ގައުމު އޮތީ ދަރަނީގެ ކާރިސާ އެއްގައި، މުއިއްޒު ސަރުކާރުން ސިޔާސީ ޕާޓީތަކާއެކު ގައުމީ އެއްބަސްވުމަކަށް އަންނަން ޖެހޭ: މާރިޔާ
މާރިޔާ ވިދާޅުވީ މިއީ މުޅި ގައުމަށް ކުރިމަތިވެފައިވާ ބޮޑު ކާރިސާއެއް ކަމަށާ ރައީސް މުއިއްޒު ހުރިހާ ސިޔާސީ ޕާޓީތަކެއްގެ މަޝްވަރާ ހޯއްދަވައި ގައުމީ އެއްބަސްވުމަކަށް ވަޑައިގަންނަވާނެ ކަމަށް އުއްމީދު ކުރައްވާ ކަމަށް. ސިޔާސީ ފިކުރުތަކަށްވުރެ ގައުމީ މަސްލަހަތު އިސްކޮށް، ކުރިމަތިވަމުންދާ ބޮޑު ދަރަނީގެ ކާރިސާއިން ސަލާމަތްވުމަށްޓަކައި ޒިންމާދާރު މަގަކުން ކަންކަން ކުރިއަށް ގެންދިއުމަށް ހުރިހާ އިދިކޮޅު ޕާޓީތަކުން ގުޅިގެން މަސައްކަތް ކުރުމަކީ ގައުމީ ވާޖިބެއް ކަމަށް ވެސް މާރިޔާ ވިދާޅުވި.
ކުރީގެ ޑިފެންސް މިނިސްޓަރ މާރިޔާ އަހުމަދު ދީދީ | ރާއްޖެއެމްވީ
ގައުމު އޮތީ ދަރަނީގެ ކާރިސާއެއް ގައި ކަމަށާ ރައީސް ޑރ. މުހައްމަދު މުއިއްޒުގެ ސަރުކާރުން ހުރިހާ ސިޔާސީ ޕާޓީތަކެއްގެ މަޝްވަރާ ހޯއްދަވައި، މިކަމަށް ހައްލެއް ހޯދުމަށް ގައުމީ އެއްބަސްވުމަކަށް ވަޑައިގަތުމަށް ކުރީގެ ޑިފެންސް މިނިސްޓަރު މާރިޔާ އަހްމަދު ދީދީ ގޮވާލައްވައިފި އެވެ.
ދައުލަތުގެ ދަރަނި އަދާކުރުމަށްޓަކައި ސަރުކާރުން 17 އިންސައްތަ އިންޓްރެސްޓްގައި ލޯނު ނަގަމުންދާ ކަމަށް ކުރީގެ ރައީސް އަބްދުﷲ ޔާމީން ވަނީ މިފަހުން ވިދާޅުވެފަ އެވެ. އަދި ރައީސް މުއިއްޒަށް އިތުރަށް ފައިސާ ޗާޕުކުރުމުގެ ފުރުސަތު ފަހިކޮށްދިނުމަށްޓަކައި ޕެންޝަން އޮތޯރިޓީން 2.4 ބިލިއަން ރުފިޔާގެ ބޮންޑެއް ދޫކުރުމަކީ އިގްތިސާދަށް ނުރައްކާތެރި ކަމެއް ކަމަށް ބުނެ އެ އޮތޯރިޓީގެ ޗެއާމަން އިސްތިއުފާ ވެސް ވަނީ ދެއްވާފަ އެވެ.
މިކަމާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައި މާރިޔާ ވިދާޅުވީ މިކަންކަމުން ހާމަވަނީ ރާއްޖޭގެ އިގްތިސާދީ ހާލަތު ގޯސްވެފައިވާ މިންވަރު ކަމަށެވެ. އަދި މިއީ އިންކާރު ކުރެވެން ނެތް ކަމަށް ވެސް މާރިޔާ ވިދާޅުވި އެވެ.
މިއީ ހަމައެކަނި ވަކި ސިޔާސީ ޕާޓީއަކަށް ނުވަތަ ސަރުކާރަކަށް އެކަނި ހައްލުކުރެވޭނެ މައްސަލައެއް ނޫން ކަމަށް ވެސް މާރިޔާ ވިދާޅުވި އެވެ. މިއީ މުޅި ގައުމަށް ކުރިމަތިވެފައިވާ ބޮޑު ކާރިސާއެއް ކަމަށާ މިއީ 2028 ވަނަ އަހަރު އޮންނަ ރިޔާސީ އިންތިޚާބަށްވުރެ މާ ދުރަށް، ގައުމަށް އޭގެ ނޭދެވޭ އަސަރު ފޯރާނެ ބުރައެއް ކަމަށް ވެސް ވަނީ ވިދާޅުވެފަ އެވެ.
މާރިޔާ ވިދާޅުވީ މި ހާލަތު އިތުރަށް ގޯސްވެގެން ގޮސްފައިވަނީ، ރައީސް މުއިއްޒު ދާދިފަހުން ގާނޫނުއަސާސީއަށް ގެންނެވި އިސްލާހުގެ ސަބަބުން ސަރުކާރު ޒިންމާދާރުކުރުވުމަށް ރައްޔިތުންގެ މަޖިލީހަށް އޮތް ބާރު ކުޑަވެ، ގާނޫނުއަސާސީގެ އޮނިގަނޑުގެ ތެރެއިން ކަށަވަރުކޮށްދީފައިވާ މުހިންމު ރައްކާތެރިކަމެއް ގެއްލިގެން ދިއުމާ ގުޅިގެން ކަމަށެވެ.
އެހެންކަމުން ގައުމު މިފަދަ ނާޒުކު ފައްތަރެއްގައި އޮތްއިރު، އިގްތިސާދީ ކާރިސާއާ ކުރިމަތިލުމުގައި ތެދުވެރިކަމާއެކު ހުރިހާ ސިޔާސީ ޕާޓީތަކެއްގެ މަޝްވަރާ ހޯއްދަވައި، މިކަމަށް ހައްލެއް ހޯދުމަށް ގައުމީ އެއްބަސްވުމަކަށް ވަޑައިގަތުމަށް ރައީސް މުއިއްޒު އިސްނަންގަވާނެ ކަމަށް އުއްމީދު ކުރައްވާ ކަމަށް ވެސް މާރިޔާ ވިދާޅުވި އެވެ.
ސިޔާސީ ފިކުރުތަކަށްވުރެ ގައުމީ މަސްލަހަތު އިސްކޮށް، ކުރިމަތިވަމުންދާ ބޮޑު ދަރަނީގެ ކާރިސާއިން ސަލާމަތްވުމަށްޓަކައި ޒިންމާދާރު މަގަކުން ކަންކަން ކުރިއަށް ގެންދިއުމަށް ހުރިހާ އިދިކޮޅު ޕާޓީތަކުން ގުޅިގެން މަސައްކަތް ކުރުމަކީ ގައުމީ ވާޖިބެއް ކަމަށް ވެސް މާރިޔާ ވިދާޅުވި އެވެ.
ސަރުކާރުން މަސައްކަތް ކުރަނީީ 2.4 ބިލިއަން ރުފިޔާ ޗާޕު ކުރާށެވެ. އަދި ސަރުކާރުން އެކަން ކުރަން އުޅޭ ގޮތަކީ، ޕެންޝަން އޮފީހުން ސަރުކާރުގެ ބޮންޑުތަކަކަށް އިންވެސްޓުކޮށްގެންނެވެ.
