ހުވާ ކުރުމުގެ ކުރިން ލިބުނު ފެހި ސިގްނަލްތައް ރަތްވެއްޖެ!

ރައީސް ޑރ މުހައްމަދު މުއިއްޒުއަށް ވެރިކަން ލިބި ދެ އަހަރުވެއްޖެ އެވެ. އެއަށްފަހު ދެން ވަމުންދާ ގޮތް ދިވެހިން އުޅޭ ކޮންމެ ރަށެއްގެ ހުރި ހޮޅު އަށިތަކުން ލައިވްކޮށް އެހުރީ ފެންނާށެވެ. މަންޒަރާ އަޑާ ކުލަ ވެސް އެހާ ސާފެވެ. ވެރިކަން ހޯދުމަށް ދެއްކި ވާހަކަތަކާއި އަދި ވެރިކަމުގައި ބަގުނޑި ބަނދެ ދައްކަމުން އަންނަ ވާހަކަތައް ވެސް ވަރަށް ސާފެވެ. ރައްޔިތުން މިއަދު ތިބީ އެމަންޒަރު ބަލާށެވެ. ނަަމަވެސް ބަރު ހިތަކައިގެންނެވެ.

ނުކުރާނެ ކަމަށް ބުނި ހުރިހާކަމެއް ކޮށް ނިންމައިފި އެވެ. ގައުމުގައި ރައްޔިތުންނަށް ބަލާޔާ މުސީބާތް އިންތިހާއަށެވެ. ކުރިން ތިބި މީހުން ގޯސް ކަމަށް ބުނެ ވެރިކަމަށް އެރި މީހުން މިހާރު މާގޯސްކަމަށް ރައްޔިތުން ބުނެ އެވެ. އަނގަޔާ އަތާ ދިމާނުވާ ވާހަކަ ގިސްލަމުން ރައްޔިތުން ދަނީ މާޔުސްކަމާ މޮޅިވެރިކަމުގެ ސާލު އޮޅައިގެން ތިބެ އެވެ.

ތަރައްގީގެ މަޝްރޫއުތައް ކުރިއަށް ގެންދާނެ ގޮތާއި ފައިސާ ހޯދާނެ ގޮތް އެނގިވަޑައިގަންނަވާ ކަމާއި ފައިސާ ލިބުމުގެ ފެހި ސިގްނަލް ލިބިވަޑައިގެންފައިވާ ކަމަށް ވެރިކަމުގެ ހުވާ ކުރެއްވުމުގެ ކުރިން މި ސަރުކަރުގެ ވެރިން ވިދާޅުވިޔަސް، ތަރައްގީގެ މަޝްރޫއުތައް މިދިޔަ ދެ އަހަރު އޮތީ މަޑުޖެހިފަ އެވެ. މަޝްރޫއުތައް އިއުލާނުކުރުމާއި ސޮއިކުރުމާއި ބިންގާ އެޅުން ކުރިޔަށް ގެންދިޔަސް، މުއިއްޒު ކުރެއްވި ދަތުރުތަކުގައި ހުރި ސްޕީޑެއް މަޝްރޫއުތަކުގެ އަމަލީ މަސައްކަތުގައި ނެތެވެ.

ނަމަވެސް އެންމެ ފަހުން މުއިއްޒު އެ ވިދާޅުވީ ރަށްރަށުގެ މިސްކިތްތަކާއި، ސުކޫލުތަކާއި، ސިއްހީ މަރުކަޒުތަކުގެ މަޝްރޫއުތައް ނުފެށި ލަސްވަނީ ކައުންސިލްތަކުން ބިން ހަވާލުނުކޮށްގެން ކަމަށެވެ. ނަމަވެސް މިއީ ހަގީގަތެއް ނޫން ކަމަށާއި ބައެއް ކައުންސިލްތަކުގެ ރައީސުންނާއި ރަށްރަށުގައި އިސްކޮށް ހަރަކާތްތެރިވާ ބައެއް މީހުން ގަބޫލުކުރެ އެވެ. އެވާހަކަތައްވެސް އެހުރީ ލައިވްކޮށް ފެންނާށެވެ. 

