ފަހަތުން އަރައި ވެސްޓް ހޭމް ބަލިކޮށް، ޗެލްސީ ރަނގަޅު ފޯމުގައި

އިނގިރޭސި ޕްރިމިއާ ލީގުގައި ވެސްޓް ހޭމް ޔުނައިޓެޑާ ދެކޮޅަށް ކުޅުނު މެޗުން މޮޅުވެ، ޗެލްސީ އިން ރަނގަޅު ފޯމު ދަމަހައްޓައިފި އެވެ.

ޗެލްސީގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި އެ ޓީމުން ވަނީ 3-2 އިން ވެސްޓް ހޭމް ބަލިކޮށްފަ އެވެ. މެޗުގައި ވެސްޓް ހޭމް އިން ދެ ލަނޑު ޖަހާފައި ވަނިކޮށް، ޗެލްސީ އިން ވަނީ ފަހަތުން އަރައި ތިން ލަނޑު ޖަަހައިގެން މެޗުން މޮޅުވެފަ އެވެ.

މެޗު ފަށައިގެން ހަތް ވަނަ މިނެޓުގައި ވެސް ހޭމް އަށް ލީޑު ނަގައިދިނީ  ޖެރަޑް ބޮވެން އެވެ. އޭގެ ފަހުން ފުރަތަމަ ހާފުގެ 36 ވަނަ މިނެޓުގައި ކްރައިސެންސިއޯ ސަމަވިލް ޖެހި ލަނޑާ އެކު، ވެސްޓް ހޭމް އިން ވަނީ ލީޑު ފުޅާ ކޮށްފަ އެވެ. އެއާ އެކު، އެ ޓީމުން ފުރަތަމަ ހާފު ނިންމާލީ ދެ ލަނޑުގެ ލީޑުގައި އޮވެގެންނެވެ.

މެޗުގެ ދެ ވަނަ ހާފު ފަށައިގެން ބާރަ ވަނަ މިނެޓުގައި ޗެލްސީގެ ޔާއޯ ޕެޑްރޯ ވަނީ އެ ޓީމުގެ ފުރަތަމަ ލަނޑު ޖަހައި ފަރަގު ކުޑަ ކޮށްފަ އެވެ. އޭގެ ފަހުން މެޗުގެ 70 ވަނަ މިނެޓުގައި ޗެލްސީގެ ދެ ވަނަ ލަނޑު ޖަހައި ނަތީޖާ ހަމަހަމަ ކޮށްދިނީ މާކް ކުކުރޭލާ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެންޒޯ ފެނާންޑޭޒް ވަނީ ޗެލްސީގެ ތިން ވަނަ ލަނޑު ޖަހައި މެޗުން މޮޅު ކޮށްދީފަ އެވެ.

މެޗުން މޮޅުވެ ޗެލްސީ އޮތީ ލީގު ތާވަލްގެ ހަތަރު ވަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ 24 މެޗުން 40 ޕޮއިންޓާ އެކު އެވެ. ޗެލްސީގެ ކޯޗު ލިއަމް ރޮސެނިއާ ހަވާލުވީ ފަހުން އެ ޓީމުން އަންނަނީ ރަނގަޅު ނަތީޖާ ތަކެއް ނެރެމުންނެވެ. އެންމެ ފަހުން ޗެލްސީ ކުޅުނު ފަސް މެޗުން ވެސް އެ ޓީމު ވަނީ މޮޅުވެފަ އެވެ. އޭނާ ހަވާލުވީ ފަހުން ޗެލްސީ ބަލިވެފައި ވަނީ ކަރަބޯ ކަޕްގެ ސެމީ ފައިނަލްގެ ފުރަތަމަ ލެގުގައި އާސެނަލްއާ ދެކޮޅަށް ކުޅުނު މެޗުން އެކަނި އެވެ.