އިޒްރޭލުން ލުބުނާނަށް ބޮން އަޅައިފި
ލުބުނާނުގެ އިރުމައްޗާއި ދެކުނުގެ ހަތަރު އަވަށެއް ހުސްކުރުމަށް އަމުރުކުރުމަށްފަހު، އިޒްރޭލް ސިފައިން ހިޒްބުالله އާއި ޙަމާސްގެ އަސްކަރީ އަމާޒުތަކަށް ކަމަށް ބުނެ ވަރުގަދަ ވައިގެ ހަމަލާތަކެއް ވަނީ ދީފައި. 2024 ވަނަ އަހަރު އެމެރިކާ މެދުވެރިވެގެން ގާއިމުކުރި ހަނގުރާމަ ހުއްޓާލުމުގެ އެއްބަސްވުމާ ޚިލާފުވެ އިޒްރޭލުން ހުއްޓުމެއް ނެތި ލުބުނާނަށް ހަމަލާތައް ދަނީ ދެމުން.
2025 ވަނަ އަހަރުގެ ޑިސެމްބަރު މަހު ލުބުނާނުގެ ދެކުނުގެ ސަރަހައްދަކަށް އިޒްރޭލުން ދިން ވައިގެ ހަމަލާ އެއްގެ މަންޒަރެއް (ފައިލް) | އޭއެފްޕީ
ހިޒްބުالله އާއި ޙަމާސްގެ އަމާޒުތަކަށް ކަމަށް ބުނެ އިޒްރޭލުން ލުބުނާނަށް ހޯމަ ދުވަހު ބޮންއަޅައިފި އެވެ.
ލުބުނާނުގެ އިރުމައްޗާއި ދެކުނުގެ ހަތަރު އަވަށެއް ހުސްކުރުމަށް އަމުރުކުރުމަށް ފަހު، އިޒްރޭލް ސިފައިން އެ ސަރަހައްދުތަކުގައި ހުރި ހިޒްބުالله އާއި ޙަމާސްގެ އަމާޒުތަކަށް ކަމަށް ބުނެ ވަރުގަދަ ހަމަލާތަކެއް ވަނީ ދީފަ އެވެ.
އިޒްރޭލު ސިފައިންގެ ތަރުޖަމާނަކު މީގެ ކުރިން ބުނެފައިވާ ގޮތުގައި، ލުބުނާނުގެ އިރުމަތީ ބިގާޢު ވާދީގައި ހިމެނޭ ޙައްމާރާ އާއި ޢައިން އަލް-ތީނާ، އަދި ދެކުނުގެ ކަފްރް ޙައްތާ އާއި ޢައްނާން ގައި ހުރި ހިޒްބުالله އާއި ޙަމާސްގެ އަސްކަރީ އިންފްރާސްޓްރަކްޗަރަށް އަމާޒުކޮށް ވައިގެ ހަމަލާތަކެއް ދިނުމަށް ވަނީ ރާވާފައެވެ.
އޭއެފްޕީ ނިއުސް އެޖެންސީގެ ފޮޓޯގްރާފަރަކު ރިޕޯޓްކޮށްފައިވާ ގޮތުގައި، އިޒްރޭލުން ދިން އިންޒާރާ ގުޅިގެން ކަފްރް ޙައްތާގެ އެތައް އާއިލާ އެއް ވަނީ ރަށް ދޫކޮށް ރައްކާތެރި ސަރަހައްދުތަކަށް ބަދަލުވެފަ އެވެ. އެ ސަރަހައްދުގައި އިޒްރޭލުގެ ޑްރޯންތައް އުދުހެމުންދާ އިރު، އެމްބިއުލާންސްތަކާއި އަލިފާން ނިއްވާ ލޮރީތައް ވަނީ ތައްޔާރީ ހާލަތަކަށް ގެނެސްފައި ކަމަށް އޭނާ ރިޕޯޓު ކޮށްފައިވެ އެވެ.
ލުބުނާނުގެ ހެލްތު މިނިސްޓްރީން ބުނި ގޮތުގައި، ހޯމަ ދުވަހުގެ ކުރީކޮޅު ދެކުނުގެ ބްރައިކާ އަވަށުގައި ކާރަކަށް ދިން ޑްރޯން ހަމަލާއެއްގައި ދެ މީހަކު ވަނީ ޒަޚަމްވެފައެވެ. އިޒްރެލު ސިފައިން ބުނާ ގޮތުގައި މި ހަމަލާ އަމާޒުކުރީ ހިޒްބުاللهގެ ދެ މެންބަރަކަށެވެ.
މި ހަމަލާތައް ދީފައިވަނީ އާދީއްތަ ދުވަހު ލުބުނާނުގެ ދެކުނުގައި އޮންނަ ބިންތު ޖުބައިލްގެ އުތުރުން ޢައިން އަލް-މިޒްރާބް ސަރަހައްދުގައި ދުއްވާފައި ދިޔަ އުޅަނދަކަށް ދިން ނުރައްކާތެރި ހަމަލާއެއްގައި ދެ މީހަކު މަރުވި ހާދިސާ އަށް ފަހުގަ އެވެ. ބޯޑަރުން ފެށިގެން 10 ކިލޯމީޓަރު (6 މޭލު) އެތެރޭގައި ދިން މި ހަމަލާ އަމާޒުކުރީ ވެސް ހިޒްބުاللهގެ މެންބަރަކަށް ކަމަށް އިޒްރޭލުން ބުނެ އެވެ.
2024 ވަނަ އަހަރު އެމެރިކާ މެދުވެރިވެގެން ގާއިމުކުރި ހަނގުރާމަ ހުއްޓާލުމުގެ އެއްބަސްވުމާއެކު، އަހަރަކަށްވުރެ ގިނަ ދުވަހު ހިނގި ވަރުގަދަ ކުރިމަތިލުންތައް ނިމުމަކަށް އައި ނަމަވެސް، އިޒްރޭލުން ގެންދަނީ ހަނގުރާމަ ހުއްޓާލުމުގެ އެއްބަސްވުމާ ޚިލާފުވެ ހުއްޓުމެއް ނެތި ލުބުނާނަށް ހަމަލާތައް ދެމުންނެވެ.
އިޒްރޭލް ސިފައިން ތަކުރާރުކޮށް ބޮންއަޅައި ހަނގުރާމަ ހުއްޓާލުމުގެ އެއްބަސްވުމާ ޚިލާފުވަމުންދާއިރު، ލުބުނާނުގެ ފަސް ސަރަހައްދެއް އަދިވެސް އޮތީ އިޒްރޭލުގެ އިސްތިއުމާރުގެ ދަށުގައެވެ.
