲ އަށް ވެސް އަމާޒުކުރެވޭ ހަމަލާއެއް ކަމަށް އެ ޖަމާއަތުގެ ވެރިޔާ ވިދާޅުވެއްޖެ
މިފަހަރު އީރާނާ ދެކޮޅަށް ހަނގުރާމައެއް ފަށައިފިނަމަ މުޅި ސަރަހައްދުގައި ހުޅު ރޯވާނެ ކަމަށް ވެސް އޭނާ އިންޒާރު ދެއްވި.
ހިޒްބުﷲގެ ލީޑަރު ނައީމް ގާސިމް، ލުބްނާނުގެ ބައިރޫތުގައި، އީރާނާއި އެގައުމުގެ ސުޕްރީމް ލީޑަރު އަލީ ޚާމަނާއީ އަށް ތާއީދުކުރުމުގެ ގޮތުން ބޭއްވި ބައްދަލުވުމެއްގައި ޓީވީ މެދުވެރިކޮށް ހިތާބެއް ދެއްވަނީ - ޖެނުއަރީ 26، 2026. | ރޮއިޓާސް
އީރާނަށް ދޭ ކޮންމެ ހަމަލާއަކީ ހިޒްބުﷲ އަށްވެސް އަމާޒުކުރެވޭ ހަމަލާއެއް ކަމަށާއި، އެ ޖަމާއަތް އޮތީ "ވަކި ފަރާތަކަށް ނުޖެހި" ނޫން ކަމަށް ހިޒްބުﷲގެ ވެރިޔާ ވިދާޅުވެއްޖެ އެވެ.
އީރާނުގެ ތާއީދާއެކު ލުބުނާނުގައި ހަރަކާތްތެރިވާ ހިޒްބުﷲ ޖަމާއަތުގެ ވެރިޔާ ނައީމް ގާސިމް ހޯމަ ދުވަހު ވިދާޅުވީ، އިސްލާމީ ޖުމްހޫރިއްޔާއާ ދެކޮޅަށް ފަށާ ކޮންމެ އާ ހަނގުރާމައަކީ މުޅި ސަރަހައްދުގައި ހުޅު ރޯވެގެންދާނެ ކަމެއް ކަމަށެވެ.
އީރާނާއެކު ސާބިތުވެ ތިބިކަން ހާމަކުރުމަށް ބޭއްވި އެއްވުމެއްގައި ސަޕޯޓަރުންނާ މުހާތަބު ކުރައްވައި ދެއްވި ވީޑިއޯ މެސެޖެއްގައި އޭނާ ވިދާޅުވީ، އީރާނަށް "ކުރިމަތިވެދާނެ ކޮންމެ އުދުވާނަކީ އަޅުގަނޑުމެންނަށް އަމާޒުވާނެ ކަމެއް ކަމަށާއި، ދިފާއުގައި ތެދުވުމަށް އަޅުގަނޑުމެން މިތިބީ ވަރަށް ބޮޑަށް އަޒުމް ކަނޑައަޅައިގެން" ކަމަށެވެ.
"އެފަދަ ހާލަތެއްގައި އަމަލުކުރާނެ ގޮތެއް އަޅުގަނޑުމެން ނިންމާނަން. އެކަމަކު އަޅުގަނޑުމެން މިތިބީ ވަކި ފަރާތަކަށް ނުޖެހި ތިބޭކަށް ނޫން،" އޭނާ ވިދާޅުވިއެވެ. އަދި މިފަހަރު އީރާނާ ދެކޮޅަށް ހަނގުރާމައެއް ފަށައިފިނަމަ މުޅި ސަރަހައްދުގައި ހުޅު ރޯވާނެ ކަމަށް ވެސް އޭނާ އިންޒާރު ދެއްވި އެވެ.
