ނިޕާ ވައިރަސް ފެތުރުމުގެ ނުރައްކާ ކުޑަކަމަށް ޑަބްލިއުއެޗްއޯ އިން ބުނެފި

އިންޑިއާ ގައި ނިޕާ ވައިރަސް ޖެހުނު ދެ މީހުންނާ ސީދާ ދިމާވި 190 އަށްވުރެ ގިނަ މީހުންގެ ޓެސްޓުތައް ނެގެޓިވްވެ، އެއްވެސް މީހެއްގެ ކިބައިން ބަލީގެ އަލާމާތެއް ފެނިފައި ނުވާތީ، މި ބަލި ފެތުރުމުގެ ނުރައްކާ ކުޑަ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ހުކުރު ދުވަހު ބުނެފި އެވެ.

އިންޑިއާ އިން މި ބަލި ޖެހިފައިވާ ބަޔަކު ފެނުމާ ގުޅިގެން، ބަލި ފެތުރުނަ ނުދިނުމަށްޓަކައި ހޮންކޮންގް، މެލޭޝިއާ، ސިންގަޕޫރު، ތައިލެންޑް އަދި ވިއެޓްނާމް ފަދަ އޭޝިއާގެ ގައުމުތަކުގެ އެއާޕޯޓުތަކުގައި މި ހަފުތާގައި ވަނީ ސްކްރީން ކުރުމުގެ ކަންކަން ވަރުގަދަކޮށްފަ އެވެ.

ޖެނީވާގައި ބޭއްވި ނޫސްވެރިންގެ ބައްދަލުވުމެއްގައި ޑަބްލިއުއެޗްއޯގެ ހެލްތު އިމަޖެންސީސް ޕްރޮގްރާމްގެ އޮފިޝަލް އަނައީސް ލަގޯން ވިދާޅުވީ، ގައުމީ ފެންވަރުގައާއި، ސަރަހައްދީ އަދި ދުނިޔޭގެ ފެންވަރުގައި ވެސް މި ބަލި ފެތުރުމުގެ ނުރައްކާ އޮތީ ކުޑަ މިންވަރެއްގައި ކަމަށެވެ. އަދި ބަލި ޖެހުނު ދެ މީހުންގެ ކިބައިން ބަލީގެ އަލާމާތްތައް ފެންނަން ފެށި ފަހުން އެމީހުން ދަތުރުފަތުރު ކޮށްފައި ނުވާކަން އޭނާ ފާހަގަކުރެއްވި އެވެ. ބަލި ޖެހުނު ދެ މީހުންނަށް ވެސް މިހާރު ހޮސްޕިޓަލުގައި ފަރުވާ ދެމުންދާއިރު، އޭގެ ތެރެއިން އެކަކުގެ ހާލަތު ރަނގަޅުވަމުން އަންނަ ކަމަށް ވެސް ލަގޯން ވިދާޅުވި އެވެ.

ލަގޯން އިތުރަށް ވިދާޅުވީ، ވައިރަހަށް އެއްވެސް ބަދަލެއް (މިއުޓޭޝަން) އައިސްފައިވޭތޯ ބެލުމަށްޓަކައި، އިންޑިއާ އިން އެ ވައިރަހުގެ ޖެނެޓިކް ސީކުއެންސް ހިއްސާކުރާނެ ވަގުތަކަށް ޑަބްލިއުއެޗްއޯ އިން އިންތިޒާރު ކުރަމުންދާ ކަމަށެވެ. ނަމަވެސް މިވަގުތަށް ކަންބޮޑުވާންޖެހޭ ފަދަ އެއްވެސް ހެއްކެއް ފެންނަން ނެތް ކަމަށް އޭނާ ވިދާޅުވި އެވެ.

ވާލާއި އޫރު ފަދަ ޖަނަވާރުގެ ފަރާތުން ފެތުރޭ ނިޕާ ވައިރަހުގެ ސަބަބުން ގަދައަށް ހުން އައުމާއި ސިކުނޑި ދުޅަވުން ފަދަ ނުރައްކާތެރި މައްސަލަތައް ކުރިމަތިވެ އެވެ. މި ބަލި ޖެހޭ މީހުންގެ ތެރެއިން 40 އިންސައްތައާއި 75 އިންސައްތައާ ދެމެދުގެ އަދަދެއްގެ މީހުން މަރުވާއިރު، މި ބައްޔަށް އަދި މިހާތަނަށް ވަކި ޚާއްސަ ފަރުވާއެއް ހޯދިފައެއް ނުވެއެވެ. އަދި މި ބައްޔަށް ތައްޔާރުކުރާ ވެކްސިންތައް އަދިވެސް އުޅެނީ ޓެސްޓު ކުރުމުގެ މަރުހަލާގަ އެވެ.

މިފަހަރު ބަލި ފެތުރެން މެދުވެރިވި ސީދާ ސަބަބު އަދި މުޅިން ސާފެއް ނުވެ އެވެ.