މިނިވަން މުސްތަގިއްލު މުއައްސަސާތައް މިއަދު ތިބީ ސަރުކާރުގެ ނުފޫޒަށް ތަބާވެގެން ސަރުކާރު ދިފާއުކުރުމުގައި: ވަހީދު

މިނިވަން މުސްތަގިއްލު މުއައްސަސާތައް މިއަދު ތިބީ ސަރުކާރުގެ ނުފޫޒަށް ތަބާވެގެން ސަރުކާރު ދިފާއުކުރުމުގައި ކަމަށް ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު ވިދާޅުވެއްޖެ އެވެ.

އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.

ސަރުކާރެއް ހިންގުމުގައި މިހާތަނަށް އެންމެ ބޮޑަށް ވައްކަމާއި ކޮރަޕްޝަން ހިންގި ސަރުކާރަކީ މިއީ ކަމަށް އޭނާ ވިދާޅުވި އެވެ. އެކަން އެގޮތަށް ކުރަނީ ވެރިކަމުގައި ހުންނެވި ރައީސް ޑރ.މުހައްމަދު މުއިއްޒުގެ އަތްޕުޅަށް ހުރިހާ ބާރުތަކެއް ޖަމާވެފައިވާ ކަން ޔަޤީން ކުރުމަށް ކުރާ ކަންތައްތަކުގެ ސަބަބުން ކަމަށް އޭނާ ވިދާޅުވި އެވެ.

ކުރިއަށް އޮތް ކައުންސިލް އިންތިޚާބަށް އޮޅުވާލާ އިންތިޚާބަށް ނުފޫޒު ފޯރުވުމަށް އެތައް ކަމެއް ހިނގާ އިރު އޭސީސީ ފަދަ ކަމާއި ގުޅުން ހުރި މުއައްސަސާތަކުން އެކަން ނުބަލާ ކަމަށް އޭނާ ވިދާޅުވި އެވެ. ވަހީދު ވިދާޅުވީ ސަރުކާރުން ދަނީ އިންތިޚާބާއި ދިމާކޮށް މަޝްރޫޢުތައް ހިންގާ، ވަޒީފާ ދީ އާއްމުންނަށް ނުރަނގަޅު ނުފޫޒު ފޯރުވަމުން ކަމަށެވެ. ސަރުކާރުން ބުނާހާ ގޮތަކަށް ކަންކަން ކޮށްގެން މިނިވަން މުސްތަގިއްލު އިދާރާތަކުގައި ނުތިބެވޭނެ ކަމަށް ވަހީދު ވިދާޅުވި އެވެ.

"ނުތިބެވޭނެ އެފަދައިން. އެ މަސައްކަތް ކުރުމުގެ ޤާބިލްކަން ނެތިއްޔާ ގެއަށް ވަޑައިގަންނަވަން ޖެހޭނީ. މިއީ އެންމެ ކޮރަޕްޓް އެޑްމިނިސްޓްރޭޝަން އޮތް ސަރުކާރު މިއީ." އޭނާ ވިދާޅުވި އެވެ.

ސަރުކާރަށް ދެ އަހަރު ވީ އިރު ކުރީ ސަރުކާރުން ފެށި މަޝްރޫޢުތައް ނިންމާ ނުލެވުނު ކަމަށާއި އެއީ ސަރުކާރު ފެއިލްވުން ކަމަށް ވަހީދު ވިދާޅުވި އެވެ. އޭނާ ވިދާޅުވީ ކުރިއަށް އޮތް ކައުންސިލް އިންތިޚާބުގައި ބޮޑުތަނުން ސަރުކާރަށް ނޫނެކޭ ބުނަން ޖެހޭ ކަމަށެވެ. މި ސަރުކާރުން މަސައްކަތްކުރަނީ ލާމަރުކަޒީ ނިޒާމުގެ ބާރު ފޭރިގަނެ ޕަޕެޓަކަށް ކައުންސިލަރުން ހެދުމަށް ކަމަށާއި އެކަމަށް ޖާގަ ނުލިބޭނީ އެމްޑީޕީ އަށް ކައުންސިލް އިންތިޚާބުގައި ވޯޓު ދީގެން ކަމަށް ވެސް އޭނާ ވިދާޅުވި އެވެ.