އިޒްރޭލުން ޣައްޒާ އަށް ހަމަލާ ދީ ކުޑަކުދިން ހިމެނޭ ހެން 31 މީހުން ޝަހީދު ކޮށްލައިފި
އިޒްރޭލުން ޝެއިޚް ރަޟްވާން ފުލުހުންގެ މަރުކަޒަށް ދިން ހަމަލާގައި 10 ފުލުހުންނާއި ބަންދުކޮށްފައި ތިބި މީހުން ޝަހީދުވެފައިވޭ.
ޣައްޒާގެ ދެކުނުގައިވާ ޚާން ޔޫނިސްގެ ހުޅަނގު ސަރަހައްދަށް އިޒްރޭލުން ދިން ވައިގެ ހަމަލާއަކާ ގުޅިގެން، ގެދޮރު ގެއްލިފައިވާ ފަލަސްތީނު ރައްޔިތުން ވަގުތީ ގޮތުން ބޯހިޔާވަހިކަން ހޯދަމުންދާ ހިޔާވަހިން ދުމާއި އަލިފާން އަރަނީ. | އޭއެފްޕީ
އިޒްރޭލުން ފާއިތުވި ހަފުތާތަކުގެ ތެރޭގައި ޣައްޒާއަށް ދިން އެންމެ ވަރުގަދަ ވައިގެ ހަމަލާތައް ހޮނިހިރު ދުވަހު ދީފިއެވެ. ޣައްޒާގެ ސިއްހީ އިދާރާތަކުން މައުލޫމާތު ދޭ ގޮތުގައި، ހަމާސް އިން ހިންގާ ފުލުހުންގެ މަރުކަޒަކަށާއި، އާންމުން ދިރިއުޅޭ އެޕާޓްމަންޓްތަކުގެ އިތުރުން ރެފިއުޖީން ހިޔާވަހިކަން ހޯދަމުންދާ ފޭލިގެތަކަށް ދިން މި ހަމަލާތަކުގައި ޖުމްލަ 31 މީހަކު ވަނީ ޝަހީދު ކޮށްލާފަ އެވެ.
އިޒްރޭލުން ފަލަސްތީނުގެ ހަމާސް ޖަމާއަތާ ދެމެދު ހަނގުރާމަ ހުއްޓާލުމުގެ އެއްބަސްވުމެއް ގާއިމުކޮށްފައި އޮތް ނަމަވެސް، އިޒްރޭލުން ހަނގުރާމަމަތީ ބޯޓުތަކުން ވަނީ ޣައްޒާ ސިޓީގެ ހުޅަނގުގައި ހުންނަ ޝެއިޚް ރަޟްވާން ފުލުހުންގެ މަރުކަޒަށް އަމާޒުކޮށް ހަމަލާދީފަ އެވެ. މެޑިކަލް ޓީމުތަކާއި ފުލުހުން ބުނާ ގޮތުގައި މި ހަމަލާގައި ފުލުހުންގެ 10 އޮފިސަރުންނާއި އެ ތަނުގައި ބަންދުކޮށްފައި ތިބި މީހުން ވަނީ މަރުވެފަ އެވެ.
ޣައްޒާގައި ހަމާސް އިން ހިންގާ ފުލުހުންގެ އިދާރާއިން ބުނި ގޮތުގައި، ހަމަލާ ދިން ސަރަހައްދުގައި އިތުރު ބަޔަކު ތާށިވެފައިވޭތޯ ސަލާމަތްކުރާ ފަރާތްތަކުން މިހާރު ދަނީ މަސައްކަތް ކުރަމުންނެވެ.
ޣައްޒާ ސިޓީގެ އަލް-ޝިފާ ހޮސްޕިޓަލުގެ އޮފިޝަލުން މައުލޫމާތު ދެއްވި ގޮތުގައި، އެ ސިޓީގެ އެޕާޓްމަންޓަކަށް ދިން އެހެން ހަމަލާއެއްގައި ތިން ކުޑަކުދިންނާއި ދެ އަންހެނުން ވަނީ ޝަހީދުވެފަ އެވެ. މީގެ އިތުރުން، ޣައްޒާގެ ދެކުނުން ޚާން ޔޫނިސްގައި ހުރި ފޭލިގެތަކަކަށް ދިން ހަމަލާއެއްގައި އިތުރު ހަތް މީހަކު ވަނީ ޝަހީދުވެފަ އެވެ.
އިޒްރޭލުގެ އަސްކަރީ މަސްދަރަކުން ބުނި ގޮތުގައި މި ހަމަލާތަކަކީ ހުކުރު ދުވަހު ހިނގި ހާދިސާއަކާ ގުޅިގެން ދިން ރައްދު ހަމަލާތަކެކެވެ. އެގޮތުން، އޮކްޓޫބަރު މަހުގެ ހަނގުރާމަ ހުއްޓާލުމުގެ އެއްބަސްވުމުގެ ދަށުން އިޒްރޭލު ސިފައިން މިހާރު ތިބި ޣައްޒާގެ ދެކުނުގެ ރަފަހް ސަރަހައްދުގައި ހުރި ބިންގަރާހަކުން އަށް ހަނގުރާމަވެރިން ނުކުންނަނިކޮށް ފެނިފައިވާ ކަމަށް އިޒްރޭލުން ބުނެ އެވެ.
އިޒްރޭލު ސިފައިން ބުނީ އޭގެ ތެރެއިން ތިން ހަނގުރާމަވެރިން މަރާލާފައިވާ ކަމަށެވެ. އަދި ހަތަރުވަނަ މީހާ ހައްޔަރުކޮށްފައިވާއިރު، އިޒްރޭލުގެ އަސްކަރިއްޔާ އިން ސިފަކުރާ ގޮތުގައި އޭނާއަކީ އެ ސަރަހައްދުގައި ހަރަކާތްތެރިވާ ހަމާސްގެ އިސް ކޮމާންޑަރެކެވެ.
މި ހާދިސާއާ ގުޅިގެން ހަމާސް އިން ވަކި އެއްޗެއް ބުނެފައެއް ނުވެ އެވެ.
އިޒްރޭލުގެ އަސްކަރީ މަސްދަރުތަކުން ބުނަނީ މިއީ ހަނގުރާމަ ހުއްޓާލުމުގެ އެއްބަސްވުމާ ހިލާފުވުން ކަމަށެވެ. އަނެއްކޮޅުން ހަމާސް އިން ވަނީ ހަނގުރާމަ ހުއްޓާލުމުގެ އެއްބަސްވުމާ ހިލާފުވަނީ އިޒްރޭލުން ކަމަށް ތަކުރާރުކޮށް ބުނެފަ އެވެ.
އަނެއް ކޮޅުން އަލްޖަޒީރާ އިން ރިޕޯޓު ކޮށްފައިވާ ގޮތުގައި ޚާން ޔޫނިސް ގައި ބަޑީގެ ހަމަލާތައް ހޮނިހިރު ދުވަހު އިޒްރޭލުން ވަނީ ދީފަ އެވެ.
މަސްދަރު: ރޮއިޓާސް
