ކަޝްމީރުގެ މެޑިކަލް ކޮލެޖަކުން މުސްލިމް ދަރިވަރުންނަށް މާ ގިނައިން ޖާގަ ދިނުމާ ގުޅިގެން، އެ ކޮލެޖު އިންޑިއާ ސަރުކާރުން ބަންދުކޮށްފި

އިންޑިއާގެ ބާރުގެ ދަށުގައި އޮންނަ ކަޝްމީރުގެ މަޝްހޫރު މެޑިކަލް ކޮލެޖަކަށް ގިނަ އަދަދެއްގެ މުސްލިމް ދަރިވަރުން ހޮވުމާ ގުޅިގެން، ހިންދޫ ހަރުކަށި ޖަމާއަތްތަކުން ކުރި އިހުތިޖާޖުތަކަށް ދީލާލައި، އިންޑިއާ ސަރުކާރުން އެ ކޮލެޖު ބަންދުކޮށްފި އެވެ.

އިންޑިއާގެ މެޑިކަލް ތައުލީމާއި ކަންކަން ރެގިއުލޭޓްކުރާ ފެޑަރަލް އިދާރާ، ނޭޝަނަލް މެޑިކަލް ކޮމިޝަން (އެން.އެމް.ސީ) އިން މިދިޔަ ޖެނުއަރީ މަހުގެ 6 ވަނަ ދުވަހު ވަނީ، ރިއާސީ ޑިސްޓްރިކްޓްގައި ހުންނަ 'ޝްރީ މާތާ ވައިޝްނޯ ދޭވީ މެޑިކަލް އިންސްޓިޓިއުޓް' (SMVDMI) އަށް ދީފައިވާ ހުއްދަ ބާތިލްކޮށްފަ އެވެ. މި ކޮލެޖަކީ ޖައްމޫ އާއި ކަޝްމީރުގެ ވާދީ ވަކިކޮށްދޭ ހިމާލަޔާ ފަރުބަދަތަކުގެ ސަރަހައްދުގައި އޮންނަ ތަނެކެވެ.

މި ކޮލެޖުގެ ފަސް އަހަރުގެ އެމް.ބީ.ބީ.އެސް ޕްރޮގްރާމަށް ނޮވެމްބަރު މަހު ހޮވުނު 50 ދަރިވަރުންގެ ތެރެއިން 42 ދަރިވަރުންނަކީ މުސްލިމުންނެވެ. މީގެ ތެރޭގައި ގިނައީ ކަޝްމީރުގެ ރަށްވެހިންނެވެ. ބާކީ ތިބި ދަރިވަރުންގެ ތެރޭގައި ހިމެނެނީ ހަތް ހިންދޫންނާއި އެއް ސިކް ދަރިވަރެކެވެ. މިއީ ހިންދޫ ދީނީ ޖަމާއަތަކުން އިސްނަގައިގެން، ސަރުކާރުގެ އެހީތެރިކަމާއެކު ހިންގާ މި ކޮލެޖުން ނެގި ފުރަތަމަ ބެޗެވެ.

އިންޑިއާގެ ހުރިހާ މެޑިކަލް ކޮލެޖަކަށް ވެސް، އެއީ އަމިއްލަ ތަނެއް ކަމުގައި ވިޔަސް ނުވަތަ ސަރުކާރުގެ ތަނެއް ކަމުގައި ވިޔަސް، ދަރިވަރުން ހޮވަނީ މަރުކަޒީކޮށް ބާއްވާ 'ނޭޝަނަލް އެންޓްރެންސް އެގްޒެމިނޭޝަން ޓެސްޓް' (ނީޓް) އިމްތިހާނު ހަދައިގެންނެވެ. މިއީ އިންޑިއާގެ އެޑިއުކޭޝަން މިނިސްޓްރީގެ ދަށުން ހިންގާ 'ނޭޝަނަލް ޓެސްޓިންގ އެޖެންސީ' (އެންޓީއޭ) އިން ބާއްވާ އިމްތިހާނެކެވެ.

ކޮންމެ އަހަރަކު ދެ މިލިއަނަށްވުރެ ގިނަ ދަރިވަރުން މި އިމްތިހާނުގައި ބައިވެރިވާއިރު، ގިނަ ދަރިވަރުން މަސައްކަތް ކުރަނީ ފީ ކުޑަ ސަރުކާރު ކޮލެޖުތަކުން ޖާގަ ހޯދުމަށެވެ. ނަމަވެސް އެފަދަ ތަންތަނަށް ވަދެވެނީ ވަރަށް މަތީ މާކްސްއެއް ލިބިގެންނެވެ. އަމިއްލަ ކޮލެޖުތަކަށް ވަދެވެނީ ސަރުކާރު ކޮލެޖުތަކުން ފުރުސަތު ނުލިބޭ، ނަމަވެސް އިމްތިހާނުން ވަކި ފާހެއް ލިބޭ ދަރިވަރުންނަށެވެ.

