އިޒްރޭލުން ލުބުނާނަށް ހަމަލާދީ ތިން މީހުން މަރާލައިފި
މި ހަމަލާތަކުގައި އީރާނުގެ ޤުދުސް ފޯސްގެ މެންބަރަކާއި ޙިޒްބުﷲގެ މެމްބަރަކު މަރާލާފައިވާ ކަމަށް އިޒްރޭލުން ބުނޭ. 2024 ވަނަ އަހަރުގެ ނޮވެމްބަރު މަހު ހަދާފައިވާ ހަނގުރާމަ ހުއްޓާލުމުގެ އެއްބަސްވުމާ ހިލާފަށް އިޒްރޭލުން ލުބްނާނަށް ހަމަލާތައް ދެމުން ގެންދޭ.
ސެޕްޓެމްބަރު 21، 2024 ގައި ލުބުނާނުގެ ދެކުނު ބެއިރޫތަށް އިޒްރޭލުން ދިން ހަމަލާ އެއްގައި ބޮޑެތި ގެއްލުންތަކެއް ލިބިފައިވާ މަންޒަރު
ލުބްނާނުން ބުނެފައިވާ ގޮތުގައި، ސީރިއާ ބޯޑަރާ ކައިރި ސަރަހައްދުތަކަށާއި، އެ ޤައުމުގެ ދެކުނުގެ ސަރަހައްދުތަކަށް އިޒްރޭލުން ބުރާސްފަތި ދުވަހު ދިން ހަމަލާތަކުގައި ތިން މީހުން މަރުވެއްޖެއެވެ.
މި ހަމަލާތައް ދީފައިވަނީ އީރާނުގެ އެލީޓް ޤުދުސް ފޯސްގެ މެންބަރަކަށާއި، ޙިޒްބުﷲގެ މެމްބަރަކަށް އަމާޒުކޮށް ކަމަށް އިޒްރޭލުން ބުނެފައިވެ އެވެ.
އިޒްރޭލާއި އީރާނުގެ އެހީގައި ހަރަކާތްތެރިވާ ޙިޒްބުﷲ ހަނގުރާމަވެރި ޖަމާޢަތާ ދެމެދު އެއް އަހަރަށްވުރެ ގިނަ ދުވަހު ހިނގި ހަމަލާތައް ނިންމާލުމަށް، 2024 ވަނަ އަހަރުގެ ނޮވެމްބަރު މަހު ހަދާފައިވާ ހަނގުރާމަ ހުއްޓާލުމުގެ އެއްބަސްވުމާ ހިލާފަށް، އިޒްރޭލުން ވަނީ ލުބްނާނަށް ހަމަލާތައް ދިނުން ކުރިއަށް ގެންގޮސްފަ އެވެ. އޭގެ އިތުރުން އެއްބަސްވުމުގެ ދަށުން އިޒްރޭލު ސިފައިން ފޭބުން ލާޒިމު ކޮށްފައި އޮތް ނަމަވެސް މުހިންމު ފަސް ސަރަހައްދެއްގައި އަދިވެސް އިޒްރޭލު ސިފައިން އެބަތިއްބެވެ.
ލުބްނާނުގެ ހެލްތު މިނިސްޓްރީން ބުނެފައިވަނީ، ހުއްޓާފައި އޮޔް އުޅަނދަކަށް އިޒްރޭލުގެ ދުޝްމަން ހަމަލާއެއް ދިނުމުގެ ސަބަބުން ދެ މީހުން މަރުވި ކަމަށެވެ.
އޭގެ ފަހުން އެ މިނިސްޓްރީން ރިޕޯޓްކޮށްފައިވަނީ، ލުބްނާނުގެ ދެކުނުގައިވާ މަޖްދަލް ސަލްމަށް އިޒްރޭލުން ދިން ހަމަލާއެއްގައި އެކަކު މަރުވި ކަމަށެވެ.
އިޒްރޭލުގެ އަސްކަރިއްޔާއިން ބުނެފައިވަނީ، އިސްލާމިކް ރިވޮލިއުޝަނަރީ ގާޑް ކޯޕްސްގެ ބޭރުގެ އޮޕަރޭޝަންތައް ހިންގާ ޤުދުސް ފޯސްގެ އޮޕަރޭޝަނަލް ޔުނިޓްގެ މުހިންމު ޓެރަރިސްޓެއް ކަމަށްވާ ހުސައިން މަޙްމޫދު މަރްޝަދު އަލް-ޖަވްހަރީ މަރާލާފައިވާ ކަމަށެވެ.
އިޒްރޭލުގެ އަސްކަރިއްޔާ އިން ބުނި ގޮތުގައި، އޭނާ ވަނީ ލުބްނާނާއި ސީރިއާ މަގުން އިޒްރޭލުގެ ދައުލަތަށާއި އެ ޤައުމުގެ ސެކިއުރިޓީ ފޯސްތަކަށް އީރާނުގެ ބެލުމުގެ ދަށުން ޓެރަރިސްޓް ހަރަކާތްތައް ރާވައި ހިންގުމުގައި ބައިވެރިވެފައެވެ.
އިޒްރޭލުގެ އަސްކަރިއްޔާއިން އިތުރަށް ބުނެފައިވަނީ މަޖްދަލް ސަލްމް ކައިރީގައިވާ ސަރަހައްދެއްގައި "ޙިޒްބުﷲގެ ޓެރަރިސްޓެއް" މަރާލާފައިވާ ކަމަށެވެ.
