ނިޕާ ވައިރަހުގެ ނުރައްކާ ރާއްޖެއަށް ކުޑަ, އަވަށްޓެރި ގައުމުތަކަށް ދަތުރުކުރާ ނަމަ ދިވެހީން ސަމާލުވާން ޖެހޭ: އެޗްޕީއޭ

ނިޕާ ވައިރަހުގެ ނުރައްކާ ރާއްޖެއަށް ކުޑަ ކަމަށާއި، ނަމަވެސް އެ ބަލީގެ ކޭސްތައް ފެނިފައިވާ، އަވަށްޓެރި އިންޑިއާގެ ވެސްޓް ބެންގާލް އަށް ދަތުރުކުރާ ނަމަ ދިވެހީން ސަމާލުވާން ޖެހޭ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ބުނެފި އެވެ.

އެޗްޕީއޭ އިން ބުނީ، ވެސްޓް ބެންގާލްއިން ނިޕާ ވައިރަހަށް ޕޮޒިޓިވްވި މީހުންނާ ކޮންޓެކްޓުވި 180އަށް ވުރެ ގިނަ މީހުން ދެނެގަނެވި އެ މީހުން މިހާރު ކަރަންޓީނުފައިވާ ކަމަށެވެ. އަދި ކަރަންޓީނު ކޮށްފައިވާ މީހުންގެ ހާލަތު ދަނީ އެ ގައުމުގެ ކަމާ ބެހޭ ފަރާތްތަކުން ވަރަށް ގާތުން ބަލަމުން ކަމަށް އެ އިދާރާއިން ބުންޏެވެ.

އަދި ބަލި ޖެހިގެން އިތުރު ކޭސްއެއް މިއަދާ ހަމައަށް ފެނިފައިނުވާއިރު، މި ކޭސްތަކާ ގުޅިގެން އިންޑިއާގެ އިތުރު އެހެން އެއްވެސް ސަރަހައްދަކުން އަދި އެހެން ގައުމަކުން އެ ބަލި ފެނިފައިވާ ކަމުގެ ރިޕޯޓެއް ކޮށްފައި ނުވާ ކަމަށް އެޗްޕީއޭ އިން ބުނެފައިވެ އެވެ. 

ދިވެހީން އާންމުކޮށް ދަތުރުކުރާ އިންޑިއާ އިން މި މަހު ވަނީ ނިޕާ ވައިރަހުގެ ކޭސްތަކެއް ފެނިފައެވެ. އެގޮތުން އިންޑިއާގެ ވެސްޓް ބެންގާލް އިން ނިޕާ ވައިރަހަށް ޕޮޒިޓިވް ތިން މީހަކު ވަނީ ފެނިފަ އެވެ. މީގެ ކުރީ އަހަރުތަކުގައި ނިޕާ ވައިރަހުގެ ކޭސްތަކެއް އިންޑިއާ އާއި އެހެން ގައުމުތަކުން ވެސް ފެނިފައިވެ އެވެ. އެހެންކަމުން ބަލި ފެނިފައިވާ ވެސްޓް ބެންގާލް ސަރަހައްދަށް ދަތުރުކުރާ ފަރާތްތަކުން އެކަމަށް ސަމާލުކަން ދިނުން މުހިންމު ކަމަށް އެ އިދާރާއިން ބުންޏެވެ.

ނިޕާ ވައިރަހަކީ ޓެރަޕޯސް އާއިލާގެ ވާލުންނާއި އޫރުން އިންސާނުންނަށް ފެތުރޭ ބައްޔެކެވެ. މި ބާވަތުގެ ވާ ކައިފައިޗާ މޭވާ ނުވަތަ ވާލުގެ ކުޅު ނުވަތަ ކުޑަކަމުދާ އެއްޗެހި ޖެހިފައިވާ މޭވާ އާއި ތަރުކާރީ ފަދަ ތަކެތި ބޭނުން ކުރުމުން އިންސާނުންނަށް ބަލި ފެތުރެއެވެ. އަދި ބަލި ޖެހިފައިވާ މީހުންނާ ގާތްކޮށް އުޅޭ ފަރާތްތަކަށް ވެސް ބަލި ފެތުރުމުގެ ފުރުސަތު އޮވެއެވެ.

ބަލި ޖެހޭ މީހުންގެ ފަރާތުން އާންމުކޮށް ފެންނަ އާންމު އަލާމާތްތަކުގެ ތެރޭގައި ހުން އައުން، ބޮލުގައި ރިއްސުން، ކެއްސުން، ކަރުގައި ރިއްސުން އަދި ނޭވާލާން އުނދަގޫވުން ހިމެނެއެވެ. މީގެ އިތުރު ބަލި ބޮޑުވަމުންދާ ވަރކަށް ބައެެއް މީހުންގެ ސިކުނޑި އަށް އަސަރުކޮށް، ވާނުވާ ނޭނގުން، ނުވަތަ ފިޓު ޖެހުން ހިމެނެ އެވެ.