ޣައްޒާ ގެ "ބޯޑް އޮފް ޕީސް" ގައި ބައިވެރިވުމަށް ސައުދީ އަރަބިއްޔާ، ތުރުކީ، މިސްރު، އުރުދުން، އިންޑޮނޭޝިއާ، ޕާކިސްތާން، ގަތަރު އަދި ޔޫއޭއީ އިން އެއްބަސްވެއްޖެ

އެމެރިކާގެ ރައީސް ޑޮނަލްޑް ޓްރަމްޕް އެކުލަވައިލައްވާފައިވާ ޣައްޒާގެ ސުލްހައިގެ މަޖިލިސް ނުވަތަ "ބޯޑް އޮފް ޕީސް" ގައި ބައިވެރިވުމަށް ސައުދީ އަރަބިއްޔާ، ތުރުކީ، މިސްރު، އުރުދުން، އިންޑޮނޭޝިއާ، ޕާކިސްތާން، ގަތަރު އަދި ޔުނައިޓެޑް އަރަބް އެމިރޭޓްސް (ޔޫއޭއީ) އިން އެއްބަސްވެއްޖެ އެވެ. މިކަން ހާމަކޮށްފައި ވަނީ އެ ގައުމުތަކުގެ ޚާރިޖީ ވަޒީރުން ބުދަ ދުވަހު ނެރުއްވި ގުޅިފައިވާ ބަޔާނެއްގަ އެވެ.

މި ބަޔާނުގައި ވާގޮތުން، ކޮންމެ ގައުމަކުން ވެސް މި މަޖިލީހުގައި ބައިވެރިވުމުގެ ރަސްމީ ލިޔުންތަކުގައި ސޮއިކުރާނީ އެ ގައުމެއްގެ ގާނޫނީ އިޖުރާއަތްތަކާ އެއްގޮތްވާ ގޮތުގެ މަތިންނެވެ.

ޚާރިޖީ ވަޒީރުން ވަނީ ސުލްހަ ގާއިމުކުރުމަށް ރައީސް ޓްރަމްޕް ކުރައްވާ މަސައްކަތްޕުޅުތަކަށް އެ ގައުމުތަކުން ފުރިހަމަ އަށް ތާއީދުކުރާކަން ތަކުރާރުކޮށް ކަށަވަރުކޮށްދެއްވާފަ އެވެ. އަދި ޣައްޒާ ގައި ދާއިމީކޮށް ހަނގުރާމަ ހުއްޓާލުމަށާއި، ހަނގުރާމައިގެ ސަބަބުން ސުންނާފަތިވެފައިވާ އެ ސަރަހައްދު އަލުން އާރާސްތުކުރުމަށް އެ މަޖިލީހުން ކަނޑައަޅާފައިވާ ލަނޑުދަނޑިތައް ހާސިލުކުރުމުގައި އެހީތެރިވެދިނުމަށް އެ ގައުމުތަކުން ވަނީ އިގުރާރުވެފަ އެވެ.