ޓީ20 ވޯލްޑް ކަޕް: އިންޑިއާއާ ދެކޮޅަށް ކުޅޭ މެޗު ބޮއިކޮޓް ކުރަން ޕާކިސްތާން އިން ނިންމައިފި

ޓީ20 ވޯލްޑް ކަޕްގައި އިންޑިއާއާ ދެކޮޅަށް ކުޅެން ޖެހޭ މެޗު ބޮއިކޮޓް ކުރުމަށް ޕާކިސްތާން ސަރުކާރުން ނިންމައިފި އެވެ. 

މުބާރާތުގައި ޕާކިސްތާން އާއި އިންޑިއާ ބައްދަލު ކުރާ މެޗު އޮތީ ފެބްރުވަރީ މަހުގެ 15 ވަނަ ދުވަހު އެވެ. ނަމަވެސް، ޕާކިސްތާން އިން ވަނީ އެ މެޗު ބޮއިކޮޓް ކުރަން ނިންމައިފަ އެވެ. އިންޑިއާ މެޗު ބޮއިކޮޓް ކުރުމަށް ނިންމި ނަމަވެސް، މުބާރާތުގައި ދެން ހުރި މެޗުތައް ޕާކިސްތާން އިން ކުޅޭނެ އެވެ. 

ޕާކިސްތާންގެ އިންޓިރިއާ މިނިސްޓަރު އަދި ކްރިކެޓު ބޯޑުގެ ޗެއާމަން މުހުސިން ނަގްވީ ވަނީ، ހޮނިހިރު ދުވަހު ބަލޮޗިސްތާންގައި ދިން ހަމަލާތަކާ ގުޅިގެން އިންޑިއާ އަށް ފާޑު ކިޔުން އަމާޒުކޮށްފަ އެވެ. އެކި އެކި މަސްދަރު ތަކުން ބުނެފައިވާ ގޮތުގައި، އެ ހަމަލާ ތަކުގައި އާންމުންގެ ތެރެއިން 31 މީހަކާއި، ސަލާމަތީ ބާރު ތަކުގެ 17 މީހުންނާއި، ހަނގުރާމަވެރިންގެ 145 މީހަކު ވަނީ މަރުވެފަ އެވެ. 

އިންޑިއާއާ ދެކޮޅަށް ކުޅޭ މެޗު ބޮއިކޮޓް ކުރުމަށް އާދީއްތަ ދުވަހު ޕާކިސްތާން އިން ނިންމީ، މުބާރާތުން ބަންގްލަދޭޝް ބޭރު ކުރުމާ ގުޅިގެން، އިންޑިއާ އާއި ޕާކިސްތާނާ ދެމެދު އުފެދިފައިވާ ނުތަނަވަސްކަމުގެ ތެރެއިންނެވެ. 

ހޮނިހިރު ދުވަހު ބަލޮޗިސްތާން ޕްރޮވިންސްގެ ވެރި ރަށް ކުއެޓާ އާއި، އެހެން ސަރަހައްދު ތަކުގައި ފުލުހުންގެ ސްޓޭޝަން ތަަކަށް ހަމަލާ ދީފައިވާ ކަމަށް އޮފިޝަލުން ވަނީ ހާމަ ކޮށްފަ އެވެ. މިއީ ފާއިތުވި 10 އަހަރުގެ ތެރޭގައި ބަލޮޗިސްތާންގައި ދިން އެންމެ ބޮޑު ހަމަލާ ކަމަށް ބުނެފައިވާއިރު، ހަމަލާ ތަކުގައި 200 އަށް ވުރެ ގިނަ މީހުން މަރުވެފައިވާ ކަމަށް ވަނީ ބުނެފަ އެވެ. 

އޭއެފްޕީ އިން ބުނެފައިވާ ގޮތުގައިި، މަނާ ކޮށްފައިވާ ބަލޮޗިސްތާން ލިބަރޭޝަން އާމީ އިން ވަނީ މި ހަމަލާ ތަކުގެ ޒިންމާ ނަގައިފަ އެވެ. އެ ޖަމާއަތުން ބުނީ ބަލޮޗިސްތާންގެ ނުވަ ޑިސްޓްރިކްޓެއްގައި ސިފައިންގެ އިމާރާތް ތަކާއި، ފުލުހުން އަދި އިދާރީ އިސްވެރިންނަށް ވެސް ވަނީ ހަމަލާ ދީފަ އެވެ. 

ހަމަލާތައް ހިނގި ދުވަހު، އިންޑިއާ އަށް ފާޑު ކިޔަމުން ނަގްވީ ވިދާޅުވީ އެ ހަމަލާ ތަކުގެ ފަހަތުގައި އޮތީ އިންޑިއާ ކަމަށެވެ. ނަމަވެސް، އެހެން ވިދާޅުވެ އިންޑިއާ އަށް ތުހުމަތު އަމާޒު ކުރުން ފިޔަވައި، އިތުރު އެއްވެސް ހެއްކެއް އޭނާ އަށް ދެއްކިފައި ނުވެ އެވެ. 

