އަމިއްލަ ދަނޑުގައި ޔުނައިޓެޑު އަތުން އާސެނަލް ބަލިވެއްޖެ

އިނގިރޭސި ޕްރިމިއަރ ލީގުގައި މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗުން ބަލިވެ، ލީޑު ފުޅާ ކުރަަން ލިބުނު ފުރުސަތު އަނެއްކާ ވެސް އާސެނަލް އިން ނަގާލައިފި އެވެ. 

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި އާދީއްތަ ދުވަހުގެ ރޭ ކުޅުނު މެޗު ޔުނައިޓެޑުން ކާމިޔާބު ކުރީ 3-2 އިންނެވެ. މެޗުގައި އާސެނަލް އަށް ލީޑު ލިބިފައި ވަނިކޮށް، ޔުނައިޓެޑުން ފަހަތުން އަރައި ލީޑު ނެގި އެވެ. އޭގެ ފަހުން އާސެނަލް އިން ނަތީޖާ ހަމަހަމަ ކޮށްފައި ވަނިކޮށް، ތިން ވަނަ ލަނޑެއް ޖަހައިގެން ޔުނައިޓެޑު ވަނީ މެޗުން މޮޅުވެފަ އެވެ.

މެޗު ފަށައިގެން 29 ވަނަ މިނެޓުގައި އާސެނަލް އަށް ލީޑު ލިބުނީ ޔުނައިޓެޑުގެ ލިސާންދްރޯ މާޓިނޭޒް އަތުން ބައި ކޮޅަށް ވަތް ލަނޑާ އެކު އެވެ. ނަމަވެސް، ފުރަތަމަ ހާފުގެ 37 ވަނަ މިނެޓުގައި ބްރަޔަން އެމްބުއޭމޯ ވަނީ ލަނޑު ޖަހައި ޔުނައިޓެޑަށް ނަތީޖާ ހަމަހަމަ ކޮށްދީފަ އެވެ.

އޭގެ ފަހުން މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި ޔުނައިޓެޑުން ވަނީ ދެ ވަނަ ލަނޑެއް ޖަހައި ލީޑު ނަގައިފަ އެވެ. އެ ލަނޑު ޔުނައިޓެޑަށް ޖަހައިދިނީ ޕެޓްރިކް ޑޯގޫ އެވެ. އެއީ އެ ޓީމުގެ ކެޕްޓަން ބްރޫނޯ ފެނާންޑޭސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށް، އާސެނަލްގެ ދެ ވަނަ ލަނޑު ޖަހައި ނަތީޖާ ހަމަހަމަ ކޮށްދިނީ މިކޭލް މެރީނޯ އެވެ. ނަމަވެސް، އާސެނަލް އިން ނަތީޖާ ހަމަހަމަ ކުރިތާ ތިން މިނެޓު ފަހުން މަތެއުސް ކުންހާ ވަނީ ޔުނައިޓެޑުގެ ތިން ވަނަ ލަނޑު ޖަހައި މެޗުން މޮޅު ކޮށްދީފަ އެވެ. އެއީ ކޮބީ މައިނޫ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުން ބަލިވެ، އެއް ވަނައިގައި އާސެނަލްގެ ލީޑު ވަނީ ކުޑަވެފަ އެވެ. މިހާތަނަށް ކުޅެފައިވާ 23 މެޗުން އާސެނަލް އަށް 50 ޕޮއިންޓު ލިބޭއިރު، ދެ ވަނައިގައި އޮތް މެންޗެސްޓަރ ސިޓީ އަށް ލިބެނީ 46 ޕޮއިންޓެވެ. ހަމަ އެ އަދަަދަށް މެޗު ކުޅެގެން ހަތަރު ވަނައިގައި ޔުނައިޓެޑަށް ލިބެނީ 38 ޕޮއިންޓެވެ.