ޕާކިސްތާނުގެ ބަލޮޗިސްތާން ޕްރޮވިންސްގެ އެކި ސިޓީތަކަށް ވަކިވެގަންނަން މަސައްކަތްކުރާ ހަނގުރާމަވެރިން ދިން "ކޯޑިނޭޓެޑް" ހަމަލާތަކެއްގައި މަދުވެގެން އަށް ފުލުހުން މަރާލައިފި

ޕާކިސްތާނުގެ ހުޅަނގު ދެކުނުގައި އޮންނަ ބަލޮޗިސްތާން ޕްރޮވިންސްގެ އެކި ސިޓީތަކަށް ވަކިވެގަންނަން މަސައްކަތްކުރާ ހަނގުރާމަވެރިން ދިން "ކޯޑިނޭޓެޑް" ނުވަތަ ރޭވުންތެރި ހަމަލާތަކެއްގައި މަދުވެގެން ފުލުހުންގެ އަށް މީހަކު މަރާލާފައިވާ ކަމަށް އޮފިޝަލުން ވިދާޅުވެއްޖެ އެވެ.

އާދީއްތަ ދުވަހުގެ ފަތިހު އެތަނުގެ ގަޑިން 6:00  ހާއިރު ފެށި މި ހަމަލާތަކުގައި، ބަލޮޗިސްތާނުގެ ވެރިރަށް ކުއެޓާގައި ހުންނަ ފުލުހުންގެ ބައެއް މަރުކަޒުތަކަށް ބަލޮޗް ނަސްލުގެ ހަނގުރާމަވެރިން ވަނީ ހަމަލާ ދީފަ އެވެ. އަފްޣާނިސްތާނާއި އީރާނާ ބޯޑަރު ހިއްސާކުރާ، ގުދުރަތީ މައުދަނުން މުއްސަނދި މި ޕްރޮވިންސްގައި ދައުލަތުގެ ސަލާމަތީ ބާރުތަކަށާއި، ބޭރު ގައުމުތަކުގެ މީހުންނަށާއި އެ ސަރަހައްދަށް ނިސްބަތްނުވާ މީހުންނަށް އަމާޒުކޮށް ވަކިވެގަންނަން މަސައްކަތްކުރާ ގްރޫޕްތަކުން ހަރަކާތްތެރިވާތާ އެތައް އަހަރެއް ވަނީ ވެފަ އެވެ.

މީޑިއާ އަށް މައުލޫމާތު ދިނުމުގެ ހުއްދަ ނެތުމުން ނަން ހާމަނުކުރުމަށް އެދި ކުއެޓާގައި ހުންނަވާ ސަލާމަތީ ބާރުތަކުގެ އިސް އޮފިޝަލަކު އޭއެފްޕީ ނިއުސް އެޖެންސީ އަށް މައުލޫމާތު ދެއްވަމުން ވިދާޅުވީ، ބަޑީގެ ހަމަލާތަކާއި އަމިއްލަ އަށް މަރުވެގެންދޭ ބޮމުގެ ހަމަލާތައް ބަލޮޗިސްތާނުގެ އެކި ސަރަހައްދުތަކުގައި ދެމުންދާ ކަމަށެވެ. މީގެ ތެރޭގައި މައިގަނޑު ގޮތެއްގައި ކުއެޓާ، ޕަސްނީ، މަސްޓުންގް، ނުޝްކީ އަދި ގްވަދަރު ޑިސްޓްރިކްޓް ހިމެނޭ ކަމަށް އޭނާ ވިދާޅުވި އެވެ.

