މާފަންނު މަދަރުސާގެ ދަރިވަރުންނަށް ރައީސް ވައުދުވެވަޑައިގެންނެވީ ތިރީގައި ހޯލެއް އަޅުއްވައި ދެއްވަން، މިހާރު ބަހައްޓަވައި ދެއްވަނީ ލިފްޓެއް
މާފަންނު މަދަރުސާގެ ޕްރިންސިޕަލް ފާތިމަތު ޔޫސުފު ވިދާޅުވީ، ލިފްޓް ހަރުކުރުމުގެ ލިޔެކިޔުމުގެ އިދާރީ މަސައްކަތްތައް ކުރިއަށްދާ ކަމަށް. 2025 ވަނަ އަހަރު ލިފްޓް ހަރުކުރުމުގެ އެއްވެސް އަމަލީ މަސައްކަތެއް ފަށާފައިނުވާތީ އެކަމާ ގުޅިގެން ކުރި ސުވާލަށް ފާތުމަތު ވިދާޅުވީ، ލިފްޓު ހަރު ކުރުމަށް ކުރަން ޖެހޭ މަސައްކަތްތައް ކުރިއަށްދާ ކަމަށާއި، މަދަރުސާގައި ކިޔެވުން ކުރިއަށްދާތީ ބައެއް ދަތިތައް ކުރިމަތިވާ ކަމަށް.
މާފަންނު މަދަރުސާގެ 40 ވަނަ އަހަރީ ދުވަސް ފާހަގަކުރުމުގެ ރަސްމިއްޔާތުގައި ރައީސް ޑރ.މުހައްމަދު މުއިއްޒު ވާހަކަ ދައްކަވަނީ. | ރައީސް އޮފީސް
މާފަންނު މަދަރުސާގައި ހޯލެއް އަޅައިދެއްވާނެ ކަަމަށް ރައީސް ޑރ.މުހައްމަދު މުއިއްޒު ވިދާޅުވި ނަމަވެސް އެތަނުގައި ލިފްޓެއް ހަރުކުރާ ގޮތަށް ނިންމައިފި އެވެ.
މާފަންނު މަދަރުސާގެ ތިރީގައި ހޯލެއް އަޅުއްވައިދެއްވާނެ ކަމަށް ރައީސް މުއިއްޒު ވިދާޅުވީ، 7 ޑިސެންބަރު 2024 ވަނަ އަހަރު މާފަންނު މަދަރުސާގެ 40 ވަނަ އަހަރީ ދުވަހުގެ ހަފްލާގައި ވާހަކަ ދައްކަވަމުންނެވެ.
އެ ދުވަހު މިހަފްލާ ތައާރަފް ކޮށްދިން ތުއްތު ދެ ކުދިންގެ ތެރެއިން އެއް ކުއްޖަކު ވަނީ ހޯލެއް ނެތުމުން ވާ ދަތިކަމުގެ ވާހަކަ ފާހަގަކޮށްފަ އެވެ. އެގޮތުން އެ ތުއްތު ކުއްޖާ ބުނީ، އެ މަދަރުސާގެ އަހަރީ ދުވަސް ފާހަގަ ނުކުރެވި ލަސްވީ ހަފްލާ ބާއްވާނެ ތަނެއް ނެތިގެން ކަމަށެވެ. މާފަންނު މަދަރުސާގެ ހޯލް ހުންނަނީ 3 ވަނަ ފަންގިފިލާގައި ކަމުން މާމައިންނާ ކާފައިންނަން ހަފްލާތަކުގައި ބައިވެރި ނުވެވޭ ކަމަށެވެ. އެހެންކަމުން ރައީސް އަރިހުގައި އެދެނީ މަދަރުސާގެ ތިރީގައި ހޯލެއް ބިނާ ކޮށްދެއްވުމަށް ކަމަށެވެ.
އެކަމަށް އިޝާރާތް ކުރައްވައި ރައީސް މުއިއްޒު ވިދާޅުވީ، ހޯލެއް އެޅުމުގެ އިތުރުން ދެންވެސް ކުރެވެން ހުރި ކަންކަމުގައި ސީދާ ސަރުކާރުގެ ފަރާތުން އެޑިއުކޭޝަން މިނިސްޓްރީން އަދި ކައުންސިލް މެދުވެރިކޮށް އެހީތެރިކަން ދިނުމާއެކީ ގައި މިދިޔަ ދުވަސްތަކަށްވުރެ މާ ބޮޑަށް ވެސް އުފާވެރި ގޮތަކަށް ސްކޫލްގެ ކަންކަން ބައްޓަންވެގެން ދާނެ ކަމަށެވެ. ސަރުކާރުން ވެސް އެއްބާރުލެއްވުން ދެއްވާނެ ކަމަށެވެ.
މީގެ އިތުރުން މާފަންނު މަދަރުސާއަކީ ކާމިޔާބު ދަރިވަރުން އުފައްދާ، އަދި ޚާއްސަ އެހީއަށް ބޭނުންވާ ކުދިންނަށް ޚާއްސަ ސަމާލުކަމެއް ދޭ ސްކޫލެއްކަން އެމަނިކުފާނު ފާހަގަކުރެއްވި އެވެ.