ކޮލެޖުގެ ފުރަތަމަ ބެޗުގައި މުސްލިމް ދަރިވަރުން ގިނަ އަދަދަކަށް ހިމެނޭކަން އެނގުމާއެކު، އެ ސަރަހައްދުގެ ހިންދޫ ޖަމާއަތްތަކުން ވަނީ އެ ދަރިވަރުންގެ އެޑްމިޝަން ބާތިލްކުރުމަށް ގޮވާލާ މުޒާހަރާ ފަށާފަ އެވެ. އެފަރާތްތަކުން ބުނަމުން ދިޔައީ މި ކޮލެޖަކީ ކަޝްމީރުގެ މަޝްހޫރު ހިންދޫ ފައްޅިއެއް ކަމަށްވާ 'މާތާ ވައިޝްނޯ ދޭވީ' އަށް މީހުން ހަދިޔާކުރާ ފައިސާއިން ހިންގާ ތަނަކަށް ވާތީ، މުސްލިމް ދަރިވަރުންނަށް އެތަނުން ފުރުސަތު ދީގެން ނުވާނެ ކަމަށެވެ. މި އިހުތިޖާޖުތައް ހަފުތާތަކަކަށް ދެމިގެންދިޔައިރު، ކޮލެޖު ދޮރުމަތީގައި ކޮންމެ ދުވަހަކު އަޑުގަދަކޮށް މުޒާހަރާ ކުރަމުން ދިޔައެވެ.

މި ދަނޑިވަޅުގައި، ބޮޑުވަޒީރު ނަރެންދުރަ މޯދީގެ ބީ.ޖޭ.ޕީ އަށް ނިސްބަތްވާ އެ ސަރަހައްދު ތަމްސީލު ކުރާ ގާނޫނު ހަދާ މަޖިލީހުގެ މެންބަރުން ވަނީ ކަޝްމީރުގެ ލެފްޓިނަންޓް ގަވަރުނަރަށް ސިޓީ ފޮނުއްވައި، އެ ކޮލެޖުން ޖާގަ ދޭންވާނީ ހަމައެކަނި ހިންދޫ ދަރިވަރުންނަށް ކަމަށް ބުނެ ޕްރެޝަރު ކޮށްފަ އެވެ. 2014 ވަނަ އަހަރުން ފެށިގެން މޯދީގެ ސަރުކާރަކީ މުސްލިމުންނާ އިދިކޮޅު ސިޔާސަތުތައް ގެންގުޅޭ ކަމުގެ ތުހުމަތު ކުރެވިފައިވާ ސަރުކާރެކެވެ.

މުޒާހަރާތައް ވަރުގަދަވަމުން ގޮސް، އެމީހުންގެ ޑިމާންޑްތައް ބަދަލުވެ، އެންމެ ފަހުން ކޮލެޖު އެއްކޮށް ބަންދުކުރުމަށް ގޮވާލަން ފެށި އެވެ.

އެންމެ ފަހުން، ޖެނުއަރީ 6 ވަނަ ދުވަހު ނޭޝަނަލް މެޑިކަލް ކޮމިޝަނުން ވަނީ އެ ކޮލެޖުގެ ހުއްދަ ބާތިލްކުރިކަން އިއުލާންކޮށްފަ އެވެ. އެ އިދާރާ އިން ސަބަބެއްގެ ގޮތުގައި ބުނީ، ކޮލެޖުގައި މެޑިކަލް ކޯސްތައް ހިންގުމަށް ބޭނުންވާ އެންމެ އަސާސީ ފެންވަރުގެ ވަސީލަތްތައް ނެތުމެވެ. އޭގެ ތެރޭގައި ކިޔަވައިދޭ މުދައްރިސުންގެ މަދުކަމާއި، އެނދުގެ އަދަދާއި، ބަލިމީހުން ބަލާ މިންވަރާއި، ލައިބްރަރީ އަދި އޮޕަރޭޝަން ތިއޭޓަރުތަކުގެ ފެންވަރު ދަށްވުން ހިމެނޭ ކަމަށް އެން.އެމް.ސީ އިން ބުންޏެވެ. އަދި އޭގެ އަނެއް ދުވަހު، ކޮލެޖު ހިންގުމަށް ދީފައިވާ ރަސްމީ ހުއްދަ ވަނީ އަނބުރާ ގެންގޮސްފަ އެވެ.