ސަރަޙައްދުގެ މަސްރަޙު ނުތަނަވަސްކަން އިތުރުވަން ދަނިކޮށް، އިޒްރޭލުގެ އެއަރލައިން ތަކުން ފްރީ ކެންސަލޭޝަން ފުރުސަތު ހުޅުވާލައިފި
އީރާނުން ބަދަލު ހިފުމުގެ ގޮތުން އިޒްރޭލަށް ހަމަލާތަކެއް ދޭނެ ކަމުގެ ބިރު އޮތުމުން، އިޒްރޭލުގެ އެއާލައިންތަކުން ޓިކެޓް ކެންސަލް ކުރުމުގެ ފުރުޞަތު ވަނީ ހުޅުވާލާފައި.
އެލް އަލް ބޯއިންގ 747 މަރުކާގެ ބޯޓެއް ތެލް އަވީވް ގެ ބެން ގުރިއޮން އެއަރޕޯޓުގައި ގޭޓަށް ގެންދަނީ - ޖުލައި 9، 2003. | ގެޓީ އިމޭޖަސް
ސަރަޙައްދުގެ ނުތަނަވަސްކަން އިތުރުވަން ދަނިކޮށް، އިޒްރޭލުގެ އެއާލައިންތައް ކަމަށްވާ އެލް އަލް، އިސްރާއެއާ އަދި އާކިއާ އިން އިތުރު ފީ އެއް ނުނަގާ ޓިކެޓް ކެންސަލް ކުރުމުގެ ފުރުޞަތު ދޭން ނިންމައިފި ކަމަށް އެ އެއާލައިންތަކުން ހޯމަ ދުވަހު ބުނެފި އެވެ.
އެމެރިކާގެ ރައީސް ޑޮނަލްޑް ޓްރަމްޕް މިދިޔަ ހަފުތާގައި ވިދާޅުވީ އީރާނާ ދިމާލަށް އަސްކަރީ ކަނޑުގެ ފައުޖެއް ދަތުރުކުރަމުންދާ ކަމަށާއި، ނަމަވެސް އެ ފައުޖުގެ ބޭނުން ހިފަން ނުޖެހޭނެ ކަމަށް އުއްމީދު ކުރައްވާ ކަމަށެވެ. އަނެއްކޮޅުން އީރާނުގެ ނިއުކްލިއާ ޕްރޮގްރާމް އަލުން ފެށުމާއި، މުޒާހަރާކުރާ މީހުންނާ ދެކޮޅަށް ބާރުގެ ބޭނުންކުރުމާ ގުޅޭގޮތުން އޭނާ ވަނީ ތެހެރާނަށް ދެއްވާ އިންޒާރުތައް އާކުރައްވާފައެވެ.
އީރާނަށް ދީފާނެ އަސްކަރީ ހަމަލާއަކާ ގުޅިގެން، ބަދަލު ހިފުމުގެ ގޮތުން އިޒްރޭލަށް ހަމަލާތަކެއް އަތުވެދާނެ ކަމުގެ ބިރު އޮތުމުން، ހޯމަ ދުވަހުން ފެށިގެން ޓިކެޓް ގަންނަ ފަރާތްތަކަށް ޓިކެޓް ކެންސަލް ކުރުމުގެ ނުވަތަ ކުރިމަގުގައި ދަތުރުކުރެވޭނެ ވައުޗާ އެއް ހޯދުމުގެ ފުރުޞަތު އެއާލައިންތަކުން މިހާރު ވަނީ ހުޅުވާލާފައެވެ.
ޖޫން މަހު އިޒްރޭލާއި އީރާނާ ދެމެދު ހިނގި 12 ދުވަހުގެ ކުރިމަތިލުންތަކުގައި، އީރާނުން ފޮނުވާލި މިސައިލްތަކާއި، އީރާނުގެ ނިއުކްލިއާ މަރުކަޒުތަކަށް އިޒްރޭލުން ދިން ހަމަލާތަކުގެ ސަބަބުން އިޒްރޭލުގެ ވައިގެ ސަރަޙައްދުގެ ބޮޑުބައެއް އޮތީ ބަންދުކޮށްފަ އެވެ.
އިޒްރޭލުގެ މައި އެއާލައިން ކަމަށްވާ އެލް އަލް އިން ބުނީ، ކުރިއަށް އޮތް ދެ ހަފުތާ ތެރޭގައި ގަންނަ ޓިކެޓްތަކާއި، އަންނަ އަހަރުގެ މާރިޗު 17 އާ ހަމައަށް ކުރާ ދަތުރުތައް، ދަތުރުގެ 48 ގަޑިއިރު ކުރިން އެއްވެސް އިތުރު ޗާޖަކާ ނުލައި ކެންސަލް ކުރެވޭނެ ކަމަށެވެ.
ހަމައެފަދައިން، ކުޑަ އެއާލައިނެއް ކަމަށްވާ އިސްރާއެއާ އިން ބުނެފައި ވަނީ "މިހާރުގެ ޙާލަތަށް ރިއާޔަތްކޮށް"، ކުރިއަށް އޮތް މަހެއްހާ ދުވަހުގެ ތެރޭގައި ބުކް ކުރާ ޓިކެޓްތަކަށް (2026 ވަނަ އަހަރުގެ ނިޔަލަށް ކުރާ ދަތުރުތަކަށް) 35 ޑޮލަރުގެ ފީއަކާ އެކު ދަތުރު ކަށަވަރުކޮށްދޭ "ފްލައިޓް ޕްރޮޓެކްޝަން" ދޫކުރަމުންދާ ކަމަށެވެ.
އާކިއާ އެއާލައިނުން ބުނި ގޮތުގައި އެ ކުންފުނި އޮތީ "ކޮންމެ ފަދަ ޙާލަތަކަށް ވެސް ތައްޔާރުވެގެން" ނެވެ. އެގޮތުން ފެބްރުއަރީ 9 ވަނަ ދުވަހުގެ ނިޔަލަށް ބުކް ކުރާ ޓިކެޓްތައް، ދަތުރުގެ 48 ގަޑިއިރު ކުރިން ހިލޭ ކެންސަލް ކުރުމުގެ ފުރުޞަތު ދީ، އެފަރާތްތަކަށް ވައުޗާ ދޫކުރާނެ ކަމަށް އެ އެއާލައިނުން ބުންޏެވެ.
މަސްދަރު: ރޮއިޓާސް
