ނަން ދެއްވީ ރައީސް

ރައީސް ޑރ. މުހައްމަދު މުއިއްޒުގެ މި ސަރުކާރަކީ އެކި ގޮތްގޮތުން ނަމޫނާ ދައްކަމުންދާ ސަރުކާރެކެވެ. މި ސަރުކާރުން ދަނީ ތަކުރާރުކޮށް، ރާއްޖޭގެ ހުރިހާ ރައްޔިތުންނަށް އެކި ފަހަރުމަތިން ތަކުރާރު ކޮށް އެކި ކަންކަމުގައި ނަމޫނާ ދައްކަމުންނެވެ. ރައީސް މުއިއްޒުގެ ވަޒީރުންނާ އަރިސް ބޭފުޅުންނަކީ ވެސް ހަމަ މިދަފަ ކަންކަމުގައި ލާމަސީލު މިސާލުތަކެކެވެ. ޚާއްސަކޮށް ރާއްޖޭގެ މާދަމާގެ މުސްތަގްބަލު ކަމުގައިވާ ކުޑަކުދިންނަށް އެންމެ ރަނގަޅަށް ނަމޫނާ ދައްކަވާނެ ކަމަށް އެކިފަހަރު މަތިން ވިދާޅުވެފައި ވަނީ މުއިއްޒުގެ އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އެވެ. 

މިދިއަ އަންގާރަ ދުވަހު މިނިސްޓަރު ޝަފީއު މިވަނީ ދަރިވަރުންނަށް ވަރުގަދަ ނަމޫނާ އެއް ދައްކަވާފަ އެވެ. ތައުލީމީ ވަޒީރުކަމުގައި ހުންނަވާ ތައުލީމީ ނިޒާމަކީ ސިޔާސީ ނުފޫޒުން އެއްކިބާވެފައިވާ، އަދި ދަރިވަރުންނަށް ރީތި "ނަމޫނާ" ދައްކާނެ ނިޒާމަކަށް ހައްދަވާނެ ކަމަށް ވިދާޅުވި ޝަފީއު ވަނީ މިކަމާ މުޅިން އިދިކޮޅަށް އަމަލު ކުރައްވާފަ އެވެ. 

މިނިސްޓަރު ގެ ވާހަކައިގައި ދަރިވަރުންނާ މުޚާތަބު ކުރެއްވުމުގެ ބަދަލުގައި އެންމެ ބޮޑު އިސްކަމެއް ދެއްވައިގެން ކުރެއްވި ރައީސް މުއިއްޒަށް ސަނާ ކިޔުއްވުމެވެ. ސަނާ ކިޔުއްވަމުން ކިޔުއްވަމުން ގޮސް އެންމެ ފަހުން އެ ހުރިހާ ދަރިވަރުންގެ ކުރިމަތީގައި ސިޔާސީ ބޭނުމަށް އެންމެ ފަހުން ޝަހީދެއްގެ ނަން ވެސް ހަތިޔާރަކަށް ހެއްދެވީ އެވެ.

މިނިސްޓަރު ވިދާޅުވި ގޮތުގައި ސްކޫލަށް "ޝަހީދު އަލީ" ގެ ނަން ދެއްވީވެސް ރައީސް މުއިއްޒު އެވެ. ގައުމީ ބަތަލުންގެ ނަންތައް ތަރުބަވީ ބިނާތަކަށް ދިނުމަކީ ރާއްޖޭގައި އަބަދުވެސް އޮންނަ އުސޫލެކެވެ. ނަމަވެސް، އެކަންވެސް ވަކި ބޭފުޅެއްގެ ޚާއްސަ އިހުސާންތެރިކަމެއްގެ ގޮތުގައި ކުޑަކުދިންގެ ކުރިމަތީގައި ތަކުރާރުކޮށް ވިދާޅުވުމަކީ، ތާރީޚީ ހަގީގަތަކަށް ވުރެ ބޮޑަށް ސިޔާސީ ޝަހުސިއްޔަތުތަކަށް ސަނާކިޔަން ދަސްކޮށްދިނުމެވެ. މިއީ ކަނޑައެޅިގެން ގައުމީ ބަތަލެއްގެ ނަންފުޅު ސިޔާސީ ބޭނުމަކަށް ބޭނުންކުރުމެވެ. 

