"ލިމިޓެޑް" ގޮތެއްގައި ރަފަޙް ކްރޮސިން ހުޅުވާލަން އިޒްރޭލް އިން އެއްބަސްވެއްޖެ

ޣައްޒާ އާއި މިޞްރާ ދެމެދުގައި އޮންނަ ރަފަޙް ބޯޑަރު ކްރޮސިން "ލިމިޓެޑް މިންވަރަކަށް" ހުޅުވާާލާނެ ކަމަށް އިޒްރޭލް އިން ބުނެފި އެވެ. 

ހޯމަ ދުވަހު އިޒްރޭލް އިން މިކަން ހާމަ ކޮށްފައި ވަނީ، ފަލަސްޠީނުގެ ސަރަހައްދުގައި ބަންދު ކޮށްފައި ހުރި އެ ޤައުމުގެ އެންމެ ފަހު މީހާ ހޯދުމުގެ މަސައްކަތް ކުރަމުން އަންނަ ކަމަށް ބުނެ އެވެ. 

ޣައްޒާ އަށް އެހީތެރިކަން ފޯރުކޮށްދިނުމުގައި މުހިންމު ދޮރެއް ކަަމަށްވާ ރަފަޙް ހުޅުވާލުމަކީ، އެމެރިކާގެ ރައީސް ޑޮނަލްޑް ޓްރަމްޕްގެ އިސްނެންގެވުމުގެ ދަށުން މިދިޔަ އަހަރުގެ އޮކްޓޫބަރު މަހުގެ ތެރޭގައި އެކުލަވާލި ހަނގުރާމަ ހުއްޓާލުމުގެ އެއްބަސްވުމުގައި ހިމެނޭ ކަމެކެވެ. ނަމަވެސް، ހަނގުރާމަ އަށް ފަހު ފަލަސްޠީނުގެ ސަރަހައްދުގައި އިޒްރޭލްގެ ސިފައިން އެެ ކްރޮސިން ކޮންޓްރޯލް ކުރަން ފެށި ފަހުން، މިހާތަނަށް އެ ބޯޑަރު އޮންނަނީ ބަންދު ކޮށްފަ އެވެ.

ރިޕޯޓުތައް ބުނާ ގޮތުގައި މިދިޔަ ހަފުތާ ބަންދުގެ ތެރޭގައި ޖެރޫސަލަމްގައި ބޭއްވި މަޝްވަރާ ތަކުގައި ކްރޮސިން ހުޅުވާލުމަށް އެދި، އެމެރިކާގެ ސަފީރުން ވަނީ އިޒްރޭލްގެ އޮފިޝަލުންނަށް ބާރު އަޅައިފަ އެވެ. 

ހަނގުރާމަ ކުރިއަށް ދިޔައިރު ވެސް، އަދި ހަނގުރާމައިގެ އެއްބަސްވުން އެކުލަވާލި ފަހުން ވެސް، ދުނިޔޭގެ ލީޑަރުންނާއި އެހީތެރި ކަމުގެ ޖަމިއްޔާ ތަކުން އަންނަނީ އިންސާނީ އެހީ ޣައްޒާ އަށް ފޯރުކޮށްދިނުމަށް ގޮވާލަމުންނެވެ. ދެ އަހަރަަށް ވުރެ ދިގު މުއްދަތަކަށް އިޒްރޭލް އިން ކުރިއަށް ގެންދާ ހަނގުރާމައިގެ ސަބަބުން ޣައްޒާ ވަރަށް ބޮޑަށް ހަލާކުވެފައިވާއިރު، އެ ސަރަހައްދަށް ބޭނުންވާ ޞިއްހީ ސާމާނާއި، ކާބޯ ތަކެތި އަދި އިންސާނީ އެހީ ލިބެމުން ދަނީ މަދު މިންވަރަކަށެވެ. 

ހޯމަ ދުވަހު އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫގެ އޮފީހުން ބުނެފައި ވަނީ، އިޒްރޭލްގެ ފުރިހަމަ ބެލުމުގެ ދަށުން، އަދި "ފިޔަވަޅުގެ" މަތިން ދަތުރު ކުރުމަށް ބޮޑަރު ހުޅުވާލަން އެއްބަސްވެފައިވާ ކަމަށެވެ. އަދި އެކަން ކުރާނީ ބަންދު ކޮށްފައިވާ މީހުންގެ ތެރެއިން ދިރި ތިބި އެންމެން އަނބުރާ ގެނައުމާއި، މަރުވެފައިވާ މީހުން ހޯދައި، އަނބުރާ ހަވާލު ކުރުމަށް ހަމާސް އިން 100 އިންސައްތަ މަސައްކަތް ކުރާނެ ކަމުގެ ޔަގީންކަން ލިބުމުން ކަމަށް ބުނެފައިވެ އެވެ. 

އާދީއްތަ ދުވަހު އިޒްރޭލްގެ އަސްކަރިއްޔާ އިން ބުނެފައި ވަނީ، ޣައްޒާގެ ގަބުރަސްތާނެއްގައި ބަންދު ކޮށްފައިވާ އެންމެ ފަހު މީހާގެ ހަށިގަނޑު ހޯދުމުގެ މަސައްކަތް ކުރަމުން އަންނަ ކަމަށެވެ. ބޮޑު ވަޒީރުގެ އޮފީހުގެ ބަޔާނުގައި ބުނެފައި ވަނީ އެ އޮޕަރޭޝަން ނިމުމުން، އެމެރިކާއާ އެކު އެއްބަސްވެފައިވާ ގޮތުގެ މަތިން، އިޒްރޭލް އިން ރަފަޙް ކްރޮސިން ހުޅުވާލާނެ ކަމަށެވެ. 

އިޒްރޭލްގެ މީޑިއާ ތަކުގައި ބުނެފައިވާ ގޮތުގައި އެމެރިކާގެ ޚާއްސަ މަންދޫބު ސްޓީވް ވިޓްކޮފް އާއި ޖެރާޑް ކުޝްނާ ވަނީ، ޖެރޫސަލަމްގައި ބޭއްވި މަޝްވަރާ ތަކުގައި އެކަމަށް ނަތަންޔާހޫގެ ކިބައިން އެދިވަޑައިގެންފަ އެވެ.