އީރާންގެ މަސްރަހު ނުތަނަވަސްވަމުންދާ ދަނޑިވަޅެއްގައި އެމެރިކާ އިން އިޒްރޭލަށް 3.8 ބިލިއަން ޑޮލަރުގެ ހަތިޔާރު ވިއްކުމަށް ހުއްދަ ދީފި

އީރާނާއި އެމެރިކާ އާ ދެމެދު މަސްރަހު ނުތަނަވަސްވެފައިވާ ދަނޑިވަޅެއްގައި، އެމެރިކާ ސަރުކާރުން އިޒްރޭލަށް އެތައް ބިލިއަން ޑޮލަރެއްގެ ހަތިޔާރު ވިއްކުމަށް ހުކުރު ދުވަހު ހުއްދަ ދީފި އެވެ.

އެމެރިކާގެ ސްޓޭޓް ޑިޕާޓްމަންޓުން ބުނި ގޮތުގައި، 3.8 ބިލިއަން ޑޮލަރުގެ އަގުހުރި 30 "އަޕާޗޭ" ހަމަލާދޭ ހެލިކޮޕްޓަރު އިޒްރޭލަށް ވިއްކުމަށް މިހާރު ވަނީ ހުއްދަ ދީފަ އެވެ.

ސްޓޭޓް ޑިޕާޓްމަންޓުން ނެރުނު ބަޔާނެއްގައި ބުނެފައި ވަނީ، އެމެރިކާ އިން އިޒްރޭލުގެ ސަލާމަތާއި ރައްކާތެރިކަމަށް އިސްކަންދޭ ކަމަށާއި، އިޒްރޭލުން އަމިއްލަ ދިފާއުގައި ވަރުގަދަ އަދި ތައްޔާރީ ހާލަތެއްގައި އޮތް އަސްކަރިއްޔާ އެއް ގާއިމުކޮށް ދެމެހެއްޓުމަށް އެހީތެރިވުމަކީ އެމެރިކާގެ ގައުމީ މަސްލަހަތާ ގުޅިފައިވާ މުހިންމު ކަމެއް ކަމަށެވެ.

އަދި ހަތިޔާރު ވިއްކުމަށް ނިންމި މި ނިންމުމަކީ އެމެރިކާގެ އެ މަގްސަދުތަކާ އެއްގޮތްވާ ގޮތުގެ މަތިން ނިންމި ނިންމުމެއް ކަމަށްވެސް އެ ބަޔާނުގައި ބުނެފައިވެ އެވެ.

މީގެ އިތުރުން، މި ހަތިޔާރުގެ ޕެކޭޖުގެ ތެރޭގައި 1.8 ބިލިއަން ޑޮލަރުގެ އަގުހުރި "ޖޮއިންޓް ލައިޓް ޓެކްޓިކަލް" އަސްކަރީ އުޅަނދުތައް ވިއްކުން ވެސް ހިމެނެ އެވެ.

އެމެރިކާ އިން ކޮންމެ އަހަރަކު ވެސް އެތައް ބިލިއަން ޑޮލަރެއްގެ އަސްކަރީ ސާމާނު އިޒްރޭލަށް  ފޯރުކޮށްދެ އެވެ. ނަމަވެސް އޭގެ ތެރެއިން ބޮޑު ބަޔަކީ ހަތިޔާރު ވިއްކައިގެން ފައިސާ ހޯދުމުގެ ބަދަލުގައި އެހީގެ ގޮތުގައި ދޭ ތަކެއްޗެވެ.

ދެ އަހަރު ދުވަހުގެ ހަނގުރާމަ އަށް ފަހު، އެމެރިކާގެ އެހީތެރިކަމާ އެކު އިޒްރޭލާ ހަމާސް އާ ދެމެދު މިދިޔަ އޮކްޓޫބަރު މަހު ވަނީ ހަނގުރާމަ ހުއްޓާލުމުގެ އެއްބަސްވުމެއް ގާއިމުކޮށްފަ އެވެ. އެހެން ނަަމަވެސް އިޒްރޭލުން ފަލަސްތީނު ރައްޔިތުންނަށް އަމާޒު ކޮށް ދެމުންދާ ހަމަލާތަކަށް ހުއްޓުމެއް އައިސްފަ އެއް ނުވެ އެވެ.

އަނެއް ކޮޅުން އެމެރިކާގެ ވަރުގަދަ އަސްކަރީ ފައުޖެއް އީރާނާ ކައިރި ކަނޑުގެ ސަރަހައްދުތަކުގައި ހަރަކާތްތެރިވަމުންދާތީ، ސަރަހައްދުގެ އެހެން ހިސާބުތަކުގައި ވެސް މަސްރަހު ވަނީ ވަރަށް ބޮޑަށް ނުތަނަވަސްވެފަ އެވެ.

އިޒްރޭލުން ވަނީ މިދިޔަ އަހަރު އީރާނުގެ ނިއުކްލިއާ މަރުކަޒުތަކަށާއި އެހެނިހެން އަސްކަރީ މަރުކަޒުތަކަށް އަމާޒުކޮށް ވަރުގަދަ ބޮން އެޅުމުގެ ކެމްޕޭނެއް ކުރިއަށް ގެންގޮސްފަ އެވެ.

އީރާނުގެ ސަރުކާރާ ދެކޮޅަށް ކުރި ބޮޑެތި މުޒާހަރާތަކާ ގުޅިގެން އެ ގައުމަށް ވަނީ ބައިނަލްއަގުވާމީ ފިއްތުންތައް ކުރިމަތިވެފަ އެވެ.

ޓްރަމްޕް ސަރުކާރުން ބުނެފައިވާ ގޮތުގައި، ޣައްޒާ ގައި ހަނގުރާމަ ހުއްޓާލުމުގެ އެއްބަސްވުން މިހާރު އޮތީ ދެވަނަ މަރުހަލާގަ އެވެ. އަދި މި މަރުހަލާގައި އެންމެ ބޮޑު އިސްކަމެއް ދެނީ ހަމާސްގެ ހަތިޔާރު އަތުލުމަށެވެ.

ހަނގުރާމަ ހުއްޓާލުމުގެ އެއްބަސްވުމުގައި ސޮއިކޮށްފައިވީ ނަމަވެސް  2023 ވަނަ އަހަރުގެ އޮކްޓޫބަރު 7 ވަނަ ދުވަހުން ފެށިގެން އިޒްރޭލުން ޣައްޒާ ގައި ހިންގަމުންދާ އަސްކަރީ ހަރަކާތްތަކުގައި 71,667 ފަލަސްތީނު ރައްޔިތުން  ޝަހީދުވެފައިވާ ކަމަށް ޣައްޒާ ގެ ހެލްތު މިނިސްޓްރީން ބުނެ އެވެ.