ރައީސް މުއިއްޒު އިންޒާރު ދެއްވާފައިވަނިކޮށް "ޕީއެންސީ އަށް ޖޯކު ޖަހާނަމަ ކަލޭ މަރާލާނަން" ކަމަށް ބުނެ ފިޔާޒުއަށް އެހެން ފަރާތަކުން ވެސް އިންޒާރު ދީފި
މީގެ ކުރިންވެސް އެކިފަހަރު މަތިން ފިޔާޒުއަށް މަރުގެ އިންޒާރު ދީފައިވާއިރު، ރައީސުލްޖުމްހޫރިއްޔާވެސް ފޯނުން ގުޅުއްވައި އިންޒާރު ދެއްވައި ބިރުދައްކަވައިފިކަމަށް ފިޔާޒު ވަނީ ވިދާޅުވެފަ. މިފަދަ މައްސަލަތައް ތަހުގީގުކޮށް ފިޔަވަޅު އެޅުމުގައި ފުލުހުން ކުރިއަށްދާ ގޮތާމެދު ގިނަބަޔަކު ސުވާލު އުފައްދާ.
އަދަދު ނޫހުގެ ސީއީއޯ، ހުސެއިން ފިޔާޒު މޫސާ. | ސޯޝަލް މީޑިއާ
ވެރިކަން ކުރާ ޕާޓީ ޕީއެންސީއަށް ޖޯކު ޖަހާނަމަ، މަރާލާނެ ކަމަށް ބުނެ އަދަދު ނޫހުގެ ސީއީއޯ، ހުސެއިން ފިޔާޒު މޫސާއަށް ފޭސްބުކް އެކައުންޓްއަކުން އިންޒާރު ދީފި އެވެ.
އަދަދު ނޫހުން ޝައިއުކޮށްފައިވާ ހަބަރުގައި ވާގޮތުން ފިޔާޒުއަށް މަރުގެ އިންޒާރު ދީފައި ވަނީ ކާކުކަން ނޭނގޭ ގޮތަށް ފޭސްބުކް ގައި ހިންގާ އެކައުންޓަކުންނެވެ. 'ޔޫސުފް އާސް' ގެ ނަމުގައި ހިންގާ ފޭސްބުކް އެކައުންޓުން ރޭ ދަންވަރު 3:30 ގައި ފިޔާޒުއަށް މެސެންޖާއިން ފޮނުވި މެސެޖުގައި އިންޒާރުދީ ބުނެފައި ވަނީ ޕީއެންސީއަށް ޖޯކު ޖަހާނަމަ މަރާލާނެ ކަމަށެވެ.
މީގެ ކުރިންވެސް އެކިފަހަރު މަތިން ފިޔާޒު އަށް ވަނީ މަރުގެ އިންޒާރު ދީފަ އެވެ. އެގޮތުން މި ވެރިކަން ފެށުނު ފަހުން ފިޔާޒުއާއި މީހަކު މަގުމަތިން ދިމާކޮށް ވަނީ އިންޒާރު ދީފަ އެވެ. އަދި ރައީސުލްޖުމްހޫރިއްޔާ މުހައްމަދު މުއިއްޒު ވެސް ވަނީ ފިޔާޒުއަށް ފޯނުން ގުޅުއްވައި އިންޒާރު ދެއްވައި ބިރުދައްކަވައިފަ ކަމަށް ފިޔާޒު ވަނީ ވިދާޅުވެފަ އެވެ.
އޭގެ އިތުރުން ދާދިފަހުން މޯލްޑިވްސް ޖާނަލިސްޓު އެސޯސިއޭޝަން ގެ ރައީސް އަހުމަދު ނާއިފް އަށް ވެސް ފޭސްބުކް އެކައުންޓްއެއް މެދުވެރިކޮށް ވަނީ މަރުގެ އިންޒާރު ދީފަ އެވެ. އަދި ރާއްޖެ ޓީވީގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމުއަށް ވެސް ސޯޝަލް މީޑިއާގައި މީހަކު ވަނީ މަރުގެ އިންޒާރު ދީފަ އެވެ. އެހެންނަމަވެސް އެއްވެސް މައްސަލައެއް ތަހުގީގު ކުރެވިފައިނުވާކަން ފާހަގަކޮށްލެވެ އެވެ.
ނޫސްވެރިންނާއި ސަރުކާރާ ދެކޮޅަށް ބަސް ބުނާ މީހުންނަށް އަމާޒުކޮށް މަރުގެ އިންޒާރު ދިނުމުގެ މައްސަލަތައް އިތުރުވަމުންދާއިރު، މިފަދަ މައްސަލަތައް ތަހުގީގުކޮށް ފިޔަވަޅު އެޅުމުގައި ފުލުހުން ކުރިއަށްދާ ގޮތާމެދު ގިނަ ބަޔަކު ދަނީ ސުވާލު އުފައްދަމުންނެވެ. މިފަދަ އިންޒާރުތައް ދިނުމަށްފަހު މީގެ ކުރިން ރާއްޖޭގައި ނޫސްވެރިންނަށް ބޮޑެތި އަނިޔާ ދިނުމާއި، ފުރާނަ ދުއްވާލުމުގެ ލާއިންސާނީ އަމަލުތައް ވެސް ވަނީ ހިންގާ ފައެވެ.