ހަގީގަތުގައި ކްރެޑިޓް ނަންގަވަން މި އުޅުއްވީ ހަމަ މިނިސްޓަރެއް ނޫން ތޯ އެވެ. އެވެސް ގައުމީ ބަތަލެއްގެ ނަން ފުޅު ބޭނުން ކުރައްވައިގެންނެވެ.  މިނިސްޓަރު ޝަފީއު ޝަހީދު އަލީ ސްކޫލަށް ނަން ދެއްވީ ރައީސް ޑރ. މުއިއްޒު ކަމަށް ވިދާޅުވެ ދެއްކެވި ވާހަކަފުޅަކީ ގައުމީ ބަތަލުންގެ މަތިވެރި ނަންފުޅުތައް ސިޔާސީ "ކްރެޑިޓް" ހޯދުމުގެ ހަތިޔާރަކަށް ބަދަލުކުރައްވައިގެން ކުރެއްވި ކަމެކެވެ. 

ޝަހީދު އަލީ ގެ ނަންފުޅު ތައުލީމީ ބިނާއަކަށް ދިނުމަކީ ވަކި ވެރިއެއްގެ އަމިއްލަ "އިހުސާންތެރިކަމެއް" ނުވަތަ "ރަނގަޅު" ކަމެއް ގެ ގޮތުގައި ކުޑަކުދިންގެ ކުރިމަތީގައި ސިފަކޮށް ސިޔާސީ ޝަޚުސިއްޔަތު ތަކަށް ސަނާކިޔަން ދަސްކޮށްދީ ދަރިވަރުންގެ ޅަ ސިކުނޑިތަކަށް ސިޔާސީ ނުފޫޒު ފޯރުވުން ނޫން ދެން ކޯޗެއްތޯ އެވެ. މިފަދަ ވާހަކަތަކާއެކު ތަރުބަވީ މަގްސަދުތައް ގެއްލި ގައުމީ ރަމްޒުތައް ސިޔާސީ ޕްރޮޕެގަންޑާ ފެތުރުމުގެ ވަސީލަތަކަށް މި ސަރުކާރުން މި ވަނީ ހަދާފަ އެވެ. ސްކޫލްގެ ފުރަތަމަ އެސެމްބްލީގައި ވެސް ކުދިންގެ ޅަ ސިކުނޑިތަކަށް މިނިސްޓަރު ވައްދައިދެއްވީ "މި ސްކޫލަކީ ރައީސް މުއިއްޒު ދެއްވި އެއްޗެއް" ކަމުގެ އިހުސާސެވެ. 

މިވަރުން ދާނަމަ ލިޔަން ގެންގުޅޭ ފޮތް ފަންސޫރާ ފޮހޭ ރަބަރު ވެސް ދެއްވީ ރައީސް މުއިއްޒޭ ދަރިވަރުން ގާތު ބުނާނެ ދުވަހެއް އަތުވެދާނެތޯ ވެސް ހިތަށް އަރަ އެވެ. 

މިނިސްޓަރު ދަރިވަރުންނަށް މިފަހަރު މި ނަމޫނާ ދެއްކެވީ ސިޔާސީ ކޯޅުމާ ސިޔާސީ ގޮތުން ބަހުގެ ހަމަލާ ބަދަލު ކުރާނެ ގޮތްތަކާ ގައުމީ ކަންކަން ސިޔާސީ މަންފާ ހޯދުމަށް ބޭނުން ކުރެވޭނެ ގޮތްތަކުންނެވެ.