ތުރުކީ ނުވަތަ ޤަތަރުގެ ސިފައިން ޣައްޒާގައި ތިބުމުގެ ފުރުސަތެއް ނުދޭނަން: ނަތަންޔާހޫ

ޣައްޒާގައި އުފައްދާ ބައިނަލްއަޤުވާމީ ސަލާމަތީ ބާރުގައި ތުރުކީ ނުވަތަ ޤަތަރުގެ ސިފައިން ހިމެނުމުގެ އެއްވެސް ފުރުސަތެއް ނުދެއްވާނެ ކަމަށް އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ. 

ޣައްޒާގެ ކަންކަން ބެލެހެއްޓުމަށް އެމެރިކާގެ ރައީސް ޑޮނަލްޑް ޓްރަމްޕް އުފައްދަވާފައިވާ މަޝްވަރާ ބޯޑުގައި ހިމެނޭ މެމްބަރުންނާ މެދު މީގެ ކުރިން ވެސް އިސްރާއީލް ވަނީ ނުރުހުން ފާޅު ކޮށްފަ އެވެ. މި ބޯޑަކީ ޣައްޒާ ހަނގުރާމަ ނިންމުމަށް ޓްރަމްޕް އެކުލަވާލި 20 ނުކުތާގެ މައްޗަށް އެކުލެވިގެންވާ ޕްލޭންގެ ދަށުން އުފައްދާފައިވާ ބޯޑެކެވެ. 

އެމެރިކާގެ ރިޔާސީ ގަނޑުވަރު ވައިޓް ހައުސް އިން މިދިޔަ ހަފުތާގެ ތެރޭގައި ވަނީ، ޣައްޒާގެ ސަަރަހައްދު ހިންގުމަށް ފަލަސްޠީނުގެ ކޮމެޓީ އަކާއި، އަދި މަޝްވަރާ ދިނުމުގެ ރޯލު އަދާ ކުރާނެ ޣައްޒާގެ އެގްޒެކެޓިވް ކޮމެޓީ އިއުލާން ކޮށްފަ އެވެ. 

ނަތަންޔާހޫ ވަނީ މީގެ ކުރިން ވެސް ޣައްޒާ އެގްޒެކެޓިވް ބޯޑުގައި ހިމެނޭ މެމްބަރުންނާ މެދު ހިތްހަމަ ނުޖެހުން ފާޅު ކުރައްވައި، ކަންބޮޑުވުން ފާޅު ކުރައްވައިފަ އެވެ. އިސްރާއީލްގެ ޤާނޫނު ހަދާ މަޖިލީހުގައި ވާހަކަ ދައްކަވަމުން ނަތަންޔާހޫ ވިދާޅުވީ، މިހާރު މިތިބީ އެމެރިކާގެ ރައީސް ޓްރަމްޕްގެ ޕްލޭންގެ ދެ ވަނަ ފިޔަވަހީގެ ކުރިމަތީގައި ކަމަށެވެ. އެގޮތުން ދެ ވަނަ ފިޔަވަހީގައި ހިމެނޭ ކަންކަން ވަރަށް ސާފު ކަމަށް ފާހަގަ ކުރައްވައި އޭނާ ވިދާޅުވީ، ހަމާސްގެ ހަތިޔާރުތައް ނައްތާލައި އަދި ޣައްޒާ އިން ސިފައިން ދުރު ކުރާނެ ކަމަށެވެ. 

އެއާ އެކު ނަތަންޔާހޫ ވިދާޅުވީ، ޣައްޒާގައި ތުރުކީ ނުވަތަ ޤަތަރުގެ ސިފައިން ނުތިބޭނެ ކަމަށެވެ. މިއީ ޓްރަމްޕްގެ ޕްލޭންގައި ހިމަނާފައިވާ ޣައްޒާގައި އުފައްވާ އިންޓަނޭޝަނަލް ސްޓެބިލައިޒޭޝަން ފޯސްއާ ގުޅޭ ގޮތުން ނަތަންޔާހޫ ދައްކަވާފައިވާ ވާހަކައެއް ކަމަށް މާހިރުން ދެކެ އެވެ. މި ބާރުގެ މަސްއޫލިއްޔަތުގެ ތެރޭގައި ހިމެނެނީ، ޣައްޒާގެ ސަލާމަތީ ޙާލަތު ބެލެހެއްޓުމާއި، ހަމާސްގެ ބަދަލުގައި ޣައްޒާގައި ފުލުހުންގެ އައު ބާރެއް ތަމްރީނު ކުރުމެވެ. 

ހުކުރު ދުވަހު އެމެރިކާ އިން ހާމަ ކޮށްފައިވާ ގޮތުގައި، އެ ބާރުގެ އެންމެ އިސްވެރިޔެއްގެ ގޮތުގައި ހުންނަވާނީ އެމެރިކާގެ މޭޖާ ޖެނަރަލް ޖާސްޕާ ޖެފާސް އެވެ. ޖެފާސް އަކީ އެމެރިކާ މެދުވެރިކޮށް ލުބުނާން އާއި އިސްރާއީލްއާ ދެމެދު ފާއިތުވި ހަތް އަހަރު ކުރިއަށް ދިޔަ ހަނގުރާމަ ހުއްޓާލުމުގެ އެއްބަސްވުން ޤާއިމު ކުރުމުގައި އެމެރިކާގެ ފަރާތުން މަސައްކަތް ކޮށްފައިވާ ފަރާތެކެވެ. 

އިތުރަށް ވާހަކަ ދައްކަވަމުން ނަތަންޔާހޫ ވިދާޅުވީ، ޣައްޒާގައި ކަންކަން ބަލަހައްޓާނެ މަޝްވަރާ ކައުންސިލްގެ ބައިވެރިންނާ ގުޅޭ ގޮތުން އެމެރިކާ ހިމެނޭހެން، އިސްރާއީލްގެ ރަޙުމަތްތެރިންނާ އެކު ކޮންމެ ވެސް ވަރެއްގެ ދެ ބަސްވުމެއް އޮތް ކަމަށެވެ. ނަތަންޔާހޫގެ އޮފީހުން ވެސް ވަނީ މީގެ ކުރިން އެކަމާ ގުޅޭ ގޮތުން ބަޔާނެއް ނެރެފަ އެވެ. އެއީ ޣައްޒާ އެގްޒެކެޓިވް ބޯޑުގައި ތުރުކީގެ ފޮރިން މިނިސްޓަރު ހަކަން ފިދާން އާއި، ޤަތަރުގެ ޑިޕްލޮމެޓް އަލީ އަލް ތަވާދީ އަދި އެހެން ސަރަހައްދީ އަދި ބައިނަލްއަޤުވާމީ އޮފިޝަލުން ހިމެނުމާ ގުޅިގެންނެވެ. 

ބޮޑު ވަޒީރުގެ އޮފީހުން ނެރެފައިވާ ބަޔާނުގައި ބުނެފައި ވަނީ، އެކަމާ ގުޅޭ ގޮތުން އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯއާ ވާހަކަ ދައްކައި، މަޝްވަރާ ކުރުމަށް އިސްރާއީލްގެ ފޮރިން މިނިސްޓަރަށް ނަތަންޔާހޫ އަންގަވާފައިވާ ކަމަށެވެ.