ނިއުކާސަލް އަތުން މޮޅުވެ ޔުނައިޓެޑަށް ހަމަ ޖެހުމެއް

އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ޔުނައިޓެޑުން ހަމަ ޖެހުމެއް ހޯދައިފި އެވެ. 

ޔުނައިޓެޑުގެ އަމިއްލަ ދަނޑުގައި ހުކުރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި ޔުނައިޓެޑުން އެ ޓީމުގެ ހަމައެކަނި ލަނޑު ޖެހީ ވެސް މެޗުގެ ފުރަތަމަ ހާފުގަ އެވެ. 

މެޗު ފަށައިގެން ވެސް ޔުނައިޓެޑުން ވަނީ ރަނގަޅަށް ކުޅެން މަސައްކަތް ކޮށްފަ އެވެ. މެޗުގެ ކުރީ ކޮޅު ޔުނައިޓެޑުގެ ޕެޓްރިކް ޑޯގޫ ތަނަވަސްކޮށްދިން ފުރުސަތެއްގައި ބެންޖަމިން ސެސްކޯ ފޮނުވާލި ބޯޅަ ގޯލާ އަމާޒުވާ ގޮތެއް ނުވި އެވެ. އޭގެ ފަހުން ޔުނައިޓެޑުގެ މަތުއުސް ކުންހާ ފޮނުވާލި ބޯޅަ ނިއުކާސަލްގެ ގޯލު ކީޕަރު ވަނީ މަތަކޮށްފަ އެވެ. 

މެޗުގައި ޔުނައިޓެޑުން ލަނޑު ޖަހައި ލީޑު ނަގާފައި ވަނީ 24 ވަނަ މިނެޓުގަ އެވެ. އެއީ ޔުނައިޓެޑަށް ލިބުނު އެއްލުމެއްގައި އެ ޓީމުގެ ކުޅުންތެރިޔަކު އެއްލި ބޯޅަ ނިއުކާސަލްގެ ކުޅުންތެރިޔެއްގެ ބޮލުގައި ޖެހިފައި ލިބުނު ވަގުތު، އެއް ފަހަރުން ޖަހައި ގޯލަަށް ފޮނުވާލައިގެން ޑޯއޫ ޖެހި ލަނޑެވެ. މިއީ ޔުނައިޓެޑުގައި އޭނާ ޖެހި ފުރަތަމަ ލަނޑެވެ. 

އޭގެ ފަހުން ވެސް މެޗުގައި ޔުނައިޓެޑަށް ވަނީ އިތުރު ލަނޑު ޖަހަން ފުރުސަތު ލިބިފަ އެވެ. މޮޅާއެކު މިވަގުތު ޔުނައިޓެޑު އޮތީ ލީގު ތާވަލްގެ ފަސް ވަނަ މަގާމުގަ އެވެ. އެއީ މިހާތަނަށް ކުޅެފައިވާ 18 މެޗުން 29 ޕޮއިންޓާ އެކު އެވެ. ނިއުކާސަލްއާ ދެކޮޅަށް ޔުނައިޓެޑު ނިކުތީ އެ ޓީމުގެ ފުރަތަމަ 11 އަށް ބޮޑު ބަދަލު ތަކެއް ގެެނެސްގެންނެވެ.

މެޗަށް ފަހު ވާހަކަ ދައްކަމުން ޔުނައިޓެޑުގެ ކޯޗު ރުބެން އަމޯރިމް ބުނެފައި ވަނީ، އެ މެޗުގައި ޔުނައިޓެޑުން ކަންކަން ތަހަންމަލު ކުރަން ޖެހުނު ކަމަށެވެ. އޭނާ ބުނީ މެޗުގެ ފުރަތަމަ ހާފުގައި ޔުނައިޓެޑުން ރަނގަޅު ކުޅުމެއް ދައްކައި ލީޑު ވެސް ނެގި ކަމަށެވެ. އަދި އެއާއެކު، ދެ ވަނަ ހާފުގައި އިތުރު ލަނޑު ޖަހަން މަސައްކަތް ކުރިއިރު، ޑިފެންސްގައި ވެސް މޮޅު ކުޅުމެއް ދެއްކި ކަމަށް އޭނާ ބުންޏެވެ.

ނިއުކާސަލް މެޗަކީ ވަރަށް ރަނގަޅު މެޗެއް ކަމަށް ފާހަގަކޮށް އަމޯރިމް ބުނީ، މީގެ ކުރިން ވެސް ގިނަ މެޗު ތަކުގައި ޔުނައިޓެޑުން ރަނގަޅަށް ކުޅެފައިވާ ކަމަށެެވެ. އެހެން ނަމަވެސް، އެ ޓީމަށް ހަމައެކަނި މަދުވަނީ ތިން ޕޮއިންޓު ކަމަށް އަމޯރިމް ބުންޏެވެ. އެއާ ޚިލާފަށް ނިއުކާސަލް މެޗުގައި އެތައް އުނދަގޫ ތަކާ އެކު ވެސް، އެކަންކަމާ ކުރިމަތިލައި ޔުނައިޓެޑު މޮޅުވެފައިވާ ކަމަށް އޭނާ ބުންޏެވެ.

މީގެ އިތުރުން އަމޯރިމް ބުނީ ކުޅުންތެރިން ކުރި މަސައްކަތާ މެދު އޭނާ ހިތްހަމަ ޖެހޭ ކަމަށާއި، ނަތީޖާއާ މެދު ވެސް އުފާވާ ކަމަށެވެ. އަދި ކުރިއަށް އޮތް ތަނުގައި ޔުނައިޓެޑުން އިތުރު ކަންކަން ރަނގަޅުކޮށް، ނަތީޖާ ދަމަހައްޓަން މަސައްކަތް ކުރާނެ ކަމަށް އަމޯރިމް ބުންޏެވެ. އޭނާ ބުނީ ޔުނައިޓެޑުގައި ތިބި ކޮންމެ ކުޅުންތެރިޔަކީ ވެސް ހުނަރުވެރި، އަދި ޤާބިލު ކުޅުންތެރިން ކަމަށެވެ. ޚާއްސަކޮށް ފަރިތަކުރުން ތަކުގައި ރަނގަޅަށް މަސައްކަތްކޮށް، މެޗުގައި އެކަން ދެއްކުމަކީ އެންމެ މުހިންމު ކަންތައް ކަމަށް އޭނާ ބުންޏެވެ.