އެގޮތުން، އެކަންކަން އެނގިފައިވާތީ، އަޅުގަނޑު ހަމަ އަވަސްވެގަންނާނީ، އަދި ތުއްތު ލޮބުވެތި ދަރިވަރުން މިތަނުގައި މި ސްކޫލަށް ދަތިވެފައިވާ ކަންކަން ފާހަގަކޮށް، އެހާ ޝައުގުވެރިކަމާއެކީ އެކަންކަން ފާހަގަކޮށްދިނީތީއާ އެކީގައި، ފުރަތަމަވެސް އަޅުގަނޑު ބޭނުންވަނީ ޔަޤީންކަންދޭން، އިރާދަކުރެއްވިއްޔާ މި އަންނަ އަހަރު މި ސްކޫލްގައި ތިޔަ ލޮބުވެތި ތުއްތު ކުދިންގެ މާމައިންނާއި ކާފައިންނަށް ފަސޭހައިން ވަދެވޭގޮތަށް ބިންމަތީގައި ހުންނަ ހޯލެއް ހަދައިދޭނެ ކަމުގެ ޔަގީންކަން.ރައީސް ޑރ.މުހައްމަދު މުއިއްޒު
ހޯލު އެޅުމުގެ މަސައްކަތް ކުރިއަށް ގޮސްފައިވާ ހިސާބާ ގުޅޭގޮތުން ރާއްޖެއެމްވީން ދެންނެވި ސުވާލަށް، މާފަންނު މަދަރުސާގެ ޕްރިންސިޕަލް ފާތުމަތު ޔޫސުފް ވިދާޅުވީ، މަޝްވަރާގެ ދަށުން މިހާރު ނިންމާފައިވަނީ ހޯލެއް އެޅުމުގެ ބަދަލުގައި ލިފްޓެއް ހަރު ކުރުމަށް ކަމަށެވެ. ލިފްޓް ހަރުކުރުމުގެ ލިޔެކިޔުމުގެ އިދާރީ މަސައްކަތްތައް ކުރިއަށްދާ ކަމަށް އޭނާ ވިދާޅުވި އެވެ.
2025 ވަނަ އަހަރު ލިފްޓް ހަރުކުރުމުގެ އެއްވެސް އަމަލީ މަސައްކަތެއް ފަށާފައިނުވާތީ އެކަމާ ގުޅިގެން ކުރި ސުވާލަށް ފާތުމަތު ޔޫސުފު ވިދާޅުވީ، ލިފްޓު ހަރު ކުރުމަށް ކުރަން ޖެހޭ މަސައްކަތްތައް ކުރިއަށްދާ ކަމަށާއި، މަދަރުސާގައި ކިޔެވުން ކުރިއަށްދާތީ ބައެއް ދަތިތައް ކުރިމަތިވާ ކަމަށެވެ. އެހެންކަމުން މަސައްކަތްތައް ކުރިއަށް ގެންދަނީ ދަރިވަރުންނާއި ޓީޗަރުންނަށް ދަތިނުވާނެ ގޮތަށް ކަމަށް އޭނާ ވިދާޅުވި އެވެ.
ޖާގަ އޮތްގޮތުންނާއި، ކްލާސްތަކެއް ގެއްލިގެން ދާތީ އަޅުގަނޑުމެންނަށް ވިސްނުނީ ހޯލެއްގެ ބަދަލުގައި ލިފްޓެއް ބެހެއްޓުމަކީ އެންމެ ރަނގަޅު ގޮތް ކަމަށް. އެހެންވެ އެގޮތަށް މަސައްކަތް ކުރިއަށް ގެންދަނީ. އެ މަސައްކަތް އެބަ ކުރިއަށް ދޭ އެނގޭތޯ. މިއީ އެއްވެސް ކަހަލަ އިޝޫއެއް އޮތް ކަމެއް ނޫން. ސަރުކާރުގެ ފަރާތުން ވަރަށް ފުރިހަމައަށް އެއްބާރުލުން ލިބޭ.މާފަންނު މަދަރުސާގެ ޕްރިންސިޕަލް ފާތުމަތު ޔޫސުފް
މާފަންނު މަދަރުސާގައި 2025 ވަނަ އަހަރުގެ ތެރޭގައި ހޯލެއް އަޅުއްވައިދެއްވާނެ ކަމަށް ރައީސް މުއިއްޒު ވައުދުވެވަޑައިގެންނެވި ނަމަވެސް ފަހުން ވީލްޗެއަރ އެރުވޭ ގޮތަށް ބޮޑު ލިފްޓެއް ހަރުކުރާ ގޮތަށް ނިންމި ނިންމުން ސަރުކާރުން އަދި މާފަންނު މަދަރުސާއިން ވެސް ހާމަ ކޮށްފައިނުވެ އެވެ.
