14 މަހަށް ފަހު ޔުނައިޓެޑުން އަމޯރިމް ވަކި ކޮށްފި

މެންޗެސްޓަރ ޔުނައިޓެޑަށް އިރުޝާދު ދެމުން އައި ޕޯޗުގަލްގެ ރުބެން އަމޯރިމް ކުއްލި ގޮތަކަށް ވަކި ކޮށްފި އެވެ.

އުމުރުން 40 އަހަރުގެ އަމޯރިމް ޔުނައިޓެޑާ ހަވާލުވީ 2024 ވަނަ އަހަރުގެ ނޮވެމްބަރު މަހުގެ ތެރޭގަ އެވެ. އެ ކުލަބާ އެކު އަމޯރިމް ސޮއި ކޮށްފައި އޮތީ ތިން އަހަރު ދުވަހުގެ އެއްބަސްވުމަކަށް ވާއިރު، އެއްބަސްވުމުގެ މުއްދަތު ހަމަވާން އޮތީ 2027 ވަނަ އަހަރު އެވެ. ނަމަވެސް، އަމޯރިމްގެ އިރުޝާދުގެ ދަށުން ވެސް ޔުނައިޓެޑުގެ ނަތީޖާތައް ދަށްވެފައިވާތީ، އެ ކުލަބުން ވަނީ އޭނާ ވަކި ކޮށްފަ އެވެ.

އަމޯރިމްގެ އިރުޝާދުގެ ދަށުން އެންމެ ފަހުން ޔުނައިޓެޑުން ކުޅުނު މެޗަކީ އިނގިރޭސި ޕްރިމިއާ ލީގުގައި ލީޑްސް ޔުނައިޓެޑާ ދެކޮޅަށް ކުޅުނު މެޗެވެ. އެ މެޗު އެއްވަރު ވެގެން ނިމުނުއިރު، އޭގެ ފަހުން އަމޯރިމް ވަކި ކޮށްފާނެ ކަމުގެ އަޑުތައް ވެސް އޮތީ ފެތުރިފަ އެވެ. ޔުނައިޓެޑުގެ ކޯޗު ކަމުން އަމޯރިމް ވަކި ކޮށްފައި ވަނީ ހޯމަ ދުވަހު އެވެ.

ޔުނައިޓެޑުން ނެރެފައިވާ ބަޔާނެއްގައި ބުނެފައި ވަނީ، ޕްރިމިއާ ލީގު ތާވަލްގެ ހަ ވަނައިގައި ޔުނައިޓެޑު އޮތްއިރު، މިއީ ކުލަބަށް ބަދަލު ގެންނަން ޖެހޭ ވަގުތު ކަމަށް ޤަބޫލު ކުރެވިފައިވާ ކަމަށެވެ. އެކަމުގެ ސަބަބުން ޔުނައިޓެޑަށް ޕްރިމިއާ ލީގުގައި އެންމެ ރަނގަޅު ހިސާބުގައި ނިންމާލުމުގެ ފުރުސަތު ލިބޭނެ ކަމަށް ވެސް ވަނީ ބުނެފަ އެވެ. ޔުނައިޓެޑުން ވަނީ ފާއިތުވި މުއްދަތުގެ ތެރޭގައި އަމޯރިމް ޔުނައިޓެޑަށް ކޮށްދިން ޚިދުމަތް ތަކަށް ޝުކުރު އަދާ ކޮށްފަ އެވެ.

އަމޯރިމްގެ އިރުޝާދުގެ ދަށުން ޔުނައިޓެޑުން ވަނީ 63 މެޗު ކުޅެފަ އެވެ. އޭގެ ތެރެއިން ޔުނައިޓެޑު މޮޅުވެފައި ވަނީ 24 މެޗުންނެވެ. 21 މެޗުން ބަލިވެފައިވާއިރު، 18 މެޗުން ވަނީ އެއްވަރުވެފަ އެވެ. މި ސީޒަންގެ ޕްރިމިއާ ލީގުގައި ޔުނައިޓެޑުން 20 މެޗު ކުޅެފައިވާއިރު، މޮޅުވެފައި ވަނީ އަށް މެޗުންނެވެ. ފަސް މެޗުން ބަލިވެފައިވާއިރު، ހަތް މެޗުން ވަނީ އެއްވަރުވެފަ އެވެ.

އަމޯރިމްގެ އިރުޝާދުގެ ދަށުން ޔުނައިޓެޑުން ވަނީ ޔޫރޮޕާ ލީގުގެ ފައިނަލްގައި ކުޅެފަ އެވެ. ނަމަވެސް ފައިނަލްގައި ވަނީ ބަލިވެފަ އެވެ. އަމޯރިމް ވަކި ކުރުމަށް ފަހު ޔުނައިޓެޑުން އައު ކޯޗެއް ހޯދުމުގެ މަސައްކަތް ކުރަމުން އަންނައިރު، ވަގުތީ ގޮތުން އެ ޓީމަށް އިރުޝާދު ދޭނީ ޑަރެން ފްލެޗާ އެވެ.