މި ހަމަލާތަކުގައި މަރުވި މީހުންގެ އަދަދާ ބެހޭގޮތުން އެއްޗެއް ވިދާޅުނުވި ނަމަވެސް، ސަލާމަތީ ބާރުތަކުން ދިން ވަރުގަދަ ރައްދު ހަމަލާތަކުގެ ސަބަބުންނާއި ހަމަލާ ރޭވުމުގައި ހުރި އުނިކަންކަމުގެ ސަބަބުން ހަނގުރާމަވެރިންގެ ރޭވުން ނާކާމިޔާބުވެފައިވާ ކަމަށް އެ އޮފިޝަލް އިތުރަށް ވިދާޅުވި އެވެ.

ޕާކިސްތާނުގެ ސަލާމަތީ ބާރުތަކުގެ ބައެއް މެންބަރުން ހަނގުރާމަވެރިން ރަހީނުކޮށްފައިވާ ކަމަށް ރިޕޯޓްތައް ބުނާއިރު، އެ ސަރަހައްދުގައި ސަލާމަތީ ބާރުތަކުން ޚާއްސަ އޮޕަރޭޝަނެއް ފެށުމާ ގުޅިގެން އިންޓަނެޓާއި ރޭލުގެ ޚިދުމަތް ވަނީ މެދުކަނޑާލާފަ އެވެ.

އޭއެފްޕީން ރިޕޯޓްކޮށްފައިވާ ގޮތުގައި، އެ ޕްރޮވިންސްގައި އެންމެ ހަރަކާތްތެރި ވަކިވެގަންނަން މަސައްކަތްކުރާ ޖަމާއަތް ކަމަށްވާ ބަލޮޗިސްތާން ލިބަރޭޝަން އާމީ (ބީއެލްއޭ) އިން ވަނީ މި ހަމަލާތަކުގެ ޒިންމާ އުފުލާފަ އެވެ. އެ ޖަމާއަތުން ބުނެފައި ވަނީ ބަޑީގެ ހަމަލާތަކާއި އަމިއްލަ އަށް މަރުވެގެންދޭ ބޮމުގެ ހަމަލާތަކުގައި އަމާޒުކޮށްފައި ވަނީ އަސްކަރީ މަރުކަޒުތަކަށާއި، ފުލުހުންނާއި ސިވިލް އެޑްމިނިސްޓްރޭޝަންގެ އޮފިޝަލުންނަށް ކަމަށެވެ.

ބީއެލްއޭގެ މި ދައުވާއާ ގުޅޭގޮތުން ޕާކިސްތާނު ސަރުކާރުން އަދި ވަކި އެއްޗެއް ބުނެފައެއް ނުވެ އެވެ.

ހޮނިހިރު ދުވަހު މި ހަމަލާތައް ދީފައިވަނީ، ބަލޮޗިސްތާނުގެ އެކި ސަރަހައްދުތަކުގައި ހިންގި ދެ އޮޕަރޭޝަނެއްގައި ހަތިޔާރު އެޅި 41 ހަނގުރާމަވެރިން މަރާލާފައިވާ ކަމަށް ޕާކިސްތާނު އަސްކަރިއްޔާއިން ބުނިތާ އެއްދުވަސް ފަހުންނެވެ. ބަލޮޗިސްތާނަކީ ގުދުރަތީ ވަސީލަތްތަކުން މުއްސަނދި ތަނެއް ނަމަވެސް، އެއީ ޕާކިސްތާނުގެ އެންމެ ފަގީރު ޕްރޮވިންސެވެ.

ފަހަކަށް އައިސް ބަލޮޗް ހަނގުރާމަވެރިން ވަނީ އެ ސަރަހައްދުގައި މަސައްކަތްކުރާ އަވަށްޓެރި ޕްރޮވިންސްތަކުގެ މީހުންނަށާއި، އެ ޕްރޮވިންސްގެ މުއްސަނދިކަން ނަހަމަ ގޮތުގައި ބޭނުންކުރާ ކަމަށް އެމީހުން ތުހުމަތުކުރާ ބޭރުގެ ހަކަތަ އުފައްދާ ކުންފުނިތަކަށް ދޭ ހަމަލާތައް ވަރުގަދަކޮށްފަ އެވެ.