ފުލަމް އަތުން ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ފުލަމްއާ ދެކޮޅަށް ކުޅުނު މެޗުން ޗެލްސީ ބަލިވެއްޖެ އެވެ. 

ފުލަމްގެ އަމިއްލަ ދަނޑުގައި ބުދަ ދުވަހުގެ ރޭ ދަންވަރު ކުޅުނު މެޗުގައި އެ ޓީމުން ވަނީ 2-1 އިން ޗެލްސީ ބަލިކޮށްފަ އެވެ. މެޗުގައި ފުލަމް އިން ލަނޑު ޖަހައި ކުރި ހޯދާފައި ވަނިކޮށް، ޗެލްސީ އިން ނަތީޖާ ހަމަހަމަ ވެސް ކުރި އެވެ. ނަމަވެސް ފަހު ވަގުތުގައި ލަނޑު ޖަހައިގެން ފުލަމް ވަނީ މެޗުން މޮޅުވެފަ އެވެ. 

މެޗުގައި ޗެލްސީ އަށް އެންމެ ބޮޑު ގެއްލުމެއް ދެއްކީ މެޗުގެ 22 ވަނަ މިނެޓުގައި އެ ޓީމުގެ މާކް ކުކުރޭލާ އަށް ސީދާ ރަތް ކާޑު ދައްކައި ދަނޑުން ފޮނުވާލުމުންނެވެ. މެޗުގެ ފުރަތަމަ ހާފުގެ އިތުރު ވަގުތުގައި ފުލަމް އިން ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ.

ނަމަވެސް، މެޗުގެ ދެ ވަނަ ހާފު ފަށައިގެން ދިހަ ވަނަ މިނެޓުގައި ފުލަމް އިން ލަނޑު ޖަހައި ލީޑު ނެގި އެވެ. އެ ލަނޑު އެ ޓީމަށް ޖަހައިދިނީ ރައުލް ހިމިނޭޒް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ސަންޑާ ބާޖް އެވެ. އޭގެ ފަހުން މެޗުގެ 72 ވަނަ މިނެޓުގައި ލިއަމް ޑެލަޕް ވަނީ ލަނޑު ޖަހައި ޗެލްސީ އަށް ނަތީޖާ ހަމަހަމަ ކޮށްދީފަ އެވެ.

މެޗު އެއްވަރުވާން ދަނިކޮށް، ފުލަމް އިން ވަނީ ދެ ވަނަ ލަނޑެއް ޖަހައިގެން ޗެލްސީ ބަލިކޮށްފަ އެވެ. މެޗުގެ ފުރިހަމަ ވަގުތު ހަމަވާން ނުވަ މިނެޓަށް ވެފައި ވަނިކޮށް، ފުލަމް އަށް އެ ލަނޑު ޖަހައިދިނީ ހެރީ ވިލްސަން އެވެ. 

މިއީ ޗެލްސީގެ ކޯޗު ކަމުން އެންޒޯ މަރެސްކާ ވަކިވި ފަހުން އެ ޓީމުން ކުޅުނު ދެ ވަނަ މެޗެވެ. ފުރަތަމަ މެޗުގައި ޗެލްސީ އިން ވަނީ މެންޗެސްޓަރ ސިޓީއާ އެއްވަރު ކޮށްފަ އެވެ. ދެ ވަނަ މެޗުގައި ފުލަމް އަތުން ބަލިވެފައިވާއިރު، ޗެލްސީގެ ނަތީޖާތައް އަންނަނީ ދަށްވަމުންނެވެ.

މެޗުން ބަލިވެ ޗެލްސީ އޮތީ ލީގު ތާވަލްގެ އަށް ވަނަ މަގާމުގަ އެވެ. އެއީ މިހާތަނަށް ލީގުގައި ކުޅެފައިވާ 21 މެޗުން 31 ޕޮއިންޓާ އެކު އެވެ. މި ސީޒަންގެ ޕްރިމިއާ ލީގުގައި ޗެލްސީ މޮޅުވެފައި ވަނީ އަށް މެޗުންނެވެ. ހަ މެޗުން ބަލިވެފައިވާއިރު، ހަތް މެޗުން ވަނީ އެއްވަރުވެފަ އެވެ.