ނިޕާ ވައިރަސްގެ ކޮންޓްރޯލް ކުރެވިފައިވާ ކަމަށް އިންޑިއާ އިން ބުނެފި

އިންޑިއާގެ ހުޅަނގު ބެންގާލް ސްޓޭޓުން ނިޕާ ވައިރަސްގެ ދެ ކޭސް އެއް ފެނިފައިވަނިކޮށް، ބަލި ކޮންޓްރޯލް ކުރެވިފައިވާ ކަމަށް އެ ޤައުމުގެ ކަމާބެހޭ ފަރާތްތަކުން ބުނެފި ކަމަށް އެސޯސިއޭޓެޑް ޕްރެސް (އޭޕީ) އިން ރިޕޯޓު ކޮށްފި އެވެ.

މި ބަލި ފެތުރުން ހުއްޓުވުމަށްޓަކައި އޭޝިއާގެ ބައެއް ޤައުމުތަކުން މިހާރު ވަނީ އެއާޕޯޓްތަކުގައި ސިއްޙީ ފާސްކުރުންތަކާއި ފާރަވެރިވުން ވަރުގަދަކޮށްފައެވެ.

އިންޑިއާގެ ހެލްތު މިނިސްޓްރީން ބުނި ގޮތުގައި މިދިޔަ ޑިސެމްބަރު މަހުން ފެށިގެން ނިޕާ ވައިރަސްގެ ދެ ކޭސް އެއް ފެނިފައިވާ ކަމަށާއި، އެ މީހުންނާ ބައްދަލުވި އެންމެން ވަނީ ކަރަންޓީނުކޮށް ޓެސްޓު ކުރެވިފައި ކަމަށެވެ. ބަލިޖެހުނު މީހުންގެ ތަފްސީލެއް މިނިސްޓްރީން ހާމައެއް ނުކުރެއެވެ. ނަމަވެސް، އެ މީހުންނާ ކޮންޓެކްޓްވި 196 މީހަކު ދެނެގަނެވިފައިވާ ކަމަށާއި، އެ އެންމެންގެ ޓެސްޓުތައް ނެގެޓިވްވެފައިވާ ކަމަށް ބުންޏެވެ.

"މި ހާލަތު ދަނީ މެދުނުކެނޑި މޮނިޓަރު ކުރެވެމުން. އަދި އާންމު ސިއްޙަތު ރައްކާތެރިކުރުމަށް އަޅަންޖެހޭ ހުރިހާ ފިޔަވަޅެއް ވަނީ އަޅާފައި،" މިނިސްޓްރީގެ ބަޔާނުގައިވެ އެވެ.

ނިޕާ ވައިރަހަކީ 1990 ގެ އަހަރުތަކުގައި ފުރަތަމަ ފަހަރަށް މެލޭޝިއާ އިން ފެނުނު، ޖަނަވާރުންގެ ފަރާތުން އިންސާނުންނަށް ފެތުރޭ ވައިރަހެކެވެ. މިއީ ވާލާއި، އޫރާއި، އަދި އެކަކު އަނެކަކުގެ ފަރާތުން ފެތުރޭ ބައްޔެކެވެ. މި ބައްޔަށް މިހާތަނަށް ވެކްސިނެއް އުފެއްދިފައެއް ނުވެއެވެ. ބަލީގެ އަލާމާތްތަކުގެ ތެރޭގައި ގަދަޔަށް ހުން އައުމާއި، ފިޓު ޖެހުމާއި، ހޮޑުލުން ހިމެނެ އެވެ. މި ބައްޔަށް ދެވޭ ހަމައެކަނި ފަރުވާއަކީ ބަލީގެ ސަބަބުން ދިމާވާ އިތުރު އުނދަގޫތައް ކޮންޓްރޯލްކޮށް، ބަލިމީހާ އަށް ލުއިކޮށްދިނުމަށް ދެވޭ އެހީތެރިކަމެވެ.

ދުނިޔޭގެ ސިއްޙަތު ޖަމްއިއްޔާ (ޑަބްލިޔުއެޗްއޯ) އިން ހާމަކުރާ ގޮތުގައި، މި ބަލީގައި މަރުވާ މީހުންގެ ނިސްބަތް އުޅެނީ 40 އިންސައްތަ އާއި 75 އިންސައްތަ އާ ދެމެދުގަ އެވެ. މިއީ ކޮވިޑް-19 އަށްވުރެ މާ ނުރައްކާތެރި ބައްޔެކެވެ.

