ފުލަމް ވެސް ބަލިކޮށް، ޔުނައިޓެޑު ރަނގަޅު މިސްރާބުގައި

އިނގިރޭސި ޕްރިމިއާ ލީގުގައު ފުލަމްއާ ދެކޮޅަށް ކުޅުނު މެޗުން ވެސް މޮޅުވެ، މެންޗެސްޓަރ ޔުނައިޓެޑުން އެ ޓީމުގެ ފޯމު ދަމަހައްޓައިފި އެވެ.

ޔުނައިޓެޑުގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 3-2 އިންނެވެ. މެޗުގައި ޔުނައިޓެޑުން ދެ ލަނޑު ޖަހައި ކުރި ހޯދާފައި ވަނިކޮށް، ފުލަމް އިން ވަނީ ފަހަތުން އަރައި ނަތީޖާ ހަމަހަމަ ވެސް ކޮށްފަ އެވެ. ނަމަވެސް، ފަހު ވަގުތު ލަނޑު ޖަހައިގެން ޔުނައިޓެޑު ވަނީ މެޗުން މޮޅުވެފަ އެވެ. 

މެޗު ފަށައިގެން 19 ވަނަ މިނެޓުގައި ޔުނައިޓެޑަށް ލަނޑު ޖަހައި ލީޑު ނަގައިދިނީ ކަސެމީރޯ އެވެ. އެއީ ކެޕްޓަން ބްރޫނޯ ފެނާންޑޭސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން ދެ ވަނަ ހާފު ފަށައިގެން އެގާރަ ވަނަ މިނެޓުގައި ޔުނައިޓެޑުގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ މަތެއުސް ކުންހާ އެވެ. 

މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް ފުލަމް އަށް ލިބުނު ޕެނަލްޓީ ކާމިޔާބުކޮށް ފަރަގު ކުޑަ ކުރީ ރައުލް ހިމިނޭޒް އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގެ ފުރަތަމަ މިނެޓުގައި ކެވިން ވަނީ ލަނޑު ޖަހައި ފުލަމް އަށް ނަތީޖާ ހަމަހަމަ ކޮށްދީފަ އެވެ.

އޭގެ ތިން މިނެޓު ފަހުން ޔުނައިޓެޑުގެ ބެންޖަމިން ސެސްކޯ ވަނީ ލަނޑު ޖަހައި މެޗުން ޔުނައިޓެޑު މޮޅު ކޮށްދީފަ އެވެ. އެ ލަނޑު ޖަހަން ސެސްކޯ އަށް ވެސް ފުރުސަތު ތަނަވަަސްކޮށްދިނީ ފެނާންޑޭސް އެވެ. 

މޮޅާއެކު ލީގު ތާވަލްގެ ހަތަރު ވަނަ މަގާމުގައި ޔުނައިޓެޑު އޮތީ މިހާތަނަށް އެ ޓީމު ކުޅެފައިވާ 24 މެޗުން 41 ޕޮއިންޓާ އެކު އެވެ. ޔުނައިޓެޑުގެ ކޯޗުކަމާ މައިކަލް ކެރިކް ހަވާލުވީ ފަހުން މިހާތަނަށް ކުޅުނު ތިން މެޗުން ވެސް އެ ޓީމު މި ވަނީ މޮޅުވެފަ އެވެ.