ރައީސް މުއިއްޒު މިސްރާބު ޖައްސަވާފައިވަނީ އިގްތިސާދީ ބޮޑު ހަލާކަކާ ދިމާލަށް: ފައްޔާޒު

ރައީސް ޑރ.މުހައްމަދު މުއިއްޒު މިސްރާބު ޖައްސަވާފައިވަނީ އިގްތިސާދީ ބޮޑު ހަލާކަކާ ދިމާލަށް ކަމަށް ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެ އެވެ.

ފައްޔާޒު މިހެން ވިދާޅުވީ، މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ ބޯޑުގެ ޗެއާޕާސަންގެ މަގާމުން، ކުރިން ފިނޭންސް މިނިސްޓަރުކަން ވެސް ކުރެއްވި ޑރ. އަހުމަދު އިނާޒް އިސްތިއުފާ ދެއްވުމާ ގުޅިގެން އާދިއްތަ ދުވަހު އެކްސްގައި ކުރެއްވި ޕޯސްޓެއްގަ އެވެ. އިނާޒް ދެއްކެވި ސާބިތުކަމަށް ޝުކުރު އަދާކޮށް ފައްޔާޒު ވިދާޅުވީ، މިފަދަ "ޚުދުމުޚުތާރު" ވެރިކަމަކާ ދެކޮޅަށް ތެދުވާނެ އިހުލާސްތެރި ބޭފުޅުން މިއަދު ގައުމަށް ބޭނުންވާ ކަމަށެވެ. 

ރައީސް މުއިއްޒުގެ ވެރިކަމާއި، ސިޔާސަތުތަކަށް އިޝާރާތް ކުރައްވައި ފައްޔާޒު ވިދާޅުވީ ރައީސް މުއިއްޒު  ގާނޫނު އަސާސީގެ ބާރު ކަނޑުވާލައި، ޑިމޮކްރަސީގެ އުސޫލުތަކަށް ހުރަސްއަޅަމުންދާ ކަމަށެވެ.

މުއިއްޒު މިސްރާބު ޖައްސަވާފައިވަނީ އިގްތިސާދީ ބޮޑު ހަލާކަކާ ދިމާލަށްކަން ފާހަގަކުރައްވައި ފައްޔާޒު ވިދާޅުވީ، ދައުލަތުގެ މާލިއްޔަތާއި ސަރުކާރު ހިއްސާވާ ކުންފުނިތައް އިސްލާހު ކުރުމުގެ ނަމުގައި މިސަރުކާރުން ދައްކާ ވާހަކަތަކަކީ ހަގީގަތް އޮޅުވާލުމަށް ދައްކާ ދޮގު ވާހަކަތަކެއް ކަމަށެވެ. ކަންކަން ތަންފީޒު ކުރަމުންދާ ގޮތުން އެކަން ވަރަށް ސާފު ކަމަށް ފައްޔާޒު ވިދާޅުވި އެވެ. 

ފައްޔާޒު ވިދާޅުވީ، ވޭތުވެދިޔަ އަހަރު ލިބޭނެ ކަމަށް ބަޖެޓުކުރި ހިލޭ އެހީގެ ތެރެއިން ދައުލަތަށް ލިބިފައިވަނީ އެންމެ 15 އިންސައްތަ ކަމަށާއި، ހަމައެކަނި 2025 ވަނަ އަހަރުގެ ތެރޭގައި ވެސް މުވައްޒަފުންގެ މުސާރައާއި އިނާޔަތްތަކަށް ކުރާ ހޭދަ 1 ބިލިއަން ދިވެހި ރުފިޔާއަށް ވުރެ އިތުރުވެފައިވާ ކަމަށެވެ. 

