ފުލަމް ކައިރިން ލިވަޕޫލް އަށް ޕޮއިންޓެއް

އިނގިރޭސި ޕްރިމިއާ ލީގުގައި ފުލަމްއާ ދެކޮޅަށް ކުޅުނު މެޗުން، އެންމެ ފަހުގެ ޗެމްޕިއަން ލިވަޕޫލް އެއްވަރު ވެއްޖެ އެވެ.

ފުލަމްގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި ފުލަމް އިން ލަނޑު ޖަހައި ކުރި ހޯދާފައި ވަނިކޮށް، ލިވަޕޫލް އިން ވަނީ ފަހަތުން އަރައި ދެ ލަނޑު ޖަހައިގެން ލީޑު ނަގައިފަ އެވެ. ނަމަވެސް، ފަހު ވަގުތުގައި ލަނޑު ޖަހައިގެން ފުލަމް އިން ވަނީ ނަތީޖާ ހަމަހަމަ ކޮށްފަ އެވެ.

މެޗު ފަށައިގެން 17 ވަނަ މިނެޓުގައި ފުލަމް އިން ވަނީ ލިވަޕޫލް ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު ފުލަމް އަށް ޖަހައިދިނީ  ހެރީ ވިލްސަން އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ރައުލް ހިމިނޭޒް އެވެ.

ނަމަވެސް، މެޗުގެ ދެ ވަނަ ހާފު ފަށައިގެން ކުރީ ކޮޅު ލިވަޕޫލް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެގޮތުން ދެ ވަނަ ހާފު ފަށައިގެން 12 ވަނަ މިނެޓުގައި ލިވަޕޫލް އަށް ނަތީޖާ ހަމަހަމަ ކޮށްދިނީ ފްލޯރިއަން ވާޓްޒް އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލިވަޕޫލް އަށް ލީޑު ނަގައިދިނީ ކޯޑީ ގަކްޕޯ އެވެ. 

ލިވަޕޫލް އިން ލީޑު ނެގިތާ ގިނަ އިރު ތަކެއް ނުވަނީސް، ފުލަމް އިން ވަނީ ދެ ވަނަ ލަނޑެއް ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ހެރިސަން ރީޑް އެވެ. އެއީ ކެވިން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މި ނަތީޖާ އާއެކު ލިވަޕޫލް އޮތީ ލީގު ތާވަލްގެ ހަތަރު ވަނައިގަ އެވެ. އެއީ މިހާތަނަށް ކުޅެފައިވާ 20 މެޗުން 34 ޕޮއިންޓާ އެކު އެވެ.

މެޗު އެއްވަރުވެފައިވާއިރު، އެ ނަތީޖާއާ ގުޅޭ ގޮތުން ވާހަކަ ދައްކަމުން ލިވަޕޫލްގެ ކޯޗު އާން ސްލޮޓް ބުނެފައި ވަނީ، އެކަން ތަޖުރިބާ ކުރަމުން އަންނަތާ ދުވަސް ތަކެއް ވެފައިވާ ކަމަށެވެ. އޭނާ ބުނީ އިދިކޮޅަށް ޓީމަށް ފުރަތަމަ ހާފުގައި ލިބުނު ފުރަތަމަ ފުރުސަތުގައި އެ މީހުން ލަނޑު ޖަހާފައިވާ ކަމަށެވެ. އެކަމަކު، ދެ ވަނަ ހާފަށް ނިކުމެ ލިވަޕޫލް އިން މަސައްކަތްކޮށް ދެ ލަނޑު ޖަހައިގެން ލީޑު ނެގި ކަމަށް އޭނާ ބުންޏެވެ. 

އޭނާ ބުނީ މެޗުގެ އިތުރު ވަގުތުގައި ލިވަޕޫލް އިން ލީޑު ނަގާފައި ވަނިކޮށް، ހީވެސް ނުކުރާ ގަޑިއެއްގައި، ހީވެސް ނުކުރާ ގޮތަކަށް ފުލަމް އިން ދެ ވަނަ ލަނޑު ޖެހި ކަމަށެވެ. އެހެންކަމުން އެއީ ވަރަށް ބޮޑު ހައިރާން ކަމެއް ކަމަށް ސްލޮޓް ބުންޏެވެ. ސްލޮޓް ބުނީ އޭނާ ގެ ވިސްނުން އެއްވެސް ވަރަކަށް ބަދަލު ނުވާ ކަމަށާއި، ތިބި ކުޅުންތެރިންނާ އެކު މަސައްކަތް ކުރާނެ ކަމަށެވެ.