ހުއްޓިފައި އޮތް ގިރާވަރުފަޅު ހިއްކުމުގެ މަސައްކަތް ފަށައިފިކަން ރައީސް މުޢިއްޒު އިއުލާން ކުރައްވައިފި

ގިނަ ދުވަސްތަކެއް ވަންދެން ހުއްޓިފައި އޮތް ގިރާވަރުފަޅު ހިއްކުމުގެ މަސައްކަތް ހުކުރު ދުވަހު ހެދުނު އަލުން ފަށާފައިވާ ކަމަށް ރައީސް މުހައްމަދު މުއިއްޒު އިއުލާނުކުރައްވައިފި އެވެ.

ރައީސް ޑރ. މުހައްމަދު މުއިއްޒު އެކްސްގައި ކުރެއްވި ޕޯސްޓެއްގައި ވަނީ ގިރާވަރުފަޅު ހިއްކުމުގެ މަސައްކަތް މިއަދު ހެނދުނު ފަށާފައިވާކަން އިއުލާނުކުރައްވާފަ އެވެ. އެ މަސައްކަތް ކުރިއަށްދާތަނުގެ ފޮޓޯއާއި ވީޑިއޯ ވެސް ވަނީ ހިއްސާކުރައްވާފަ އެވެ. 

ސަރުކާރުން އެ މަސައްކަތް ހަވާލުކޮށްފައިވަނީ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީސީ)އާ އެވެ. އެ ފަޅުން ހިއްކުމަށް ހަމަޖެހިފައިވަނީ 160 ހެކްޓަރުގެ ބިމެކެވެ. ސަރުކާރުން މީގެ ކުރިން ހާމަކޮށްފައިވާ ގޮތުގައި އެތަނުން 50 ނުވަތަ 54 ހެކްޓަރުގެ ބިން ވަނީ ހިއްކާ ނިންމާފަ އެވެ. އެކަމަކު، އެއަށް ފަހު އެ މަސައްކަތް އޮތީ ހުއްޓިފަ އެވެ. މި ސަރުކާރުން އެ ކުންފުންޏަށް ރަސްމާލެ ހިއްކުމުގެ މަސައްކަތް ހަވާލުކުރީ ހުޅުމާލެ އާއި ރަސްމާލެ އިން ބިން ދޭ ގޮތަށެވެ.

މިދިޔަ އަހަރުގެ ނޮވެމްބަރު މަހު މައްޗަންގޯޅި ރައްޔިތުންނާއި ބައްދަލު ކުރައްވައި ރައީސް މުއިއްޒު ވިދާޅުވީ ޖެނުއަރީ މަހުގެ ކުރީކޮޅު ގިރާވަރު ފަޅުގެ ހިއްކުމުގެ އަމަލީ މަސައްކަތް ފަށައި މާރިޗު މަހުގެ ނިޔަލަށް މި މަޝްރޫއު ވެސް އެއްކޮށް ހިންކާ ނިމޭނެ ކަމަށެވެ. 

ކުރީގެ ރައީސް އިބްރާހީމް މުހައްމަދު ޞާލިޙްގެ ސަރުކާރުގައި ގޯތި ދޭން އިއުލާންކުރި ގިރާވަރަށް އާ ލޭންޑް ޔޫޒް ޕްލޭނެއް ހަދާނެ ކަމަށް މި ސަރުކާރުން އޮތީ މީގެ ކުރިން އިއުލާންކޮށްފަ އެވެ. އެ ލޭންޑް ޔޫޒް ޕްލޭން މި ހަފުތާގައި ވަނީ އާންމުކޮށްފަ އެވެ. 

ފާހަގަކޮށްލެވޭ ގޮތުގައި ހުޅުމާލެ ފޭސް ތިނަކާއި ގިރާވަރުފަޅު އަދި ރަސްމާލެ ހިމެނޭހެން މާލެ ސަރަހައްދުގެ ބިން ހިއްކުމުގެ މަޝްރޫއުތައް އެމްއޭސީއެލް އާއި ހަވާލުކުރީ އެ މަސައްކަތް ކުރަން ކުރިން ހަދާފައިވާ އެއްބަސްވުންތައް އުވާލުމާށްފަހު އެވެ.