ނިއުކާސަލް ބަލިކޮށް، ލިވަޕޫލް ފަސް ވަނަ އަށް

އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން މޮޅުވެ، ލިވަޕޫލް އިން ލީގު ތާވަލްގެ ފަސް ވަނަ މަގާމަށް ޖެހިލައިފި އެވެ. 

ލިވަޕޫލްގެ އަމިއްލަ ދަނޑު، އެންފީލްޑުގައި ހޮނިހިރު ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ހާފުގައި ނިއުކާސަލް އިން ލަނޑު ޖަހައި ކުރި ހޯދާފައި ވަނިކޮށް، ލިވަޕޫލް އިން ވަނީ ފަހަތުން އަރައި ދެ ލަނޑު ޖަހައިގެން ކުރި ހޯދައިފަ އެވެ. ލިވަޕޫލްގެ އަނެއް ދެ ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 36 ވަނަ މިނެޓުގައި ނިއުކާސަލް އަށް ލީޑު ނަގައިދިނީ އެންތަނީ ގޯޑަން އެވެ. ނަމަވެސް، އޭގެ ފަސް މިނެޓު ފަހުން ހޫގޯ އެކިޓީކޭ ވަނީ ލަނޑު ޖަހައި ލިވަޕޫލް އަށް ނަތީޖާ ހަމަހަމަ ކޮށްދީފަ އެވެ. އޭގެ ދެ މިނެޓު ފަހުންް އެކިޓީކޭ ވަނީ ދެ ވަނަ ލަނޑެއް ޖަހައި ލިވަޕޫލް އަށް ކުރި ހޯދައިދީފަ އެވެ.

މެޗުގެ 67 ވަނަ މިނެޓުގައި ލިވަޕޫލްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ ފްލޯރިއަން ވާޓްޒް އެވެ. އެ ލަނޑު ޖަހަން ވާޓްޒް އަށް ފުރުސަތު ތަނަވަސްކޮށްދިނީ މިޞްރުގެ ފޯވާޑު މުޙައްމަދު ޞަލާޙު އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލިވަޕޫލްގެ ހަތަރު ވަނަ ލަނޑު ޖެހީ އިބްރާހިމާ ކޮނާޓޭ އެވެ. 

މެޗުން މޮޅުވެ ލިވަޕޫލް އިން ލީގު ތާވަލްގެ ފަސް ވަނަ އަށް ޖެހިލާފައިވާއިރު، މިހާތަނަށް ކުޅެފައިވާ 24 މެޗުން އެ ޓީމަށް ލިބެނީ 39 ޕޮއިންޓެވެ. މި ސީޒަންގައި ލިވަޕޫލްގެ ނަތީޖާތަށް ވަރަށް ބޮޑަށް ދަށްވެފައިވާއިރު، އެ ޓީމުގެ ކޯޗު އާން ސްލޮޓަށް އަންނަނީ ފާޑު ކިޔުން އަމާޒު ވަމުންނެވެ.