ސޯޝަލް މީޑިއާގައި ކުރި ޕޯސްޓެއްގެ ސަބަބުން، ޕާކިސްތާނުގައި ހައްގު ތަކަށް މަސައްކަތް ކުރާ ދެ ވަކީލަކަށް 17 އަހަރުގެ ޙުކުމެއް

ޕާކިސްތާންގައި އިންސާނީ ހައްގު ތަކަށް ވަކާލާތުކޮށް، އެކަމަށް މަސައްކަތް ކުރަމުން އައި ދެ ޤާނޫނީ ވަކީލަކަށް 17 އަހަރުގެ ޖަލު ޙުކުމެއް އިއްވައިފި އެވެ. 

ޕާކިސްތާންގެ ކޯޓަކުން މި ޙުކުމް އިއްވާފައި ވަނީ ހޮނިހިރު ދުވަހު އެވެ. އެއީ ސޯޝަލް މީޑިއާގައި އެ ދެ ވަކީލުން ކޮށްފައިވާ ޕޯސްޓު ތަކެއްގެ ސަބަބުންނެވެ. އެ ޕޯސްޓުގައި ހިިމަނާފައިވާ ލިޔެކިޔުން ތަކަކީ ދައުލަތަށާއި، ސަލާމަތީ އިދާރާތަކާ ދެކޮޅު ލިޔުން ތަކެއް ކަމަށް އެ ޤައުމުގެ އިސްވެރިން ވަނީ ތުހުމަތު ކޮށްފަ އެވެ. 

ފަނޑިޔާރު އަފްޒަލް މަޖޯކާ މި ޙުކުމް ކުރައްވާފައި ވަނީ ޒައިނަބު މަޒާރީ އާއި އޭނާގެ ފިރިމީހާ ހާދީ އަލީ ޗައްތާ، އިސްލާމްއާބާދުން ހައްޔަރު ކުރިތާ އެއް ދުވަސް ފަހުންނެވެ. ކޯޓުގެ ލިޔެ ކިޔުން ތަކުން އެކަން ހާމަވާއިރު، މި ދެމަފިރިން ޝަރީއަތުގައި ބައިވެރިވެފައި ވަނީ ވީޑިއޯ މެދުވެރިކޮށެވެ. 

ކޯޓުގެ ޙުކުމުގައި ބުނެފައި ވަނީ މާޒާރީ ފާއިތުވި އަހަރު ތަކުގައި އެކްސްގައި ޕޯސްޓު ކޮށްފައިވާ ކަމަށެވެ. އެ ޕޯސްޓުތަކާއި، މަނާ ކުރެވިފައިވާ ޕާކިސްތާނީ ޠާލިބާނުގެ އެޖެންޑާ ދައްކުވައިދޭ ކަމަށް ބުނެފައިވެ އެވެ. އެ މައްސަލަ ހުށަހަޅާފައި ވަނީ 2025 ވަނަ އަހަރުގެ އޯގަސްޓު މަހުގެ ތެރޭގައި، ނެޝަނަލް ސައިބާ ކްރައިމް އިންވެސްޓިގޭޝަން އެޖެންސީ އަށް ހުށަހެޅި ޝަކުވާ އަކާ ގުޅިގެންނެވެ. 

އެ ޝަކުވާގައި ބުނެފައި ވަނީ މި ދެމަފިރިން ސޯޝަލް މީޑިއާ ބޭނުން ކޮށްގެން ދައުލަތާއި ސަލާމަތީ އިދާރާ ތަކުގެ ނަން ހަޑި ކޮށްފައިވާ ކަމަށެވެ. އެ ދެމަފިރިންގެ މައްޗަށް މިދިޔަ އަހަރުގެ އޯގަސްޓު މަހުގެ ތެރޭގައި ރަސްމީކޮށް ދައުވާ ކުރި ނަމަވެސް، ކޯޓަށް ހާޒިރު ކުރުމުން އޭރު ދޫކޮށްލާފައިވެ އެވެ. 

ފަނޑިޔާރު ކުރެއްވި ޙުކުމުގައި ވިދާޅުވެފައި ވަނީ މަޒާރީ ދެމެހެއްޓެނިވި ގޮތެއްގައި އަދި ވަރަށް ބޮޑާށް ދައުލަތާ ދެކޮޅު ކޮންޓެންޓް ސޯޝަލް މިީޑިއާގައި ފަތުރާފައިވާ ކަމަށެވެ. އަަދި އެކަން ކޮށްފައި ވަނީ އޭނާގެ ފިރިމީހާގެ ފުރިހަމަ އެއްބާރުލުމާ އެކު ކަމަށް ވެސް ފާހަގަ ކޮށްފައިވެ އެވެ. ޕްރޮސެކިއުޝަން އިން މަޒާރީ އަށް ތުހުމަތު ކޮށްފައި ވަނީ ދުޝްމަން ޓެރަރިސްޓު ގުރޫޕް ތަކާއި، މަނާ ކުރެވިފައިވާ ޖަމާއަތްތަކާއި، އަދި ފަރުދުންނާ އެއް ހަމައަކުންނެވެ. 

މަޒާރީ އާއި އޭނާގެ ފިރިމީހާ ހައްޔަރު ކުރުމާ އެކު، އިންސާނީ ހައްގު ތަކަށް މަސައްކަތް ކުރާ އެކި ޖަމިއްޔާ ތަކުން ވަނީ އެ ދެމަފިރިން މިނިވަން ކުރުމަށް ގޮވާލައިފަ އެވެ. އެމްނެސްޓީ އިންޓަނޭޝަނަލް އިން ހުކުރު ދުވަހު ނެރުނު ބަޔާނެއްގައި ބުނެފައި ވަނީ، އެ ދެމަފިރިން ހައްޔަރު ކުރުމަކީ ޕާކިސްތާންގެ އިސްވެރިން ކުރިއަށް ގެންދާ ބިރު ދެއްކުމުގެ އަމަލު ތަކުގެ ފަހުގެ އަމަލެއް ކަމަށެވެ. 

މީގެ އިތުރުން އެމްނެސްޓީ އިން ބުނެފައި ވަނީ އެ ދެމަފިރިން ހައްޔަރު ކޮށްފައި ވަނީ ކޯޓުގެ އަޑު އެހުން ތަކަށް ފުރިހަމަ އަށް އެއްބާރުލުން ދެމުން އަންނަނިކޮށް ކަމަށާއި، ހަމަލާ ދިނުމުގައި ބާރުގެ ބޭނުން ކޮށްފައިވާ ކަމަށް ހެކިން ބުނެފައިވާ ކަމަށެވެ. ނަމަވެސް ޕާކިސްތާންގެ ސަރުކާރުން ވަނީ އެ ހުކުމަށް ތައުރީފު ކޮށްފަ އެވެ.