ފައްޔާޒު ވިދާޅުވީ، ދައުލަތަށް ލިބޭ އާމްދަނީ އިތުރުވި ނަމަވެސް، އާމްދަނީއަށް ވުރެ ބާރުމިނެއްގައި ޚަރަދުތައް އިތުރުވަމުންދާ ކަމަށާއި، އަމިއްލަ ވިޔަފާރިތަކަށް ދައުލަތުން ދައްކަން ޖެހޭ ބިލިއަނުން ގުނޭ ފައިސާ އަދިވެސް ނުދައްކާ ހުރިއިރު، ބޭރު ފައިސާގެ ސިޔާސަތު ފޭލްވެ، އުމްރާނީ ތަރައްގީގެ މަޝްރޫއުތައް ހުއްޓިފައިވާ ކަމަށެވެ. މީގެ ނަތީޖާއެއްގެ ގޮތުން ތަކެތީގެ އަގު އުފުލި، އާއްމު ރައްޔިތުން ތަކުލީފު އުފުލަމުންދާ ކަަމަށް އޭނާ ވިދާޅުވި އެވެ.

މީގެ އިތުރުން ފައްޔާޒު ވަނީ ޕެންޝަން ބޯޑަށް ގެނައި ބަދަލުތަކާއި ފައިސާ ޗާޕުކޮށްގެން ދަރަނި އިތުރުކުރުމާ މެދު ކަންބޮޑުވުންފާޅު ކުރައްވާފަ އެވެ.

ފައްޔާޒު ވިދާޅުވީ މިއީ "އިންވެސްޓްމަންޓެއް" ކަމަށް ބުނެ ސަރުކާރުން  ދިފާއުވާން އުޅުނު ނަމަވެސް ބައިނަލްއަގްވާމީ އިންވެސްޓަރުންނަށް މިކަން އޮޅުވައެއް ނުލެވޭނެ ކަމަށެވެ.

ކުރިއަށް އޮތް ތަނުގައި 14 އިންސައްތައަށްވުރެ ބޮޑު އިންޓަރެސްޓެއްގައި ދަރަނި ނަގަން ޖެހޭނެ ކަމަށާއި، މިއީ މިނިވަން މުސްތަގިއްލު ދައުލަތަކުން ކަންކުރާނެ ގޮތެއް ނޫން ކަމަށެވެ.

މިއީ ކަންކަން އިތުރަށް ގޯސްވާން އުޅޭކަމުގެ ނިޝާނެއް. ސާފުކޮށް ބުނާނަމަ، މިއީ އެއްވެސް ހަމައެއްގެ ދަށުން ކުރާ ރީފައިނޭންސިންއެއް ނޫން. މިއީ ހާލުގައި ޖެހިގެން ނަގާ ދަރަނި. މާކެޓުގައި އިންޓްރެސްޓް ރޭޓް މިހާ މަތިވެފައިވަނީ، ސަރުކާރުގެ ސިޔާސަތުތައް ފޭލްވެ، އިގްތިސާދީ ނުތަނަވަސްކަން ބޮޑުވުމުގެ ސަބަބުން އިންވެސްޓަރުންނަށް އޮތް ނުރައްކާ އިންތިހާއަށް ބޮޑުވީމަ. ކަންކަން މި ހިސާބަށް ދާކަށް ނުޖެހޭ. މިއީ ސަރުކާރުގެ ނުކުޅެދުންތެރިކަމާއި، މާލީ އިސްލާހުތައް ގެނައުމުގެ ބަދަލުގައި ދައުލަތުގެ ޚަރަދުތައް އިންތިހާއަށް ބޮޑުކޮށް، ސަރުކާރު ފުޅާކުރުމުގެ ސަބަބުން ކުރިމަތިވި ސީދާ ނަތީޖާ.

ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް

ފައްޔާޒު ވިދާޅުވީ، ރައީސް މުއިއްޒު ސަރުކާރުގެ އެއްވެސް ތަރުތީބެއް ނެތް ސިޔާސަތުތަކުގެ ސަބަބުން، ދަރަނި އަދާ ކުރުމަށް ބޮޑު ތާށިކަމެއްގެ ތެރެއަށް ގައުމު ވެއްޓިފައިވާ ކަަމަށެވެ. އަދި މިހުރިހާ ކަމެއް ވަރަށް ގާތުން ދިވެހި ރައްޔިތުން ބަލަމުންދާ ކަމަށް އޭނާ ވިދާޅުވި އެވެ.