މިދިޔަ ޖަނަވަރީ މަހުގެ 24 ވަނަ ދުވަހު އިންޓަނޭޝަނަލް ކްރިކެޓް ކައުންސިލް އިން ވަނީ ބަންގްލަދޭޝް އެ މުބާރާތުން ބޭރު ކޮށްލުމަށް ފަހު، އެ ޤައުމުގެ ޖާގަ އަށް ސްކޮޓްލޭންޑް އަށް ފުރުސަތު ދިނުމަށެވެ. އެއީ މުބާރާތުގައި ބަންގްލަދޭޝް އިން ކުޅެން ޖެހޭ މެޗުތައް، އިންޑިއާގައި ކުޅުމަށް އެ ޤައުމުން ދެކޮޅު ހަދާފައި ވަނިކޮށެވެ. 

އެގޮތުން ބަންގްލަދޭޝް އިން އެދިފައި ވަނީ އިންޑިއާގައި އެ ޤައުމުން ކުޅެން ހަމަޖެހިފައި އޮތް މެޗުތައް، ސްރީ ލަންކާ އަށް ބަދަލު ކޮށްދިނުމަށެވެ. މިފަހަރުގެ މުބާރާތް ބާއްވަނީ އިންޑިއާ އާއި ސްރީ ލަންކާ ގުޅިގެން ކަމަށްވާއިރު، ބަންގްލަދޭޝް ހިމެނޭ ގުރޫޕުގެ މެޗުތައް ކުޅުމަށް ހަމަޖެހިފައި ވަނީ އިންޑިއާގަ އެވެ. ނަމަވެސް، އައިސީސީ އިން ވަނީ ބަންގްލަދޭޝްގެ ހުށަހެޅުން ބަަލައި ނުގަންނަން ނިންމައިފަ އެވެ.

އެ ނިންމުމަށް ފާޑު ވިދާޅުވަމުން ނަގްވީ ވިދާޅުވީ، އައިސީސީ އިން އަމަލު ކުރަމުން އަންނަނީ ދެ ފަހަރު، ދެ ގޮތަށް ކަމަށެވެ. އެގޮތުން މީގެ ކުރިން ޕާކިސްތާންގައި މުބާރާތް ބޭއްވިއިރު، އިންޑިއާ އިން އެދިގެން އެ ޤައުމުން ޕާކިސްތާންގައި މެޗުތައް ނުކުޅެ، އެހެން ޤައުމެއްގައި ކުޅުމުގެ ފުރުސަތު ވަނީ ދީފަ އެވެ. އަދި ޕާކިސްތާން އަށް ވެސް އެ ފުރުސަތު ދީފައިވާއިރު، އިންޑިއާގައި މެޗުތައް ކުޅުމުގެ ބަދަލުގައި ޕާކިސްތާން އިން ކުޅޭނީ ސްރީ ލަންކާގަ އެވެ. 

އިންޑިއާ އާއި ޕާކިސްތާން މެޗަކީ މުޅި މުބާރާތުގައި ވެސް ގިނަ ބަޔަކު އެންމެ ބަލަން ބޭނުން ވާނެ އެއް މެޗެވެ. އެ މެޗު ނުކުޅޭ ނަމަ، ގާތް ގަނޑަކަށް 10 މިލިއަން މީހުންނަށް މެޗު ބެލުމުގެ ފުރުސަތު ގެއްލިގެން ދާނެ ކަމަށް ލަފާ ކޮށްފައިވެ އެވެ. ރެކޯޑު ތަކުން ދައްކާ ގޮތުގައި، 2021 ވަނަ އަހަރު އޮތް ޓީ20 ވޯލްޑް ކަޕްގައި އިންޑިއާ އާއި ޕާކިސްތާން ބައްދަލު ކުރި މެޗު 167 މިލިއަން މީހުން ބަލާފައިވާ ކަމަށް ވަނީ ރެކޯޑު ކުރެވިފަ އެވެ.

އިންޑިއާއާ ދެކޮޅަށް ކުޅޭ މެޗު ބޮއިކޮޓް ކުރުމުން، ޕާކިސްތާން އަށް ގުރޫޕް ސްޓޭޖުގައި ދެ ޕޮއިންޓު ގެއްލޭނެ އެވެ. އެ ދެ ޕޮއިންޓު އިންޑިއާ އަށް ލިބޭއިރު، މުބާރާތުގައި ކުރިއަށް ދިޔުމަށް ބާކީ ހުރި މެޗު ތަކުން ޕޮއިންޓު ހޯދުމަށް ޕާކިސްތާން އަށް މަޖުބޫރު ވާނެ އެވެ.