އިންޑިއާ ފިޔަވައި އެހެން އެއްވެސް ޤައުމަކުން މި ބަލީގެ ކޭސްއެއް އަދި ފެނިފައެއް ނުވެއެވެ. ނަމަވެސް، ރައްކާތެރިކަމުގެ ފިޔަވަޅެއްގެ ގޮތުން އޭޝިއާގެ ބައެއް ޤައުމުތަކުން ވަނީ އެއާޕޯޓްތަކުގައި ސްކްރީން ކުރުން އިތުރުކޮށްފައެވެ. މި ފިޔަވަޅުތައް ވަރުގަދަކުރީ އިންޑިއާގައި ބަލިޖެހޭ މީހުންގެ އަދަދު ވަރަށް ބޮޑަށް އިތުރުވަމުންދާ ކަމަށް މީޑިއާތަކުން ރިޕޯޓުކުރުމާ ގުޅިގެންނެވެ. އެހެންނަމަވެސް، ސިއްޙީ އިދާރާތަކުން ބުނަނީ އެއީ ސައްޙަ މަޢުލޫމާތެއް ނޫން ކަމަށެވެ.

އިންޑޮނޭޝިއާ އާއި ތައިލެންޑުގެ ބޮޑެތި އެއާޕޯޓްތަކުގައި ދަތުރުވެރިންގެ ހުން ބެލުމާއި، ސިއްޙީ ލިޔެކިޔުންތައް ޗެކްކުރުން ވަނީ ފަށާފަ އެވެ. ތައިލެންޑުގެ ބެންކޮކްގެ ސުވަރްނަބޫމީ އެއާޕޯޓުގައި، ހުޅަނގު ބެންގާލުން އަންނަ ފްލައިޓްތަކުން ފައިބާ މީހުންގެ ހުން ބެލުމަށް ތާމަލް ސްކޭނަރުތައް ވަނީ ބަހައްޓާފަ އެވެ.

މިޔަންމާގެ ހެލްތު މިނިސްޓްރީން ވަނީ ކޮންމެހެން ކުރަންޖެހޭ ދަތުރެއް ނޫނީ ހުޅަނގު ބެންގާލަށް ނުކުރުމަށް އިރުޝާދު ދީފަ އެވެ. އަދި ދަތުރުކޮށްފައި އަންނަތާ 14 ދުވަސް ތެރޭގައި ބަލީގެ އަލާމާތެއް ފެނިއްޖެ ނަމަ، ލަސްނުކޮށް ފަރުވާ ހޯދުމަށް ވަނީ އެދިފަ އެވެ. ވިއެޓްނާމުން ވެސް ވަނީ ބޯޑަރުތަކާއި ސިއްޙީ މަރުކަޒުތަކުގައި ފާރަވެރިވުން އިތުރުކުރުމަށް އަންގާފަ އެވެ.

ޗައިނާ އިން ވެސް ވަނީ ބޯޑަރު ސަރަހައްދުތަކުގައި ބަލި ފެތުރުން ހުއްޓުވުމުގެ ފިޔަވަޅުތައް ވަރުގަދަކޮށް، ސިއްޙީ ދާއިރާގެ މުވައްޒަފުން ތަމްރީނުކުރުމާއި ޓެސްޓު ކުރުމުގެ ޤާބިލުކަން އިތުރުކުރަން ފަށާފަ އެވެ.

ކުރިން 2001 އަދި 2007 ވަނަ އަހަރު ވެސް ހުޅަނގު ބެންގާލުން ނިޕާ ވައިރަސް ފެނިފައިވެ އެވެ. ނަމަވެސް ފަހަކަށް އައިސް މި ބަލި ގިނައިން ފެންނަނީ އިންޑިއާގެ ދެކުނުގެ ކެރެލާ ސްޓޭޓުންނެވެ. އެގޮތުން 2018 ވަނަ އަހަރު ކެރެލާ ގައި މި ބަލި ފެތުރުމުގެ ސަބަބުން މަދުވެގެން 17 މީހުން މަރުވެފައިވެ އެވެ.