ގައުމުގެ ތަރައްގީ ހުއްޓިފައި އޮތަސް، މަދު ދުވަސްކޮޅެއްގެ ތެރޭގައި ބޮޑު ހޭދައެއް ކޮށްގެން ތައްޔާރުކުރި ޕީއެންސީގެ އާ އޮފީސް ހުޅުވުމުގެ ރަސްމިއްޔާތުގައި މުއިއްޒު ދެއްކެވި ވާހަކައިން އެންމެ ފާހަގަކޮށްލެވޭ ކަމަކީ، މަޝްރޫއުތައް ނުފެށިގެން އުޅެނީ ކައުންސިލްތަކުން އެއްބާރުލުން ނުދީގެން ކަމަށް ވިދާޅުވުމެވެ. ނަމަވެސް، ހަގީގަތަށް ބަލާއިރު، ކައުންސިލްތަކުން ކަމެއް ނިންމައި ނުދީގެން ލަސްވެއްޖެ ނަމަ އެ މަޝްރޫއުއެއް ކުރިއަށް ގެންދެވޭ ގޮތަށް ލާމަރުކަޒީ ގާނޫނަށް ބަދަލުކޮށް ވަނީ ތަސްދީގު ކުރައްވާފަ އެވެ.

ގޯސް ރަގަޅު ކުރަން ގެނައި މީހުން ކުރީ ސަރުކާރު ކުރީ ސަރުކާރު ކިޔާލަ ކިޔާލަ ދައުރެއް މެދުން ބިންދަލައިފިޔޯލަ އެވެ. މިއީ ރަށު ތެރޭގައި ކިޔާ ވާހަކަ އެވެ. ވެރިމީހާ މަތިނުވާނެ ކަމަށް ބުނި ޑޮލަރުގެ އަގު ތިރިއަށް ޖެހިނުލާ އޮންނަތާ އަހަރަކަށް ވުރެވެސް ގިނަވީ އެވެ. އެކަމަށް ހައްލުހޯދަން ފެށި ބަންކަރިން ވީހިސާބެއް ވީގޮތެއް ވެސް މިސަރުކާރުގެ ވެރިންނަކަށް ބުނެނުދެވުނެވެ. 400 މިލިއަން ޑޮލަރު ދިޔައި މަތިންކަމެއް ނުވަތަ އަޑިން ކަމެއްވެސް އެނގޭނީ ހަމަ އެބަޔަކަށެވެ. ރައްޔިތަކަށް އެއިން ޑޮލަރެއް ނުލިބެ އެވެ. އެމްޑީޕީ ވެރިކަމުގައި ބޮޑުވެގެން މިބައިމީހުން ދެފައި ތަޅާ ބޮޑާހޭކި ޑޮލަރުގެ އަގު ދިޔައި މައްޗަށެވެ. 

ޑޮލަރުތަކުގެ ކޮންޓްރޯލް ނަގައިގެން އުފެދުނު އަގުގެ މައްސަލައިގައި ސަރުކާރުން ވިޔަފާރިވެރިންނަށް ދިން ފަރުވާއަކީ، ޓީޓީ ހަދާއިރު ބޭންކުން ދޭ ޑޮލަރު ސަޕޯޓުގެ އަދަދު އިތުރުކުރުމެވެ. ނަމަވެސް، މި ފަރުވާއިން ވިޔަފާރިވެރިންގެ ބޮލުގައި ރިހޭ ރިހުމަކަށް، މާ ބޮޑު ތަސައްލީއެއް ނުލިބެ އެވެ. އަދިވެސް ގިނަ ޑޮލަރު ހޯދަން ޖެހެނީ އަގު ބޮޑުކޮށް، ކަޅު ބާޒާރުންނެވެ.

ސަރުކާރުން ބުނާ ގޮތުގައި މިހާރު ތަންފީޒުކުރެވެމުންދާ ސިޔާސަތުތަކާއެކީ ޑޮލަރުގެ މައްސަލަ ހައްލުކޮށް، 2027 ގައި ޑޮލަރު ރަސްމީ އަގަށް ވައްޓާލެވޭނެ އެވެ. މިހެން ބުންޏަސް މި އަމާޒަށް ވާސިލުވެވިދާނެ ކަމާ މެދު ސުވާލު އުފެދެ އެވެ. މައްސަލައަކީ، އަންނަ އަހަރު ދަރަނި ދައްކަން ސަރުކާރަށް ވެސް ބައިވަރު ޑޮލަރު ބޭނުންވުމެވެ.

އަނެއް ކޮޅުން، ޑޮލަރު މާރުކޮށްގެން ލިބޭ ފައިސާ ވެސް ސަރުކާރުން ބޭނުންކުރަމުން ދަނީ އިގުތިސޯދީ ފައިދާއަށް ވުރެ ބޮޑަށް ސިޔާސީ ބޭނުންތަކަށެވެ. މާރުކުރާ ޑޮލަރުގެ ބޮޑު ބަޔެއް އާންމުންގެ ބޭނުންތަކަށެވެ. ބޭސްފަރުވާއަށްދާންވެސް ޑޮލަރު ހޯދަން ޖެހެނީ ހާލުންނެވެ. ރައްޔިތުން ސަރުކާރަށް ސަލާން ޖަހަން ޖައްސުވައިފި އެވެ.