ޓްރަމްޕްގެ ބޯޑު އޮފް ޕީސްގައި ބައިވެރި ނުވާން ސްޕެއިން އިން ނިންމައިފި

ދުނިޔޭގެ ހަނގުރާމަތަކާއި ސުލްޙަ އަށް، އެމެރިކާގެ ރައީސް ޑޮނަލްޑް ޓްރަމްޕް އުފައްދަވާފައިވާ ބޯޑު އޮފް ޕީސްގައި ބައިވެރި ނުވާން ސްޕެއިން އިން ނިންމައިފި އެވެ.

އެކަން ހާމަ ކުރައްވާފައި ވަނީ ސްޕެއިންގެ ބޮޑު ވަޒީރު ޕެޑްރޯ ސަންޗޭޒް އެވެ. ބެލްޖިއަމްގެ ބްރަސެލްސްގައި ބުރާސްފަތި ދުވަހު އޮތް ޔޫރަޕިއަން ޔޫނިއަންގެ ސަމިޓަކަށް ފަހު ނޫސްވެެރިންނާ ވާހަކަ ދައްކަވަމުން ސަންޗޭޒް ވަނީ، ބޯޑު އޮފް ޕީސްގައި ބައިވެރިވުމުގެ ދައުވަތު އެމެރިކާ އިން ސްޕެއިން އަށް ދީފައިވާ ކަމަށް ވިދާޅުވެފަ އެވެ.

އެހެން ނަމަވެސް، އެމެރިކާގެ ދައުވަތު ޤަބޫލު ނުކުރަން ސްޕެއިން އިން ނިންމާފައިވާ ކަމަށާއި، އެހެންވެ އެ ބޯޑުގައި ސްޕެއިން ބައިވެރި ނުވާނެ ކަމަށް ސަންޗޭޒް ވަނީ ވިދާޅުވެފަ އެވެ. އޭނާ ވިދާޅުވީ ސްޕެއިން އިން އެ ނިންމުން ނިންމީ، ބައިނަލްއަޤުވާމީ އެއްބާރުލުމާއި، އދ ގެ ނިޒާމަށް އެ ޤައުމުން ޤަބޫލު ކުރާ ގޮތް ތަކުގެ މަތީން ކަމަށެވެ،

ސަންޗޭޒް ވަނީ އެ ބޯޑުގައި ބައިވެރި ވުމުގެ ދައުވަތު ސްޕެއިން އަށް ދިން ކަމަށްޓަކައި އެމެރިކާ އަށް ޝުކުރު ވެސް އަދާ ކުރައްވައިފަ އެވެ. ބޯޑުގައި ބައިވެރި ނުވުމަށް ސްޕެއިން އިން ނިންމާފައިވާއިރު، މީގެ ކުރިން ވެސް އެ ޤައުމުން ވަނީ އެމެރިކާ އިން ގެން ގުޅެމުން އަންނަ ސިޔާސަތު ތަކާ ދެކޮޅަށް ވާހަކަ ދައްކައިފަ އެވެ.

އެމެރިކާ އިން ބުނެފައިވާ ގޮތުގައި އެ ބޯޑުގެ މައިގަނޑު މަޤުސަދަކީ ހަނގުރާމަ ހުއްޓުވުމަށް މެދުވެރިވުމާއި، ހަނގުރާމަ ހުއްޓާލުމުގެ ޙާލަތު މޮނިޓާ ކުރުމާއި، ސަލާމަތީ އިންތިޒާމުތައް ހަމަޖެއްސުމުގެ އިތުރުން، ހަނގުރާމައިގެ ސަބަބުން ވީރާނާވެފައިވާ ތަންތަން އަލުން އިމާރާތް ކުރުމުގެ މަސައްކަތް ބެލެމާއި އެކަމަށް އެހީތެރިވުމެވެ. މިއީ ޣައްޒާގެ ސުލްޙަ އަށް ޓްރަމްޕް އެކުލަވާލި ޕްލޭންގެ ތެރެއިން އައިސްވާ ޚިޔާލެކެވެ. 

ސްވިޒަލެންޑުގެ ޑާވޯސްގައި ކުރިއަށް ދިޔަ ވޯލްޑް އިކޮނޮމިކް ފޯރަމްގެ ތެރެއިން މި ބޮޑު އިފްތިތާހު ކުރުމަށް ބޭއްވި ރަސްމިއްޔާތުގައި، ކެނެޑާ، އިނގިރޭސިވިލާތް، ހަންގޭރީ އަދި ބަލްގޭރިއާ ފިޔަވައި، ޔޫރަޕިއަން ޔޫނިއަންގެ އެހެން އެއްވެސް މެމްބަރު ޤައުމެއް ބައިވެރިވެފައި ނުވެ އެވެ. މި ޤައުމު ތަކަކީ އެމެރިކާ އާއެކު ގާތް ގުޅުމެއް ބާއްވަމުން އަންނަ ޤައުމު ތަކެކެވެ. 

ސްޕެއިންގެ ބޮޑު ވަޒީރު ސަންޗޭޒް އިތުރަށް ވިދާޅުވެފައިވާ ގޮތުގައި، ބައިނަލްއަޤުވާމީ ގޮތުން ހެދިފައިވާ ޤާނޫނު ތަކާއި، އދ ގެ އެންމެހާ އުސޫލުތައް އަދި ބައިނަލްއަޤުވާމީ އެއްބާރުލުމަށް ދީފައިވާ ވައުދާ އެއް ގޮތަށް ސްޕެއިން އިން އަމަލު ކުރަން ބޭނުންވެ އެވެ. އަދި އެގޮތަށް އަމަލު ކުރަން ބޭނުންވާތީ، އެ ބޯޑުގައި ބައިވެރި ނުވާން ނިންމީ ކަމަށް އޭނާ ވިދާޅުވި އެވެ. 

ހަމަ އެހެންމެ، ބޯޑު އޮފް ޕީސްގައި ފަަލަސްޠީނު އޮތޯރިޓީ ހިމެނިފައި ނެތް ކަމަށް ސަންޗޭޒް ފާހަގަ ކުރެއްވި އެވެ. އެ ބޯޑުގައި އިސްރާއީލް އިން ބައިވެރިވެފައިވާއިރު، މެދު އިރުމަތީގެ ޤައުމު ތަކުގެ ތެރެއިން ސައުދީ އަރަބިއްޔާ އާއި، ޤަތަރު އަދި އެކުވެރި އަރަބި އިމާރާތް ވެސް ވަނީ އެ ބޯޑުގައި ބައިވެރިވެފަ އެވެ.